ABAKOLIITI YOHUBIRI 4

1Mani sakira nihuba nihuli nende obuhalaabani buno ohweema hu sisa sya Nasae, haba sihuwaamo omwooyo daawe. 2Hwamala ohwebwaaba ebiindu by'esoni byoosi, nende engira ch'ebyaama choosi; hukaana ohuhola eby'obubacha byoosi oba ohuteemaho ohuchuusa emboosi ya Nasae, nae ohubitira mu nomaloma njahaahu y'obwadyeeri, hucha ohwesiimira mu bibaaso byabuli muundu mu moni wa Nasae. 3Handi kata nende emboosi ndayi yeefwe niyiba niyebwiihaho esitaambaya, yiba yebwiihaho eyiri abo bong'ene abacha ohusihirira. 4Mu mbaasa yaabwe nasaye w'esyaalo sino yamala ohuwofusa ebibaaso by'abatafukiirira, hwaabakayiire ohunyala ohubona obulafu bw'emboosi ndayi ey'oluyaali lwa Kristo, oli efwaani ya Nasae. 5Olwohuba esyo sihuyaala haba sinisyo efwe abeene, nae ni Yesu Kristo koti Omwaami, nende efwe beene koti abahalaabani beeng'we hulwa Yesu. 6Olwohuba ni Nasae mweene niye owaboola ati, “Lehe obulafu bwaaduhe mu siirima,” oyo owaaduha mu myooyo cheefwe ohubeeresa obulafu bw'ohumanya oluyaali lwa Nasae mu bweeni bwa Kristo. 7Nae efwe huli nende obunyali buno mu bibiihiro by'eloba, ohweekesa mbwe amaani k'akulu ka Nasae nae haba sikeefwe daawe. 8Efwe huchunisibwa mu buli ngeri yoosi, nae haba sihunyoobolwanga daawe; hudondobanisibwa, nae haba sihukatayala; 9husaandisibwa, nae haba sihulehebwa; hubbwa aasi, nae haba sihusihirisibwa elalira; 10buli siha nihukiingire mu mibiri cheefwe ohufwa hwa Yesu, hu bulamu bwa Yesu bunyale ohubonehanira mu mibiri cheefwe. 11Olwohuba kata nende nihuba nihuli abalamu, buli siha huteebwa mu hufwa hulwa Yesu, hu bulaanu obulamu bwa Yesu bunyale ohubonehera mu mibiri cheefwe chifwa chino. 12Sakira ohufwa huli humulimo mweefwe, nae obulamu buli mweng'we. 13Koti luhuli nende mwooyo w'efukiirira, koti y'oyo owandiika ati, “Ndafukiirira, mani nilwo lu ndalomaloma,” fwesi hutyo hufukiirira, mani nilwo lu hulomaloma, 14nihumanyire huti oyo owasyuusa Omwaami Yesu, achia ohutusyuusa fwesi alala nende Yesu mani atuleete alala nang'we mu moni wae. 15Olwohuba bino byoosi biri bityo hulweeng'we, hu bulaanu koti lu sisi sisuda nisyoola hu bandu bangi, sihoyeere ohumeeda ohwebasaanga, hulw'oluyaali lwa Nasae. 16Mani sakira efwe haba sihuwaamo omwooyo daawe. Kata nende obulamu bweefwe bw'ohumukulu aabwahaba nibuli ohuweerera, obulamu bweefwe bw'omukati, buli ohukaluhanisibwaanga obuyaaha buli ludaalo. 17Olwohuba obuchuuni budiidi obw'esiha sidiidi sino, buli ohututekehera obusito bungi obw'oluyaali lutaakama oluhira ohukeraanisibwaho esiindu syoosi, 18olwohuba efwe haba sihwewunjire bibonehana, nae hwewunjire ebiindu bitabonehana; olwohuba ebiindi bibonehana biwaao, nae ebiindu bitabonehana haba sibiwaao.

will be added

X\