ABAKOLIITI YOHUBIRI 3

1Mani huchaakire ohwefumia abeene handi? Oba mani hweenya, koti lu bandi bahola, ebbarwa chitusiima yimuli, oba ohutula yimuli? 2Ngandi eng'we abeene muli ebbarwa cheefwe chitusiima, echandiikwa mu myooyo cheeng'we, huchimanyihane, handi chisomebwe nende abandu boosi; 3nihaandi mweekesa muti muli ebbarwa yitula eyiri Kristo eyaleetebwa naafwe, niyitandiikibwa nende obuwiino, nae nende Mwooyo wa Nasae mulamu, ataali hu makina ak'amakina nae hu makina ak'emyooyo ch'abandu. 4Obwo nibwo obwomiifu buhuli nabwo mu Nasae ohubitira mu Kristo. 5Ataali mbwe efwe abeene huli abanyala hulweefwe ohuboola huti hunyala ohuhola esiindu syoosi; obunyala bweefwe butula eyiri Nasae, 6owatuhola hwaaba abanyala ohuba abahalaabani ab'Embuliirisania njiaha, eyitaali mu bwandiike nae eyiri Mwooyo; olwohuba obwandiike bwiita, nae Mwooyo akaba obulamu. 7Bulaanu nikali mbwe esileeta ohufwa, syasaatwa mu nukuta hu kina, syeecha nende oluyaali olwakera Abayisirayiri sibanyalaanga hutingaala hu bweeni bwa Musa, hulw'ohumesa-mesana, koti lusyafwiiriraanga, 8esileeta Mwooyo haba sisichia huba nende oluyaali luhiraho olwo? 9Olwohuba nikali mbwe aliwo oluyaali mu sileeta ohuheengerwa omusango ohubahira, esileeta obuluungifu siba sihoyeere ohuba esihira muno esyo oluyaali. 10Mubwadyeeri bweene, mu ngeri yino, esyo esyaliho nende oluyaali luhoongo lwakiire awo, lwiichire lwahaya ohubaaho nende oluyaali kata budiidi, hulw'oluyaali luba niluluhira eyale. 11Olwohuba nikali mbwe esyo esyabbuuruha syeecha nende oluyaali lwakiire awo, mani esyo esitaliwao siba sihoyeere ohuba nende oluyaali luhirira elalira olwo. 12Mani koti luhuli nende esuubi lifwaana lityo, sakira huli abasimbiifu muno, 13ataali koti Musa, oyo owatechaanga esitaambaya hu bweene bwae hu Bayisirayiri bahaye ohubona enjakamo y'oluyaali lufwiiririra. 14Nae ebibaaso byaabwe byahandaangwa; olwohuba kata ohwoolera elalira bulaanu buti, nibasoma Embuliirisania Hale, esitaambaya syeene sira sidoong'a busa nisitafunuulwe, olwohuba ni ohubitira mu Kristo yeng'ene yisinyala ohutusibwayo. 15Eee, naleero luno Musa nasomebwa, esitaambaya sikona busa hu bibaaso byaabwe; 16nae omuundu yeesi naakaluhaana eyiri Omwaami, esitaambaya esyo situsibwaangaho. 17Bulaanu Omwaami oyo niye Mwooyo, mani eyo yoosi yi Mwooyo w'Omwaami aaba, yibaayo obulehuule. 18Mani efwe fweesi nihuli nende obweeni butaabwiihirwe, hubona oluyaali lw'Omwaami, mani hwakaluuhanisibwa mu hufwaana hwae ohutula hu diguri ndala ey'oluyaali ohuchia hu yindi; olwohuba sino siicha nisitula eyiri Omwaami oyo oli Mwooyo.

will be added

X\