ABAKOLIITI YOHUBIRI 12

1Hoyeere ohwefumia; kata katyo abulao engaanga yinyoolamo. Nae njia ohulomaloma hu huboneherwa nende ohubwiihulirwa hw'Omwaami. 2Manyire omufukiiri wundi yi myaka ehumi nende chine chibitire, owayiribwa mu kulu ly'ohudatu--siimanyire oba yayirwa nende omubiri kwae, oba haba, Nasae niye omanyire. 3Handi manyire endi omuundu wuno yeecha yayiribwa mu sifwo sy'ohwehoyeramo--siimanyire oba yayiribwa nende omubiri kwae, oba haba, Nasae niye omanyire 4mani yawulira ebiindu bitahalomwalomwa, bi muundu atahanyala ohutuumbula. 5Hulw'omuundu wuno, njia ohwefumia, nae hulwaange omweene haba siinjia hwefumia, ohutusaho njia ohwefumia mu biindu byeekesa obukata bwaange. 6Kata nindahadahire ohwefumia, sindahabeere musiru, olwohuba mba njia ohulomaloma obwadyeeri. Nae hasyekaane, hu bulaanu omuundu yeesi ahaye ohubaasa ati hira biyambonamo oba byawulira nimboola. 7Nae ohungayira ohweniinia hulw'ohubwiihulirwa hungi hundanyoola, ndafumitwa ewaaya mu mubiri, wamwaanda wa Sitaani ohunjuunia, yanjakamie ohweniinia muno. 8Ndekweeda Omwaami amahabi kadatu endi esiindu sino sihoyeere siinduleho; 9nae yamboolera ati, “esisa syaange sihumala, olwohuba amaani kange kabonehera elalira mu bukata bwao.” Njia ohwemeeda ohweniinia mu bukata bwaange, hu maani ka Kristo kanyale ohumbaaho. 10Mani hulwa Kristo, bulaanu sangaalira obukata, ohunyekwa, obudinyu, ohusaandisibwa, nende ebidinyu bikabuhaane; olwohuba nimba omukata awo niwo yimbeera owa amaani. 11Mbao ndeehola koti omuundu musiru! Handi ning'we abakera ndaaba endyo. Olwohuba niing'we abali bahoyeere ohusiima. Olwohuba ndali ninjaaka busa nende abatume bandi, andahaba nitahoyera. 12Obulolero bw'omutume w'adyeeri bwaholerwa nende ohwesimiirisa hungi mweng'we, nibibonehera mu bulolero, mu byaamaya nende emirimo ch'amaani. 13Siina syeene simutanyoola sibafukiiriri bandi banyoola, ohutusaho mbwe ese omweene haba sindadaha ohubadwiiha omukuku kwoosi? Mani mundeheremo mu sisobyo sino! 14Mbano ndi omwetekefu ohwiicha yimuli ehabi lyohudatu. Mani haba siinjia huba omukuku yimuli, olwohuba singoonya ebiindu bimuli nabyo ohutusaho eng'we abeene; olwohuba abana haba sibahoyeere ohuhalaabanira abebusi nae abebusi nibo abahalaabanira abana baabwe. 15Njia ohusangaala nindehoonyera buli siindu syoosi siindi nasyo, kata omweene ohwewaayo ohuwonia emyooyo cheeng'we. Mani nimbadaha muno, nise oba hoyera ohutadahibwa mu ngeri nasilala eyo? 16Mumanyire muti ese haba sindali mukuku yimuli, nae muboola muti ndali omubalabalanu, ndaabateka mani ndabawambia. 17Mwaabo bandabatumira aliwo yeesi yindehonyera ohubatusaho esiindu? 18Ndekweeda Tiito ohwiicha yimuli, mani ndamutuma nende omufukiiriri waasye. Mani Tiito yabatusahooho esiindu syoosi? Siyahola busa koti lweese ndahola? Haba sihweyira busa mu ngeri nasilala? 19Mubereenge nimusibaasa ebiha ebyo byoosi muti efwe huli ohudebaanga hu bulamu bwefwe abeene mu moni weng'we? Mu moni wa Nasae, hubeere nihulomaloma ebiindu bino mu liita lya Kristo handi byoosi hulwohwombaha eng'we abaheerwa. 20Olwohuba ndi ohutya endi nyala ohwiicha mani ndabakaana nimutaali koti lundaha handi mwanjakaana koti lumutadaha; handi awundi wabaao ohusoolana, ehali-hali, etima, omutoolyo, obulekeresani, ohumoonyana, ohwehuduumbasa, nende ohuchokaana. 21Handi ndi ohutya endi niinjicha handi Nasae wange achia ohunoongoyasa mu moni weng'we, handi nyala ndaalira hulw'abandu bangi abahola ebibi mani bahaya ohweyolobya eby'obucheke, obuyirani, nende obwekoombi bubahola.

will be added

X\