EBBARWA YA PEETERO EYOHUBIRI 2

1Nae hale abanabbi b'obubacha bosi batula mu bandu beene abo, koti bulaanu busa lu bacha ohutula mw'eng'we beene. Bacha ohuleetamo ohusihirira, baleete enjekesa y'obubacha, handi bacha ohwekaana Omwaami wabanunula, mani beleteere ohufwa bwaangu. 2Abandu bangi bacha ohuloonda engira chaabwe chiswaasa handi ohweema hu biholwa byaabwe abandu bandi bacha ohulomaloma bubi hu Ngira yaadyeri. 3Mu kuliira kwaabwe, abeekesa b'obubacha bano bacha ohubafunamo muno ohweema hu ngano chi beene beeholera. Omusaango kwaabwe kwamala ohutekehebwa ohuheengebwa hale muno, handi ohusihiriswa hwaabwe hwosi haba sihuli eyale, nae huli aambi! 4Kata Nasae hale haba siyakwiira esisa bamalaika bahola ebibi nae yabasukuna mu muliro kutaakama yibaboyerwa mu siirima nibaliindire oludaalo lw'ohuheengerwaho omusango. 5Handi Nasae haba siyakwiira esisa esyaalo sihale, nae yaleeta amaachi k'ofwomboole hu syaalo eyiri abaholi b'ebibi; nae yaawonia Nowa, owayalaanga obuluungifu nende abandu bandi bataanu-na-babiri bong'ene. 6Olwohuba Nasae yaheengera omusango ebiko bya Sodomu nende Gomora, nabisihirisa nende omuliro, mani yaabahola esyohuboneraho esicha ohuholehanaanga eyiri abaholi b'ebibi boosi. 7Olwohuba yawonia Luti omuundu mulai, owachuunirwa muno ehola mbi y'abandu batadeeba hu malako. 8Olwohuba omuundu mulai oyo yali yabamenyamo, mani buli ludaalo yachunisibwaanga mu mwooyo naabona handi nawulira ebiholwa byaabwe bibi ebyo. 9Mani sakira, Omwaami yamanya engeri y'ohuwonia abalayi batya Nasae, nabateema, nende ohuleha abaholi b'ebibi mu husaandisibwa hwaabwe ohwoola hu ludaalo lwohuheengeraho omusango, 10nende abo abomiirira mu saambo chaabwe mbolu nende obwekoombi bw'omubiri mani baalekeresa amaani ka Nasae. Abeekesa b'obubacha bano, babulaho nende esiindu sibatya, handi sibadiirwa esoni ohunyeka abandu b'oluyaali. 11Kata bamalaika bali nende amaani kahirao, haba sibaabiraangaho omusango mu moni w'Omwaami nibabanyeka. 12Nae abeekesa b'obubacha bano balomaloma bubi hu biindu bibakoteerwe elalira. Bafwaana koti esolo ndeende echitaali nende ebibaaso echidiiribwa busa mani cheetibwa; bacha ohusihiriswa koti esolo ndeende. 13Bacha ohubatuunga nende ohusaandisibwa huli koti hubasaandisiramo abandu bandi. Esangaalo lyaabwe liri mu hung'wa esideete ng'alang'ala nibasangaasa emibiri chaabwe busa. Sy'esoni muno handi sibi nibehala mu sidyaalo alala naang'we, olwo nibasangaalira mu ngira chaabwe mbi! 14Nae nende emoni chaabwe bewunja buli siindu nende obucheke mani bekoomba buli muundu yibabona. Obwekoombi bwaabwe bw'ohuhola ebibi haba sihuyenjeera. Bakwiisa abandu bakata mu muteego handi baheera ohuhola ebiindu by'okuliira. Bali koti abandu ba Nasae yamala ohuholimira! 15Baleha engira nungifu, mani baakota nibadiirire engira yi Bbalamu, omwaana wa Bboweeri yi yaloonda, owali niyaheera eseende chanyoola hulwohuhola ebibi, 16mani yolobisibwa hulw'esibi syae. Nae esuhiri yitalomaloma yamulomalomera mu kono ly'omuundu niyimuolobya hulw'ebiholwa byae by'elalu. 17Abandu bano bali busa koti esulo chahama, handi koti amaleesi ka muyaka kuwuucha; Nasae yababiihira esifwo syaabwe mu siirima sihiramo. 18Beehonyera emboosi ch'obusiru handi ech'ohwefumia, handi beehoonyera obwekoombi bw'emibiri chaabwe ohuteka abandu bahachaakira ohwetusa hu bandu bali mungira mbi echileeta ohusihiriswa. 19Babasuubisa edeembe, nae abeene badoong'a nibali ababoye mu saambo chisihirisa, olwohuba efwe huba ababoye babuli siindu siba nisyatutuka. 20Nisiri siti abandu bamala ohweyiba ohutula hu maani k'esyaalo kaleeta ohufwa, mani baamanya Omwaami handi Omuwonia weefwe Yesu Kristo mani baakaluuhana baanda handi mu maani ako handi kaabatuka. Abandu abo baba bacha ohuba mu bulamu bubi ohuhira bubalimo munjaako. 21Syahabeere esilai muno yi bali baaba nibatamanya engira y'obuluungifu, ohuhira ohumanya engira eyo, nae handi baleha amalako moolerefu ka bababeeresa. 22Esiindu syabeeholehaho syekesa siti engaado chino chadyeeri, “Embwa yikobola yahoomba handi ebiindu biyisalire” nende “Embiichi yookerwe yikobola yefuufula handi mu madosi.”

will be added

X\