ABAKOLIITI YOHUBIRI 8

1Hudaha mumanye, basyeefwe, ebidiira hu sisa sya Nasae syekeswa mu mikaanda ch'abafukiiriri echiri mu Makedonia, 2olwohuba nibali nibali mu huhemebwa hululu muno, esangaalo lyaabwe bitiirifu nende obumanani bwaabwe bubitiirifu byabonehera mu hukaba hwaabwe. 3Olwohuba bakaba ohweema hu funi yaabwe koti yalichingi, koti lweese nyala ohuboola, handi ohubita efuni yaabwe koti yalichingi, ohweema hu hudaha hwaabwe abeene, 4nibatwekweedera elalira ohufukiirirwa ohubaaho nende sibahola esidiira hu buhoonyi buchiira abolerefu 5mani sino, ohuhira koti luhwali nihubaasa, nae muhutaangira bewaayo abeene eyiri Omwaami mani hubewaayo eyiri efwe, mu hudaha hwa Nasae. 6Abweene awo hwecha hwekweeda Tiito huti koti luyali naamalire ohuchaaka ohuhola, ahoyeere lwosi ohumaliirisa omulimo mulai kuno. 7Bulaanu koti lumuli ohuholaanga nimubitiirisa esikero, -- mu fukiirira, mu hulomaloma, mu bumanyirifu, mu bwesikwa bwoosi, handi nende mu hutudaha hweeng'we--mubone muti muhola mwabitiirisa nende mu mulimo mulai kuno kwosi. 8Mboola sino ataali koti esilagiro, nae ohwomiisa obuluungifu bw'abandu bandi endi ohudaha hweeng'we hwosi n'ohwobwadyeeri. 9Olwohuba mumanyire esisa sy'Omwaami weefwe Yesu Kristo, mbwe kata niyali omunyali, kata katyo hulweng'we yehola yaaba omumanani, hu hubitira mu bumanani bwae munyale ohwehola abanyali. 10Mani mu siindu sino, ndi ohukeraka endi: silayi muno hulweng'we ohumaliirisa esyo simwachaaka ohuhola nende ohubaasa ohuhola omwaaka omulaamba kubitire, 11hu bulaanu obwetekefu bweeng'we muhudaha ohusihola, hwahanyala hwachiana nende ohusimaliirisa nende ebyo bimuba nimuli ninabyo. 12Olwohuba obwetekefu ohuhola nibuba nibuliwo, hufukiirirwa ohweema hu biindu bi buli muundu aaba ali nabyo, ataali ohweema hubyataali nabyo. 13Haba siindi huboola endi hulweesyo mani abandu bandi banguyisirwe nae abandi basidoyerwa busa, 14nae endi, muhwakaniakania, obuungi bw'ebiindu bimuli nabyo esiha sino, bihoyeere ohuba nibinyala ohubahoonya bibaba nibadaha, hu bulaanu obuungi bw'ebiindu byaabwe byosi binyale ohuhoonya obudahano bweeng'we lunyuma, hwabeeo ohwakanirisa hulai. 15Koti lusyandiikwa siti, “Oyo owakesa ebiingi haba siyaliho nende ebiindi biyadoong'ia, handi oyo owakesa ebidiidi haba siyali nende siyekoomba.” 16Nae Nasae yebasibwe oyo otechaanga obuliindi bwenyehana mu myooyo cheeng'we hu lwa Tiito. 17Olwohuba haba siyafukiirira omulaanga kweefwe kwong'ene, nae olwohuba omweene yesi yali omuundu mulungifu, mbawo yeecha yimuli mu hudaha hwae busa. 18Alala nae mbawo hucha ohubatumira omusyaani weefwe mumanyirifu muno mu mikaanda ch'abafukiiriri miingi choosi hulwohuyaala emboosi ndayi hwae; 19nae handi haba sineebyo byong'ene, nae yalondeebwe nende emikaanda ch'abafukiiriri miingi ohukeenda naafwe mu mulimo kw'oluyaali kuno kuhuli ohuhola, hulw'oluyaali lw'Omwaami handi nende ohweekesa obulayi bw'emyooyo cheefwe. 20Huli ohudaha huti omuundu yeesi atatwolobya hulw'omulimo kw'ohwewaayo kuno kuhuli ohwoseresaanga, 21olwohuba efwe huchiiririra ohuhola esiindu esy'oluyaali ataali mu moni w'Omwaami yeng'ene, nae mu moni w'abandu mwosi. 22Mani mbawo huli ohubatumira abaasyefwe beecha alala nabo, bahwamala ohuteemaho muno handi nihwamala ohubanyoola ohuba abandu beesikwa ohuhiraho abandi boosi, hulw'ohubesika hwae hungi muno. 23Nae Tiito, omuhalaabani wasyaange, yi hubahalaabanira nae; nae abaasyefwe abo nibo bawamwaanda b'abafukiiriri, oluyaali lwa Kristo. 24Mani mwekese ohudaha hweeng'we eyiri abafukiiriri nende ohubesungiramo hweefwe yibali.

will be added

X\