TIMOTEO YOHUBIRI 2

1Nae ewe, mwaana wange, ba nende amaani kahwanyoola ohubitira mu sisa sya Kristo Yesu. 2Bukula emboosi chiwawulira ninjekesa mu lwichuule lw'abandu, mani ochidiise abandu beesikwa, abacha ohunyala ohweekesa abandu bandi bosi. 3Nyoola omukabo kwao mu husaanda koti omulwaani wa Kristo Yesu mwesikwa. 4Abulao omulwaani weyingisa mu biholwa by'abandu babuli ludaalo olwohuba adaha ohusangaasa omuhongo wae omubeeresa amalako kamufuka. 5Mu ngeri nasilala eyo omwiiruhi akerana embiro saanyala hunyoola esirabo yesi nataloonda amalako k'ohwiiruha. 6Omulimi oholere omulimo kw'amaani ahoyera ohunyoola omukabo kutaangira okw'ekesa. 7Baasa hu biindu biindi ohuboolaanga, olwohuba Omwaami achia ohuhuhoonya omanye amahulundu kaabyo byoosi. 8Yichulisa Yesu Kristo yi Nasae yasyuhisa ohutula mu bafu, owali omwichuhulu wa Daudi. Yino niyo Emboosi Ndai yi njaala. 9Olwohuba njaala Emboosi Ndai sakira bulaanu saanda handi nimboywa mu minyororo koti omuundu muholi w'ebibi muhoongo. Nae Emboosi ya Nasae haba siyaboyebwa mu minyororo. 10Mani sakira ngumira ebiindu byoosi hulw'obulayi bw'abadoole ba Nasae hu bosi banyale ohunyoola obuwonia buli Kristo Yesu alala nende oluyaali lutaakama. 11Yino nomaloma yadyeeri eyiboola yiti: Nihwafwa alala nae, fwesi hucha ohuba abalamu alala nae. 12Nihuchiiririra ohuguma ohusaanda fwesi hucha ohutuka alala nae. Nihumwekaana, yesi achia ohutwekaana. 13Nihutaba abesikwa, adoong'a naali omwesikwa busa olwohuba saanyala ohwekaana omweene 14Yichulisanga abandu bao esiindu sino, handi balabulire elalira mu moni wa Nasae, oti sibahoyeere ohuyingana ebidiira hu mboosi busa. Olwohuba abulao obuhoonyi bwoosi bubanyoola ohutusaho binyaasa busa ababiwulira. 15Kesaho koti lwonyala ohusangaasa Nasae, koti omuhosi yi soni chitadiira hulw'omulimo kwae, handi koti omweekesa weekesa bulai Emboosi ya Nasae yadyeeri. 16Lehana nende embaha ch'obusiru chitahoonya, olwohuba chiirusira elalira abandu ohutula hu Nasae. 17Enjekesa yifwana yityo yiri koti ehwaaku eyichiririra ohulya enyama. Hamenesi nende Fileeto nibo abasaacha bali ohweekesa enjekesa yino. 18Bano bamala ohuleha engira y'obwadyeeri, nae bulaanu bali ohudondobania efukiirira y'abafukiiriri bandi nibaboola bati, ohusyuuha hw'abandu hwamala obubao. 19Nae omusiingi kw'amaani ku Nasae yataawo haba sikunyala hudenganisibwa; handi chino nicho emboosi chibakwandiikaho: “Omwaami amanyire abandu bae” handi “Abandu boosi abelanga ohuba ab'Omwaami bahoyeere ohwakamira elalira ohuhola ebibi.” 20Mu nyumba hoongo ebiindi byehonyerwa hu miholo mihoongo, nae ebiindi nabyo byehonyerwa buli ludaalo. 21Omuundu yeesi niyenyirisa yetusaho ebiindu bibi ebyo, achia ohwehoonyerwa bilai, olwohuba aaba yawulibwa mani ali nende obuhoonyi eyiri Omwaami wae, naali omwetekefu ohwehoonyerwa hu mulimo mulai kwong'ene. 22Lehana nede obwekoombi bw'esiraaga, mani olwaanirire obuluungifu, efukiirira, ohudaha, nende emireembe, alala nende abo abekongooya Omwaami nende omwooyo mulai. 23Nae lehana nende ohuyingana hw'obusiru embaasa yitaalimo obuhoonyi; olwohuba omanyire oti ebiindu ebyo bileeta busa obusoolo. 24Omuhalaabani w'Omwaami haba sahoyeere ohuba omuundu musoolani. Nae ahoyeere ohuba owesisa eyiri abandu boosi, Handi ahoyeere ohuba omuundu onyala ohweekesa bulai naali nende ohwesimiirisa, 25handi okolola abamuyingania nende obuloonga. Olwohuba sinyala ohuba siti Nasae achia ohubaba ehabi y'ohwefunaka mani bamale bafukiirire obwadyeeri. 26Mani awo niwo abacha ohukoboleramo ebibaaso, mani baone omuteego kwa Sitaani okuba nikwabadiira, handi okuba kwakera nibahola bi Sitaani adaha.

will be added

X\