BATESALONIIKA YOHUBIRI 1

1Ebbarwa yitula eyiri Paulo, Silifwaano nende Timoteo, niyichiira abafukiiriri bali mu Tesalonia, abandu ba Nasae weefwe, nende Omwaami Yesu Kristo: 2Lehe Nasae Seefwe nende Omwaami Yesu Kristo bababeerese ehabi nende emireembe. 3Basyeefwe, huhoyeere ohwebasa Nasae hulweng'we buli siha. Silayi efwe ohwebasa hutyo olwohuba efukiirira yeng'we yemeeda niyihula muno, handi ohudaha hu buli muundu ali ninahwo eyiri owaasye hwosi hwemeedere. 4Sakira efwe fwesi huli ohubehoyeramo eyiri emikaanda ch'abafukiiriri ba Nasae chiindi. Hwemeeda ohubehoyeramo mu ngeri yimwemeedamo ohugumira mu fukiirira kata nende mwahaba nimusaandisibwa nende mu huchunisibwa hu mulimo. 5Sino nisyo esyeekesa siti, ohuheenga hw'emisaango hwa Nasae hwadyeeri, handi situliramo eng'we ohubalibwa mu bahoyera Obwaami bwa Nasae, bu muli ohusaandira. 6Olwohuba Nasae asibona ati sihoyera ohusaandia abo ababasaandia, 7handi ohutubeeresa alala nang'we obuwuluuhiro abali ohusaandisibwa, Omwaami Yesu niyahabonehane natula Mukulu alala nende malaika bae b'amaani mu muliro kwaaduha. 8Sino sichia ohuba esyohwetuunga eyiri abo abatamanyire Nasae, nende abo abatawulira Emboosi Ndai y'Omwaami Yesu. 9Bacha ohunyoola ohusaandisibwa hw'ohumalirwao elalira nibatusibwa mu moni w'Omwaami nende mu luyaali lwae lw'amaani, 10naakobola hu ludaalo olwo abereswe oluyaali mu boolerefu bae, handi yesibwemo oluyaali mwabo boosi abafukiirira olwohuba obujulisi bweng'we bwafukiirirwamo. 11Sakira hubasabira buli siha, huti Nasae weefwe ahoyeere anyale ohubahola mube abahoyera obulamu bumwalaangibwamo. Handi nende amaani kae omweene yoserese abweene buli sichiiririrwa silayi siri mu myooyo cheeng'we nende buli mulimo kumuhola ohweema hu fukiirira. 12Mu ngira yino, nimwo mu liita ly'Omwaami weefwe Yesu licha ohubeeresebwa oluyaali mweng'we, handi eng'we mwesi mucha ohunyoola oluyaali mu Mwaami Yesu, ohweema hu sisa sya Nasae weefwe nende Omwaami Yesu Kristo.

will be added

X\