ABAKOLIITI YOHUBIRI 11

1Ndahadahire mwandesimiirisaho mu busiru bwaange budiidi buno! Mundesimiirise! 2Mbawulirira ehali-hali ly'omwooyo, olwohuba nise owabaanjula eyiri Kristo ohubataayo nimuli koti abagole bachwenufu eyiri omusaacha wae yeng'ene. 3Nae ndi nende obuti endi koti lu ndemo yabachirisa Efa nende obukodyo bwae, ebibaaso by'eng'we bicha ohukosebwa ohutula hu hudaha Kristo hwadyeeri, handi ohuchwenufu. 4Olwohuba omuundu wundi niyeecha mani yayaala Yesu wundi ohutula hwoyo yihwa yaala, oba nimunyoola mwooyo okabuhaane nende oyo yimwanyoola, oba nimufukiirira emboosi ndayi yikabuhaane nende eyo yimwafukiirira, munyala mwayikwiiraho amawofu maangi muno. 5Ese mbaasa endi haba siindiho kata budiidi owa aasi muno niwungeraania nende abatume bandi bano. 6Kata nende nitaali omumanyirifu muno muhulomaloma bulai, haba siindi endyo mu makesi; olwohuba mu buli ngeri yoosi, huteemereho ohubeekesera alafu hutyo mu buli siindu syoosi. 7Hane ndahola esibi muhweyisa aasi humunyale ohuniinisibwa, koti lundayalaanga emboosi ndayi ya Nasae nimutanduunga esiindu syoosi? 8Hane ndanyakanga abafukiiriri bandi koti lundabatusaangaho obuhoonyi ohubahoonya? 9Handi koti lundalichiingi niindi nang'we, handi nimbula ebiindu bindehoonyera, nitasidoyeraanga omuundu yeesi, koti lubiindu bindehoonyeraanga byatulaanga busa mu basyaange batula mu Makedonia. Nilwo lundahaya handi nilwo lunja ohuhaya ohubadwiiha omukuku mu ngeri choosi. 10Koti lu bwadyeeri bwa Kristo bundimo, ohwefumia hwange huno haba sihuchia ohukayirwa mu syaalo sya Akaia syoosi. 11Handi husiina? Olwohuba mbwe haba simbadaha kose? Nasae amanyire ati mbadaha! 12Mani esyo siindi ohuhola, njia ohwemeeda ohusihola, hu nyale ohuchalaasa enomanoma y'abandu bahadahire ohuboola bati, mu buhalaabani bwaabwe bw'ohwefumia obwo, bahalaabanira mu luyaali lwaakana nende lu fwesi huhalaabaniramo. 13Olwohuba abandu bafwaana batyo bali abatume b'obubacha, abahosi babacha, abali ohwehola ohufwaana koti abatume ba Kristo busa. 14Ataali ohukana-kana, Sitaani yesi yeholaanga afwaana koti malaika w'obulafu. 15Mani haba sisikeni eyiri abahalaabani bae bosi ohwehola bafwaana koti abahalaabani b'obuluungifu. Enjakamo yaabwe yicha ohufwaanana nende ebiholwa byaabwe. 16Ndi ohuloondamo endi, lehe omuundu yeesi atabasaangaho ati ese ndi omusiru; nae kata numuhola mutyo, mani munjire koti omuundu musiru, hu syesi nyale ohwefumiaho budiidi. 17(Siina syeene siindi ohuboola? Simboola nende obunyala bw'Omwaami nae mboola koti omusiru, mu hwesiima hwange hwomiifu huno; 18koti lu bandi bali ohwefumianga hu biindu by'omusyaalo, mani syesi njia ohwefumia.) 19Olwohuba musangaalira muno ohwesimiirisira abasiru, kata nende abeene nimuli abakesi! 20Olwohuba eng'we mwesimiirisira omuundu obahola mwaba koti abawaambe bae, oba obalya, oba obahosesa bihaya, oba obalekeresa, oba obapaama mu moni. 21Esoni chindiira ohuboola endi, efwe hane hwali abakata muno abatahoyera ohuholerwa batyo! Nae esiindu syoosi si muundu yeesi achia ohuteemaho ohwesiimiraho--Nomaloma koti omusiru--syesi njia ohwenyiira ohwesiimira hu syeene esyo. 22Bayudaaya nibo, kose? Syesi nilwo lundi. Bayisirayiri nibo, kose? Syesi nilwo lundi. Beechuhulu ba Yibbulaimu, kose? Syesi nilwo lundi. 23Bahalaabani ba Kristo, kose? Ese naange mbahirira eyale. Nomaloma koti omulalu, kose handi niindi nende emirimo mibitiirifu, nende ohuboyebwa hu bitiirifu, nende ohuhuywa embariki hutabaliha, handi nende amahabai ka butoli-toli ak'ohuwona ohufwa. 24Amahabi kataanu amalaamba ndamala ohuhuyibwaangaho embariki amahumi kadatu nende chitaanu-na-chine buli habi. 25Amahaba kadatu amalaamba ndamala ohuhuyibwaho nende embariki ch'ewaaya; Ehabi lala ndahubbwaho amakina. Amahabi kadatu amalaamba ndachuhwaho nende emeeri; ndabengaho hu nyaanja esiro silala nende esideete silala; 26hu ngendo nyiingi, ndalichiingi mu masira ak'ohufwiira mu myaalo, amasira k'ohukwa mu banyaka, amasira k'abandu bange beene, amasira k'Abateende, amasira mu biko bihuluundu, amasira mu bichiimi, amasira mu nyaanja, amasira k'abasyange bataali ab'obwadyeeri; 27muhuhenyuha oluuya nende obulamu bwoomu, ohubita mu biro biingi muno ebitakonehamo endoolo, mu njala nende mu buluwo, amahabi maangi nitalichaangaho, mu mboo nende alwaanyi. 28Handi ohutula hu biindu biindi, aliwo obudahano bungi obuundiho obwohudaha ohumanya koti abafukiiriri boosi bamenyere. 29Naanu mweene ojoong'ere, naange ndaahaya ohuba ninjoong'ere? Naanu mweene oyiirwa mu sibi ese ndaahaya ohwewunamira? 30Nikali mbwe hoyeere ohwefumia, ndahabeere nindesiimira hu biindu byeekesa obukata bwaange. 31Nasae handi Samwaana Omwaami Yesu, oyo owoluyaali endaalo choosi, amanyire ati ese haba simbachaanga. 32Niindi mu Damasiko, Gafana owali aasi w'omutuki olaangwa mbwe Areeta yeecha yaliinda esiko sya Damasiko anyale ohundiira, 33nae ndeecha ndehirisirwa mu simweero nimbisiirwe mu dirisa ly'ohusida sy'erwaanyi, mani ndaona amahono kae.

will be added

X\