ABAKOLIITI YOHUBIRI 7

1Koti luhuli nende ebisuubise bino, baheerwa, mulehe hweyoseho buli sibi sy'omubiri nende esy'omwooyo, mani huhole obwolerefu bwoolerere mu hutya Nasae. 2Mutwikulire emyooyo cheeng'we; haba sihwakoseraho omuundu yeesi, haba sihwanyaasaho omuundu yeesi, haba sihwahosesaho buhaya omuundu yeesi. 3Haba siindi huboola bino ohubanenya, olwohuba ese malire ohuboola hale endi eng'we muli mu myooyo cheefwe, oba hufwiira alala, oba humenya alala. 4Ndi nende obwomiifu bubitiirifu mweng'we; mbesuungiramo muno; ndalemesebwa omwooyo muno. Alala nende ohuchuunisibwa hweefwe ohwo, ndi nende esangaalo ebitiirifu. 5Olwohuba kata nende nihweecha mu Makedonia, emibiri cheefwe haba sichawuluuhaho daawe, nae chachuunisibwaanga buli luwaande--ohulwaanakana erwaanyi, nae obuti mukati. 6Nae Nasae, oyo olemya emyooyo ch'abandu belalihiriire, yatulemya emyooyo nende ohwiicha hwa Tiito, 7nae handi haba sihwiicha hwae hwong'ene, nae nende ohulemesebwa omwooyo humwali nimumulemeesye, koti luyatuboolera hu hwekoomba hweeng'we, ohulira hweeng'we, ohufwiira humufwiira, ohwoola lu ndemeeda ohusangaala handi ohubitiiririra. 8Mani kata nimba nindabelalihirisa nende ebbarwa yange, haba siindi hwesiinduha haba daawe, (kata nende nindesiinduha) olwohuba ndi ohubona endi ebbarwa eyo yabanyoolesa muno, kata nende niyahola yityo hulw'esiha esidiidi muno. 9Nae koti lu siri, ese naange sangaala busa, ataali mbwe mwanyoolera, nae olwohuba mwanyoolesebwa ohwoola muhweyolobya; olwohuba mwawulira ohunyoolera hw'omwooyo, mani haba sisiriwo simwafwiirwa ohutula hweefwe daawe. 10Olwohuba ohunyoolera hw'omwooyo hwibulaanga ohweyolobya hwoosa omuundu hu buwonia, mani haba sihuleeta ohwesiinduha hwoosi daawe, nae ohunyoolera hw'esyaalo hwibulaanga ohufwa. 11Olwohuba muboneho obwadyeeri bweene bu hunyoolera hw'omwooyo hwibuule mweng'we, maofu siina akadaha mwetereese abene, hwesisinia siina, luwungu siina, maofu siina, hufwiira siina, ohuboneresebwa siina! Hu buli mboosi yoosi, mwanyala ohwewosaho nende ohwekesera elalira koti lumutaaliho abakosefu mu siindu syoosi. 12Mani kata nende nindabandiikira, haba sibyali nibyeemere hw'oyo owali niiholere esibi, kata haba sihweema hw'oyo owanyaaliha ohutula hu sibi esyo, nae byali huhutufwiira hweeng'we hweemeo hubonehane yimuli mu moni wa Nasae. 13Mani sakira efwe hulemesebwe emyooyo. Nae handi notulire hu hulemesebwa emyooyo hweefwe, hwasangaala handi muno hu sangaalo lya Tiito, olwohuba ebibaaso byae byamalire ohunyalirwa ohuwuluuha nang'we mweesi. 14Olwohuba kata nende nindamweekesa ohubewuliirimo hwange, haba sibyaswaasa daawe; nae koti busa buli siindu sihwalomaloma hweeng'we syali esyadyeeri, nilwo luhwesiima hweefwe mu moni wa Tiito hwosi hwamanyisibwa ohuba nihwali ohwadyeeri. 15Handi omwooyo kwae kusiimutulamo nikwiicha yimuli handi muno, niyechulisa obuwulisi bweeng'we mweesi, handi nende ohutya nende ohutengereha humwamubukaanira nahwo. 16Ese sangaala busa olwohuba ndi nende obwomiifu bweene mweng'we.

will be added

X\