EBBARWA YA PEETERO EYOHUBIRI 3

1Basyaange baheerwa, yino bulaanu niyo ebbarwa yange yohubiri yimbaandiikira. Mu bbarwa chibiri chino, teemereho ohuta mu myooyo cheeng'we embaasa ndayi nimbechulisa ebiindu bino. 2Ndaha mwichulise emboosi chi banabbi boolerefu chibalomalomaho hale, nende esilagiro situla eyiri Omwaami handi Omuwonia bi batume beeng'we bababeeresa. 3Esitaangira, muhoyeere mu manye muti, mu ndaalo chimaliirihayo chino, abandu bacha ohubaao babulamu bwaabwe bufukibwa nende ohwekoomba hwaabwe hubi. Abandu abo bacha ohubachehaanga 4handi bacha ohubateebaanga bati, “Haba siyabasuubisa ati achia ohwiicha? Nae bulaanu ali yena? Mani siyabasuubisa ohwiicha? Nae ali yena? Bakuuka yeefwe boosi bamala ohufwa hale, nae buli siindu sisisiiri busa koti lu syali ohutula hu huloongwa hw'esyaalo!” 5Baheengawo busa ohuhola koti abataamanyire bati, hale Nasae yalomaloma, mani ekulu nende esyaalo byaloongwa. Esyaalo syaloongwa ohutula mu maachi handi nende amaachi, 6handi amaachi k'ofwomboole niko akasihirisa esyaalo sihale. 7Handi nende emboosi yeene eyo, ekulu nende esyaalo, ebiriwo bulaanu, byaliindwa nende emboosi ya Nasae yeene eyo, hu binyale ohusihiriswa nende omuliro. Byaliindwa ohwoola hu ludaalo lu baholi b'ebibi bacha ohuheengerwaho omusango, mani baasihiriswa. 8Nae basyaange mutebiirira esiindu silala! Eyiri Nasae yibulayo engabuhana akati-kaati w'oludaalo lulala nende emyaaka elifu ndala; eyiri Nasae ebiindu bino byakanaakana. 9Nasae sahindaanga ohuhola esiindu siyamala ohusuubisa koti abandu bandi babaasa. Ohutusaho abesimiirisira, olwohuba haba saadaha omuundu yeesi asihiriiswe, nae adaha buli muundu anyale ohweyolobya ebibi byae. 10Nae Oludaalo lw'Omwaami lucha ohwiicha koti omwiibi. Hu Ludaalo olwo, ekulu licha ohukotao nende ohududuma hungi; ebiindu byo Mukulu bicha ohuya bisihiriswe, handi esyaalo nende ebiindu birimo byoosi bicha ohusihiriswa. 11Mani koti lu biindu bino byoosi bicha ohusihiriswa mu ngira yino, muhoyeere ohuba abandu bafwaana batye? Obulamu bw'eng'we buhoyeere ohuba obwolerefu handi obutya Nasae, 12nimusiriindiriire Oludaalo lwa Nasae, handi muteemeho ohuhola lwiicha bwaangu. Oludaalo olwo, ekulu licha ohusaambwa mani lisihiriswe, handi ebiindu biri muukulu byoosi bicha ohusanguluha hulw'obubafu. 13Nae huliinda esiindu si Nasae yasuubisa. Yasuubisa Ekulu yaaha, nende esyaalo siyaaha, yi buluungifu bucha ohumenya koti obuli mu daala lyaabwo. 14Sakira basyaange, nimusiriindire Oludaalo olwo, teemeho koti lu munyala ohuba abalafu bataaliho esibi syoosi mu moni wa Nasae, nae abali nende emireembe nae. 15Manye muti ohwesimiirisa hw'Omwaami weefwe hwekesa huti bababeeresa obweyaango bwohuwonisibwa, koti lu wasyeefwe Paulo yaheera ohubaandiikira niyehoonyera amakesi ka Nasae yamubeeresa. 16Sino nisyo syaboola mu bbarwa chae choosi naalomaloma hu siindu esyo. Biriwo ebiindu biindi mu bbarwa chae ebidinyu byohumanya bi bandu bataamanyire handi abataali abomiifu mu fukiirira beekesa bubi, koti lu bahola mu bituundu biindi by'ebyandiiko byolerefu. Mu ngeri eyo abeene beleetera ohusihirira. 17Nae eng'we, basyaange, mwamala ohumanya sino. Bulaanu mweliinde mutakosebwa nende enjekesa ch'obubacha ech'abandu baholi b'ebibi mani mwaakwa ohutula mu bwihalo bweeng'we bulai. 18Nae mwemeeda ohuhula nimuli nende esisa, nende ohumanya Omwaami handi Omuwonia weefwe, Yesu Kristo. Oluyaali lube yaali bulaanu nende endaalo choosi. Amiina.

will be added

X\