BATESALONIIKA YOHUBIRI 2

1Bulaanu basyaange, ebidiira hu hukobola hw'Omwaami weefwe Yesu Kristo nende ohwebuusa alala hw'efwe ohumubukaanira, hubekweeda, 2mutaanguyaanga ohuba nende ohukana-kana mu bibaaso byeeng'we, oba ohuba nende ohwesiinduha hulw'emboosi, oba ebibaaso, oba ebbarwa biboola biti bitula eyiri efwe, nibyomiisa biti Oludaalo lw'Omwaami lwoolere. 3Lehe omuundu yeesi atababacha mu ngeri yoosi. Olwohuba oludaalo olwo haba silwahoole ohwoola lu huyiingana huseembayo hwahabeeo mani omuundu otatya Nasae yibatekehera omuliro kutasima yahabonehane. 4Omuundu wuno achia ohuyingania handi yeniinie ohuhiraho buli syoosi esilaangwa nasaye oba esiinamirwa. Handi achia ohweniinia akulu mani yeyihase mu nyumba ya Nasae, mani yelaangirire ati niye Nasae. 5Simwichulisa muti ndababoolera bino byoosi nindali nisisiiri nang'we? 6Handi bulaanu mumanyire esiindu siri ohumukayira ohwiicha hwaanyale ohubonehana esiha syae syeene nisyoolere. 7Olwohuba amaani k'esyaama akakera abandu baahaya ohutya Nasae kamala ohuchaaka omulimo; nae omuundu okakayira ohumwolaho achia ohuhola atyo ohwoola luyahatusibwe hu ngira. 8Mani awo niwo lu muundu otatya Nasae achia ohubonehanira, yi Mwaami Yesu achia ohwiita nende omuuya kw'omuhanwa wae mani amusihirise nende ohubonehana hw'oluyaali lwae naakobola. 9Omuundu otatya Nasae oyo, achia ohwiicha nende amaani ka Sitaani, mani ahole obulolero nende ebiwukisa by'obubacha, 10nende ebibi biingi ebibachirisa ab'ohusihirira, olwohuba bahaya ohudaha obwadyeeri bwahabawoniisye. 11Mani hulw'emboosi yino, Nasae achia ohubatumira obubacha bungi, mani hubafukiirire ebitahoyera, 12mani yemewo abahengere omusango kuhire abo abatafukiirira obwadyeeri nae baasangaalira ebibi byong'ene. 13Abaheerwa b'Omwaami, huhoyera ohwebasa Nasae hulweng'we buli siha, olwohuba Nasae yabadoola muhuchaaka ati munyoole ohuwonisibwa nende amaani ka Mwooyo Mwolerefu akabalabya hulw'efukiirira yaadyeri yeng'we yimuli nayo. 14Nasae yabalaanga mu fukiirira yino nabitira mu Mboosi Ndai yihwabeekesa, ati munyoole hu luyaali lw'Omwaami weefwe Yesu Kristo. 15Sakira basyaange, mweeme bulai handi mwomiirire hu bwadyeeri buhwabeekesa, mu nomaloma nende mu bbarwa yeefwe. 16Lehe Omwaami weefwe Yesu Kristo omweene-no-mweene, alala nende Nasae Seefwe, owatuheera handi mu sisa syae yatubeeresa obwomiifu butaakama nende esuubi layi, 17alemye emyooyo cheeng'we mani ababeerese amaani k'ohuhola nende ohulomaloma buli siindu silayi syoosi.

will be added

X\