ABAKOLIITI YOHUBIRI 9

1Sisihoyeere ese mbandiikire ebidiira hu huhoonya aboolerefu, 2olwohuba manyire obwetekefu bweeng'we, bumbesungiramo eyiri abandu abe Makedonia, nimboola endi Akaia syali esyetekefu ohutula omwaaka kuweere; handi ohumaliirira hweeng'we hubasangaasire muno. 3Nae bulaanu ndi ohubatumira abaasyeefwe bano hu hubesungiramo hweefwe huhaye ohuba ohwebihaya, hu munyale ohuba abetekefu, koti lundaboola endi mucha ohuba nimuli abetekefu. 4ataali awo, niinjicha nende Abamakedoniya bandi, mani hwanyoola nimutaali abetefu, huba hucha ohuswaala mani hubulwe esy'ohulomaloma olwohuba hubesika muno. 5Sakira mbaasire endi silayi muno ohutuma abaasyeefwe bano bataangire ohwiicha yimuli, mutekehe nibusisiiri esiyaanwa sino simwalaka, husinyale ohuba esiyaanwa sitekehe esitula muhudaha hweeng'we ataali ohuyiikwa. 6Sino nisyo siindi ohuboola: oyo otaaka nakekeresa, yahakese nakekeresa. Nae oyo otaaka naatakekeresa, yahakese mu bungi. 7Buli muundu ahoyeere ohuhola koti lwaba naheengereo mu mwooyo kwae, ataali ohwekanyiisa, oba ohuyiikwa, olwohuba Nasae adaha omuundu okaba nende esangaalo. 8Handi Nasae ali nende obunyala bw'ohubabeeresa ehabi choosi mu bungi, hu munyale buli siha ohuba nende ebiindu byoosi bimudaha handi humunyale ohukaba mu bungi hulwabuli mulimo mulai. 9Koti lusyandiikwa siti, “Akaba abamanani naatakekeresa; obuluungifu bwae buyiindira endaalo choosi.” 10Oyo obeeresa omuwaanyi emwo, nende ebiindu byohulya, achia ohubabeeresa handi ameede efuni yeeng'we handi ameede ekesa ly'obuluungifu bweeng'we. 11Mucha ohugagayaswa mu buli ngeri hulw'obukabi bulai bweeng'we, obuchia ohukera hwebase Nasae. 12Olwohuba omulimo kuno sikuhoonya aboolerefu bong'ene nae kukera hwebasa Nasae muno. 13Nimuhola muti, mucha ohubeeresa Nasae oluyaali olw'obuwulisi bweeng'we muhufukiirira emboosi ndayi ya Kristo, handi hulw'obukabi bweeng'we bulai, bumubabeeresa nende bumubeeresa abandu bandi boosi; 14bacha ohubekoomba mani babekongooyere eyiri Nasae, hulw'esisa siingi sya Nasae siingi esibalimo. 15Lehe hwebase Nasae hulw'esiyaanwa syae sibitiirifu!

will be added

X\