TIMOTEO YOHUBIRI 1

1Ebbarwa yitula eyiri Paulo, omutume wa Kristo Yesu ohweema hu hudaha hwa Nasae, owatumwa ohuyaala obulamu bwasuubiswa buhuli nabwo alala nende Kristo Yesu. 2Eyiri Timoteo, omwaana wange muheerwa: Lehe Nasae Seefwe, nende Omwaami weefwe Yesu Kristo bahubeerese ehabi, esisa nende emireembe. 3Ndeebasa Nasae yihalaabaniranga nende omwooyo mulala, koti lu bakuuka yange bahola. Mwebasaanga buli lu hwichulisa mu hwekongooya hwange esiro nende esideete. 4Ninjichulisa amasika kao, ndekombaanga muno ohuhubonaho handi, hu mwooyo kwaange kunyale ohwiichula esangaalo. 5Njichulisa efukiirira yao nyomiifu, efukiirira yiri koti yi Loisi nguhwaao nende Yunisi maao bali nayo. Handi nyomiisa endi wesi oli nayo. 6Mani hulw'esifune sino, sakira hwichulisa onyale ohuta muhola esiyaanwa si Nasae yahubeeresa nindahwiisaho amahono. 7Olwohuba Nasae haba siyatubeeresa mwooyo w'obutiiririrwa, nae yatubeeresa mwooyo w'amaani, ow'ohudaha, nende ow'ohwefuka. 8Sakira otadirwaanga esoni ohujuliraanga Omwaami weefwe, handi kata ohujulira ese omuhalaabani wae, omuboye hulwa Kristo. Ohutusaho, ba silala naange mu husaandira Emboosi Ndai, koti lu Nasae ahubereesa amaani kahunyalisa. 9Nasae niye owatuwonia handi niye otulaanga hube abandu bae, ataali ohweema hu siindu syoosi sihwahola, nae hulw'etekeha yae, nende esisa syae syeene. Yatukwiira esisa sino ohubitira mu Kristo Yesu, esyaalo nisisisiiri ohuloongwa. 10Nae bulaanu situbwihuliirwe ohubitira muhwiicha hw'Omuwonia weefwe, Kristo Yesu. Kristo Yesu yamalao amaani k'ohufwa, mani yaleeta obulamu handi ohubitira mu Mboosi Ndai, yatuleetera obulamu butaakama. 11Nasae yanduma ohuyaala Emboosi Ndai yino koti Omutume handi Omweekesa. 12Sino nisyo esifune sikera ndasaanda endi. Nae kata katyo, siinjia hutya, olwohuba manyire omuundu yi fukiiriramo handi nyomiisa endi, achia ohuniinda bulai ohwoola lu Ludaalo olwo luchia ohwolera. 13Yomiirira hu mboosi chadyeeri chindahweekesa, koti esyohuboneraho syohoyeere ohuloonda, handi doong'a mu fukiirira nende mu hudaha bihunyoola mu bulala nende Kristo Yesu. 14Liinda ebiindu bilai bibahudiisa, niwehoonyera Mwooyo Mwolerefu oli mweefwe. 15Omanyire oti buli muundu yeesi oli mu situundu sya Asiiya kata Figeelo nende Hamogene bangabuhanaho. 16Lehe Omwaami akwiire esisa enyumba ya Onesiforo, olwohuba yasangaasa amahabi maangi muno handi esoni sichamudiira kata nindali mu mboye. 17Handi niyoola busa ati mu Roomu, yangoonya ohwoola luyanjakaana. 18Lehe Omwaami amubeerese ehabi y'ohukwiirwa esisa sy'Omwaami hu Ludaalo olwo! Olwohuba omanyire bulai esiindu siyaholera niindi mu Efeeso.

will be added

X\