ABAKOLIITI YOHUBIRI 13

1Lino bulaanu nilyo ehabi lyohudatu niinjicha yimuli. Omusaango kwoosi kuhoyeere ohwomiiswa nikuli nende abajulisi babiri oba badatu. 2Nidali nang'we ehabi lyohubiri, ndalabula abo abahola ebibi hale alala nende abandi boosi, handi bulaanu mbalabula nitaali nang'we, mani niinjicha handi abulewo omuundu yeesi yindeheramo. 3Mbao mudaha ohubona esyomiisa siti Kristo alomalomera mwese. Kristo oyo haba simukata naaholegana nang'we ohumalaho yekesa amaani kae mweng'we. 4Olwohuba mu bukata yahomererwa, nae aliwo omulamu hulw'amaani ka Nasae. Olwohuba efwe fwesi huli abakata mu Kristo, nae muhuholegana nang'we hucha ohuba abalamu nae hulw'amaani ka Nasae. 5Buli muundu yehebere, abone oba musyomiirire hu fukiirira yeng'we. Mwekesemo abeene. Haba simubona muti Yesu Kristo ali mweng'we? -- Ohutusaho nga bibahayiire elalira ohwekesamo! 6Suubira endi mucha ohubona muti haba sibituhaire. 7Nae hwekongooya Nasae huti mutaholaho obubi--ataali ohudaha ohweyekesa huti hwahola bulai, ohutusaho eng'we muhole esihoyera, kata nende nihubonehana koti bibyahaya. 8Olwohuba sihunyala ohuhola esiindu syoosi esiyingania obwadyeeri ohutusaho huhola ohulwanirira obwadyeeri. 9Efwe husangaala nihuba abakata nae eng'we nimuba abamaani. Sihubekongooyera eyiri Nasae nihwo ohuhula-hulana hweeng'we. 10Nyandiika bino nisisiiri ohwiicha yimuli, mani nimba niinjichire, haye ohuba omwaalaba nindehoonyera obunyala bu Mwaami yambeeresa obwohwombaha obutaali obwohulikula. 11Mani basyaange esimaliirihayo, nisyo ohubaseebula. Tereese obulamu bweeng'we, diire amaliro kange, fukiirisanie abeene-na-beene, menye nende emireembe, mani Nasae w'obuheeri nende emireembe achia ohuba nang'we. 12Heesanie abeene-na-beene nimukwiichana mu birifu nimweekesa ohudahana hweeng'we. 13Aboolerefu boosi babaheesa. 14Esisa sy'Omwaami Yesu Kristo, nende ohudaha hwa Nasae nende ohuholera alala hwa Mwooyo Mwolerefu, bibe nang'we mweesi.

will be added

X\