EBIHOLWA 10

1Mu Kaisarea, mwalimo omusaacha wundi olaangwa mbwe Koroneerio, kabuteeni owali ow'omukaanda kwabamaye Abaroomu okulaangwa mbwe, “Eye ly'Esiyitale”, 2omusaacha omundadiini muno owatya Nasae alala nende edaala lyae lyoosi, owakabaanga obuhoonyi abandu bamanani boosi, handi owali yaheera muno ohwekongooyaanga Nasae butoli-toli. 3Mani aambi w'esaa chitaanu-na-chine ch'esideete, yeecha yaanyala ohubona bulai bweene malaika wa Nasae mu huboneherwa niyengira mu nyumba yiyalimo namuboolera ati, “Koroneerio.” 4Mani yamudangaaliraho natiire muno, mani yaboola ati, “Omwaami, siina syeene?” Nae malaika yamuboolera ati, “Ohwekongooya hwao alala nende ohukaba hwao biniinire byoola mu moni wa Nasae yabibaasaho. 5Mani bulaanu ewe tuma abasaacha bache e Yopa, mani baleete Simooni wundi olaangwa ati Peetero; 6amenyere nende Simooni, omubaambi w'amaseero, oli nende enyumba hundulo w'enyaanja.” 7Mani malaika wali naalomaloome nae niyamala ohuwaao, Koroneerio yeecha yalaanga abasaacha babiri hu bahalaabani bae, alala nende omunamaye munadiini wundi ohutula hw'abo abamulindaanga, 8mani niyali naamalire ohubatondoolera ebyo byoosi, yeecha yabatuma e Yopa. 9Nibwahya oludaalo luloondaho, nibali nibali hu lukeendo olwo nibali aambi ohwoola mu siko sihuluundu esyo, Peetero yeecha yaniina mu siseenge siri akulu hu sirama ohwekongooya Nasae, aambi w'esaa mukaaga chesideete. 10Mani yeecha yachaaka ohuwulira enjala mani yachaaka ohudahaho esiindu syoosi esyohulya; nae nibali hubali ohusitekeha, yeecha yaakwa muhuloota, 11mani yeecha yabona ekulu nilikuulwe, mani esiindu siindi nisiri ohwiiha aasi, nisifwaana koti esuuka hoongo muno, niliiswa aasi husyaalo niridiirirwe esoonda chaalyo chine. 12Mu suuka omwo mwalimo embya choosi ech'ebisolo nende ebyaafula byoosi, nende amayoni kabburuha mu mboo. 13Mani abweene awo, ekono lyamwichira liti, “Peetero, siingira; yita mani olye.” 14Nae Peetero yaboola ati, “Haba daawe, Omwaami; olwohuba ese haba sindichaangaho esiindu syoosi esyasiirwa oba esitaali esilafu sihoyerwa ohuliibwa.” 15Handi ekono lyeecha lyamwichira handi ehabi lyohubiri liti, “Esyo syoosi si Nasae yalabya, haba sohoyeere ohusilaanga oti syomusiro.” 16Esiindu nasilala sino syeecha syehola sityo amahabi kadatu, mani esuuka elyo lyeecha lyabukulibwa lyaninisibwa Mukulu bwaangu muno. 17Bulaanu, Peetero niyali nasyetebaanga mu mwooyo esiindu si huboneherwa ohwo sinyala ohuba nisyekesa, boneho, abasaacha bala abali nibatumiibwe nende Koroneerio, nibamalire ohuteeba eyiri enyumba ya Simooni, beecha bafuduha baaba nibeemere hu siruwa 18mani bachaaka ohulaanga nibateeba nikali mbwe Simooni owali nalaangwa Peetero yali namenyere mu nyumba omwo. 19Nae Peetero niyali nasibasaanga huhuboneherwa ohwo, Mwooyo yeecha yamuboolera ati, “Bonaho, abasaacha badatu mbawo bali ohuhukoonya. 20Siingira mani hwiihe aasi, mani ochiane nabo ataali ohuhiinda; olwohuba nise obatumire.” 21Mani Peetero yeecha yeeha yaacha eyiri abasaacha abo mani yaboola ati, “Nise oyo yimuli ohukoonya; sifune siina esikerere mweecha?” 22Nabo baboola bati, “Koroneerio, kabuteeni w'amaye k'Abaroomu, omusaacha omulungifu muno handi omutiiririrwa muno wa Nasae, handi omanyihaane muno nende Abayudaaya boosi, yeecha yemirirwa nende malaika mwolerefu ohuhulaanga wiiche enadaala lyae, mani anyale ohuwulira ewe byonanyala ohuboola.” 23Mani Peetero yeecha yabengisa mu nyumba babe abakeni bae. 24Mani oludaalo lwaloondaho beecha baacha beengira mu Kaisarea. Koroneerio hane yali nabaliindiriire mani yali naamalire ohubuusa alala abanaluya bae alala nende abeecha bae. 25Mani Peetero niyeecha yengira mu nyumba omwo, Koroneerio yeecha yaasingira yaacha ohumubukaanira mani yaakwa aasi mu makulu kae mani yaamwiinamira. 26Nae Peetero yeecha yaamusingisa naboola ati, “Yema bweema; Ese syesi ndi busa omuundu.” 27Mani niyali hwali ohulomalomaanga nae atyo, Peetero yeecha yengira mukati mani yakaana abandu bangi nibebuusire alala; 28mani yeecha yababoolera ati, “Eng'we abeene mumanyire koti lusitafukiirirwa Omuyudaaya ohuholegana nende oba ohukeniya omuundu yeesi ow'esyaalo siindi; nae Nasae yanjekeese ati sihoyeere ohulaanga omuundu yeesi ohuba ow'omusiro oba ohuba otahoyera. 29Mani nimbeere ninaangirwe ohwiicha, njichire nitaaliho ohukaana hwoosi. Njichire ndeteeba esikerere mwaanaanga.” 30Mani Koroneerio yeecha yaboola ati, “Endaalo chine chibitire, esaa chifwaana koti chino chiti, Ndali niindi ohwoseresa ohwekongooya hw'esaa chitaanu-na-chine mu nyumba yange; abweene awo, ndabona omusaacha niyeemere mu moni wange nafwaalire ebifwaalo bimilamilana, 31naali ohuboolaanga ati, ‘Koroneerio, ohwekongooya hwao huwuliirwe, handi ohuboonyi bwao biichuliswe mu moni wa Nasae. 32Mani hu lwesyo, tuma e Yopa mani oteebe Simooni olaangwa Peetero; amenyere mu nyumba ya Simooni, omubaambi w'amaseero, hundulo w'enyaanja.’ 33Mani sakira hulaangire bwaangu, mani wesi onyalire ohuba owesisa simala ohukanya weecha. Mani sakira bulaanu, fweesi mbano huli ano mu moni wa Nasae, ohutekeeresa ohuwulira ebyo byoosi byolagiirwe nende Omwaami ohutuboolera.” 34Mani Peetero yeecha yachaaka ohulomaloma, mani yaboola ati, “Mubwadyeeri bweene, malire ohweeka nende ohumanya endi, hane Nasae haba saaliwo yakwiira busa, 35ohutusaho mu buli syaalo buli muundu yeesi omutya handi ohola ebilungifu niye oyo ofukiirirwa nae. 36Mumanyire emboosi yiyagoobera Yisirayiri, ohuyaala emboosi ndayi ey'omuleembe ohubitira mu Yesu Kristo (oyo niye Omwaami wa boosi), 37emboosi yayaalwa mu Buyudaaya mwoosi, ohuchaakira e Galilaaya lunyuma lw'ohubatiiswa hu Yowaana yayalaanga: 38koti lu Nasae yabaha Yesu w'Enasareeti Mwooyo Mwolerefu nende amaani; koti lu yakendaanga naahola ebilai byereere handi nawonianga abo boosi abali behalwaho nende Sitaani, olwohuba Nasae yali ali nae. 39Handi fweesi huli abajulisi b'ebiindu ebyo byoosi biyahola naali mu syaalo sy'Abayudaaya handi nende mu Yerusaalemu. Beecha bamwiita nende ohumwaniha hu musaala; 40nae Nasae yeecha yaamusyuhisa hu ludaalo lw'ohudatu mani yamuhola yabonehana; 41natabonehera abandu boosi ohutusaho efwe abadoolebwa nende Nasae ohuba abajulisi, abalya handi baang'wa nae lunyuma lwohusyuuha ohutula mu bafu. 42Handi yeecha yatutuma ohuyaalira abandu, handi nende ohutusa obujulisi huti oyo niye owatoongolwa nende Nasae ohuba omuheengi w'emisaango echa abalamu nende abafwa. 43Oyo niye yi banabbi boosi batusira obujulisi bati buli muundu yeesi omufukiiriramo anyoola ohuleherwamo ebibi ohubitira mu liita lyae.” 44Mani Peetero niyali nisiilomalomaanga ati, Mwooyo Mwolerefu yeecha yaakwa hw'abo boosi abali nibawuliire emboosi echo. 45Mani abafukiiriri bandi bali nibeechere nende Peetero beecha besinduha muno, olwohuba esiyaanwa sya Mwooyo Mwolerefu syali nisimalire ohuchuhibwa kata nende hu Abateende. 46Olwohuba bali nibabawuliire nibali ohulomalomaanga mu nimi chikabuhane handi nibakinia Nasae. Mani Peetero yemawo yalangirira ati, 47“Aliwo onyala ohwiima amaachi akohubatiisamo abandu bano abamalire ohunyoola Mwooyo Mwolerefu koti busa fwesi luhuli?” 48Mani yeecha yabalagira bache babatiisibwe mu liita lya Yesu Kristo. Mani beecha bamusaba adoong'e nabo hulw'endaalo chiindi handi.

will be added

X\