ABAKOLIITI YOHUBIRI 5

1Olwohuba efwe humanyire huti, nikali mbwe esikaali sy'ohusyaalo sihumenyeremo nisyahasihiirisiibwe, huli nende enyumba yene eyitula eyiri Nasae, enyumba eyitaholebwa nende amahono, nae eyiri akulu Mukulu. 2Abweene ano hubiinduha busa, nihwekoomba ohwefwaala obumenyo bweefwe bw'omu Kulu, 3hu nihuba nihubwefwaalire, hu huhaye ohunyoolehana nihuli syekenye. 4Olwohuba nihuba nihusisiiri mu sikaali sino, hwayuuya nihuli nende sihudaha huhole; ataali mbwe hunyala hwafwaalulwa, nae mbwe hwahahoyeere ohufwaalwa ebihiraho awo, hu bulaanu esyo esiba nisiri esiwaao, sinyale ohumiribwa nende obulamu. 5Oyo owatutekehera esiindu syeene sino niye Nasae, oyo owatuberesa Mwooyo oyo ohuba esyomiisa. 6Mani sakira efwe hwamenya nihuli ohwomiira hulai; humanyire huti kata nihuba nihuli ango mu mubiri, huli eyale ohutula eyiri Omwaami, 7olwohuba efwe hukeenda nende efukiirira haya haba sihukeenda nende ebibonehana. 8Huli nende ohwomiira hulai, mani handi syahabeere esilai nihwahabeere nihuli eyale ohutula hu mubiri nae hwaaba ango nende Omwaami. 9Mani sakira kata nihuba nihuli ango oba eyale, esichiiririrwa syeefwe siba ohumusangaasa. 10Olwohuba fweesi huhoyeere ohuchia mu moni w'esisaala sy'ohuheengeraho emisango esya Kristo, hu bulaanu buli muundu anyale ohunyoola ebilai oba ebibi, ohweema hw'esyo syaaba niyahola naali mu mubiri. 11Mani sakira, nihuba nihumanyire ohutya Omwaami, hu serera abandu; nae esyo abeene sihuli simanyihaane nende Nasae, handi suubira endi syosi syamanyihana mu bibaaso byeeng'we. 12Haba sihuli ohwesiimira hweeng'we handi, nae huli ohubabechaanga esifune esyohweninisirya hweefwe, hu mweemeo munyale ohukobola mwabo abali ohwewuliraanga abeene ohweema hu sifwo sy'omuundu nae haba sihweema hu mwooyo kwae. 13Olwohuba nikali mbwe huli abalalu, mani ni hulwa Nasae; nae nikali mbwe huli mu bibaaso byeefwe bilai, ni hu lweng'we. 14Olwohuba ohudaha hwa Kristo nihwo ohutufuka, olwohuba efwe hwamala ohumanya huti, omuundu mulala yafwiira abandu boosi; mani abandu boosi hane bafwa hale. 15Mani yafwiira abandu boosi, hu bulaanu abo boosi ababa nibali abalamu bahoyeere obutabaao handi hulwaabwe abeene, nae hulwae oyo ohweema hulwobulai bwaabwe, yafwa mani yaasyuhiswa. 16Mani ohutula olwaleero ohuchia mu moni, abulao omuundu yeesi yihwewunja koti abandu; kata nende hale hwewunjaanga Kristo koti omuundu, haba sihusiimwewunja hutyo handi. 17Mani sakira omuundu yeesi naaba naali mu Kristo, aaba ali esiloonge siyaaha; esihale siba syamala ohuwaao, boneho, esiyaaha simalire ohwiicha. 18Bino byoosi bitula eyiri Nasae, ohubitira mu Kristo owatusaasania nae omweene mani yatubeeresa obuhalaabani bw'ohusasania; 19esyo nisyo mbwe, mu Kristo Nasae yali naali ohusasanianga esyaalo nende omweene, natababaliraho ebibi byaabwe, handi natudiisa emboosi eyohusaasania. 20Mani sakira efwe huli bawamwaanda ba Kristo, Nasae niyoobba omulaanga nabirisira mweefwe. Hubekweeda hulwa Kristo, musasanie nende Nasae. 21Olwohuba hulweefwe, yamuhola yaaba esibi otaholaho esibi syoosi, hubulaanu ohubitira mu mweene oyo, hu nyale ohwehola obuluungifu bwa Nasae.

will be added

X\