BATESALONIIKA YOHUBIRI 3

1Esimaliirihayo, basyeefwe, mutusabire muti Emboosi ya Nasae yinyale ohusalaana bwaangu handi yinyoole oluyaali koti luyali mweng'we. 2Handi mutusabire muti Nasae atuwonie abasuku nende abaholi b'ebibi, olwohuba sisiri siti buli muundu yeesi ali nende efukiirira. 3Nae Omwaami mwesikwa; achia ohubabeeresa amaani, handi abakaye ohutula hu musuku. 4Handi huli abesikwa mweng'we mu Mwaami huti muli ohuhola buli siindu sihubalagira handi mucha ohwemeeda ohuhola mutyo. 5Lehe Omwaami yemerere emyooyo cheeng'we mube nende ohudaha hwa Nasae handi nende obwesimiirisi bwa Kristo. 6Basyeefwe, mu liita ly'Omwaami weefwe Yesu Kristo, hubalagira huti, mweyaabe omufukiiriri mukata yeesi otalondakana nende enjekesa yihwababeeresa. 7Olwohuba eng'we abeene mumanyire bulai muti muhoyeere ohutuboneraho engeri yihwabeekesa. Sihwali bakata nihuli mweng'we 8handi sihwalyaaho esyohulya sy'omuundu yeesi nihutatuungire. Nae hwahalaabana handi hwaholaanga nende amaani esiro nende esideete, huhaye ohusidoyera omuundu yeesi mweng'we. 9Hwahola sino nihutachiiririra huti haba sihudaha obuhoonyi bweeng'we; nae nihuchiiririra huti hube esyohuboneraho yimuli. 10Olwohuba nihwali nihuli nang'we hwababeeresa elako huti: omuundu yeesi otahola omulimo haba sahoyeere hulya. 11Huboola sino olwohuba huwulira mbwe aliwo abandi mweng'we abakata abatadaha ohuhola omulimo kwosi ohumalaho ohweyingirira busa emirimo ch'abandi. 12Muliita ly'Omwaami Yesu Kristo hubalagira handi husaba abandu b'engeri eyo batereese esaambo chaabwe, handi bachaake ohuhola emirimo hubanyale ohunyoola ebiindu bihoonya obulamu bwaabwe bweene. 13Nae eyiri eng'we basyeefwe, mutajoonga ohuholaanga ebilai. 14Omuundu yeesi oli eyo otawulira bihubaandiikira mu bbarwa yino mumwehaliirise bulai, handi, mutaholera alala nae, hu soni chimudiire. 15Nae mutamubukula koti omusuku, ohumalaho mumwekese koti omwaana weng'we. 16Lehe Omwaami mweene, okaba emireembe ababeerese emireembe endaalo choosi handi mu ngira yoosi. Omwaami abe nende buli muundu yeesi mweng'we. 17Ese Paulo nyandiika amaheeso kano nende omuhono kwaange kweene, handi aho niho ahalolero handechaanga mu bbarwa change choosi. Yino niyo engeri yinyandikiramo. 18Lehe esisa sy'Omwaami weefwe Yesu Kristo sibe nang'we mweesi.

will be added

X\