EBIHOLWA 1

1Omukoosi Siofiila: Mu sitabo sitaangira, ndandiika ebidiira hu biindu byoosi bi Yesu yataangira ohuhola nende ohweekesa, 2ohwoola hu ludaalo luyayirirwa Mukulu. Nasisiiri ohuyirwa Mukulu, yataangira yahuutira abatume bayali yadoola niyehoonyera Mwooyo Mwolerefu. 3Yesu yeyekesa eyiri abatume mu ngeri nyiingi koti lwali omulamu, naamalire ohusaandisibwa nende ohufwa handi mu mbaka y'endaalo amahumi kane, yaba ababonehera handi naalomaloma hu Bwaami bwa Nasae. 4Mani niyali nasisiiri nabo, yeecha yabahuutira obutatula mu Yerusaalemu, nae baliinde si Lata yasuubisa simwawulira nimbaboolera endi, 5“Yowaana yabatiisa nende amaachi, nae mu ndaalo chitaali enyiingi, mucha ohubatiisibwa nende Mwooyo Mwolerefu.” 6Mani abatume nibali nibebuusire alala, beecha bamuteeba Yesu bati, “Omwaami, mani bulaanu ochia ohukobosera Yisirayiri obwaami?” 7Nae yababoolera ati, “Haba simulimo kweeng'we ohumanya endaalo oba obwiire bu Lata mweene yatekeha nende obunyala bwae. 8Nae mucha ohunyoola amaani Mwooyo Mwolerefu naamalire ohubeehaho; mani mucha ohuba abajulisi bange mu Yerusaalemu nende mu Buyudaaya mwoosi, nende Samaria, nende ohwoola yi syaalo syaakamira.” 9Mani niyali niyahamala ohuboola atyo, yayiribwa akulu nibabona, mani esireesi syeecha syamubwiiha beecha baahaya ohumubona. 10Mani koti lubali nibasitingaalire akulu Yesu nawaao, bone, abasaacha babiri abefwalire engubo cha rachaari, beecha baboneha nibeemere aambi nabo, 11mani baboola bati, “Basaacha Bagalilaaya eng'we, lwasiina mweemere nimutingaalire akulu? Yesu wuno, obatusirweho yayiribwa Mukulu, achia ohukobola mu ngeri nasilala eyo yimumubweneremo naachia Mukulu.” 12Bulaanu Abatume beecha bakobola e Yerusaalemu nibatula hu lugulu lulaangwa Olibeti, oluli aambi nende Yerusaalemu, olwoola olukeendo lufukiirirwa ohukeendwa hu ludaalo lwa Sabbaato. 13Mani nibamala ohwingira mu Yerusaalemu, baacha baniina mu siseenge sy'akulu sibali bamenyamo: Peetero nende Yowaana nende Yakobbo nende Andereya, Filipo nende Tomasi, Batulumaayo nende Matayo, Yakobbo omusyaani wa Alufaayo nende Simooni Omulwaanirisi w'esyaalo syae, Yuda omusyaani wa Yakobbo. 14Bano boosi, alala nende abahasi bandi nende Maria ng'ina Yesu, alala nende bamwaanang'ina, beecha bekongooyaanga Nasae nende omwooyo mulala. 15Mu ndaalo echo, Peetero yeecha yaasingira yeema mu baasye (omukanda kw'abandu boola aambi emia ndala nende amahumi kabiri), mani yaalomaloma naboola ati, 16“Basyaange, ebyandiiko byolerefu byali eby'ohwosereswa abweene, bi Mwooyo Mwolerefu yalomaloma hale nabitira mu munwa kwa Daudi, ebidiira hu Yuda owali omwemeresi w'abandu badiira Yesu. 17Olwohuba yali mulala hw'efwe, mani yaberesebwa omukabo kwae mu mulimo kuno. 18(Bulaanu, omusaacha wuno yakula omukunda nende esiyaanwa syesiholwa syae sibi mani yaakwiira omutwe yaadihanamo amala keediha erwaanyi. 19Mani sino syeecha syamanyiha eyiri abandu boosi abamenya mu Yerusaalemu, mani omukunda okwo kwalaangwa mu lulimi lwaabwe kuti Akeludaama, esyeekesa siti, Omukuunda kw'Amabaanga.) 20Olwohuba syandiikwa mu sitabo sy'Esabbuli siti, ‘Lehe edaala lyae lyehole ekuunda, handi lehe omuundu yeesi ahaye ohulimenyamo’; handi ‘Lehe omuundu wundi abukule omulimo kwae.’ 21Mani sakira, mulala hu bandu bakeendaanga naafwe endaalo choosi chi Mwaami Yesu yaba mweefwe, 22ohutulira elalira hu hubatiisa hwa Yowaana, ohwolera elalira hu ludaalo lu yatubukulirwaho yayiribwa akulu, mulala hu bandu bano niye ohoyeere ohwehola naafwe omujulisi w'ohusyuuha hwa Yesu.” 23Mani beecha badoolamo bataawo abandu babiri: Yosefu olaangwa mbwe Barisabba, owakulihwa Yusito, nende Matiya. 24Mani bekongooya nibaboola bati, “Omwaami, niiwe omanyire emyooyo ch'abandu boosi, tweekese wiina hu babiri bano, oyo yi ewe omweene odoolere 25ohubukula esifwo mu mulimo kuno, nende mu butume bu Yuda yetusaho, mani yechiira yi yadaha omweene.” 26Mani beecha baaboobbera eha, mani eha yeecha yaakwa hu Matiya mani yeecha yabalirwa mu batume ehumi-na-mulala.

will be added

X\