ABAKOLIITI YOHUBIRI 1

1Ohutula eyiri Paulo, omutume wa Kristo Yesu ohweema hu hudaha hwa Nasae, handi ohutula eyiri Timoteo omusyaani weefwe. Ohuchiira abafukiiriri ba Nasae abali mu Koliiti, handi ohuchiira abandu ba Nasae boosi abali mu Akaia mwoosi: 2Esisa sibe yimuli nende omuleembe kutula eyiri Nasae Seefwe, nende Omwaami Yesu Kristo. 3Abeeresebwe oluyaali Nasae handi laatang'ene Omwaami weefwe Yesu Kristo, Nasae w'esisa siingi handi Nasae omulemisi w'emyooyo choosi, 4oyo otulemyaanga emyooyo mu husaanda hweefwe hwoosi, hu fwesi hunyale ohulemya emyooyo abo ababa nibali mu husaanda hwoosi, nende ohulemya omwooyo fwesi ohutulemyaanga emyooyo nende Nasae. 5Olwohuba koti lu fwesi hukabanira elalira mu bwiichufu mu husaanda hungi hwa Kristo, nilwo fwesi muhubitira mu Kristo oyo hukabanira elalira mu bwiichufu mu hulemya omwooyo ohwo. 6Nihuba nihuchuunisibwa, ni hulw'ohulemesebwa emyooyo hweeng'we nende ohuwonisibwa; nae nihuba nihulemesebwa emyooyo, ni hulw'ohulemesebwa emyooyo hweeng'we, humunyoola nimuba nimunyala ohwesimiirisa nimugumire ohusaanda hu fwesi husaanda ohwo. 7Esuubi lyeefwe mweng'we lyomiifu; olwohuba humanyire huti koti lu mwesi muli ohukabana mu husaanda hweefwe hungi, mucha mwesi ohukabana mu hulemesebwa omwooyo hweefwe. 8Olwohuba efwe haba sihudaha mube nimutaamanyire, basyeefwe, ohuchunisibwa hu hwanyoola nihuli mu Asiiya; olwohuba hwanyooberwa elalira hubitiirira esikero ohwoola lu hwebwaabira elalira obulamu. 9Hu lwasiina, nae hwali nihumalire ohumanya huti hwali nihumalire ohuheengerwa omusango kw'ohufwa; nae esyo syali esituhola hwahaya ohwesikana abeene-na-beene, nae ohwesika Nasae oyo osyusaanga abafu; 10yatununula ohututusa mu buchuuni bwiita busa obwo, mani achia ohutununula handi; hu mweene oyo, nihwo hu huteere esuubi lyeefwe huti achia ohutununula ehabi liindi. 11Eng'we mwesi muhoyeere ohutuhoonyera nende amasaayo, hu bandi bangi banyale ohwoola ohutwebasira hulw'esisa sihuba nihwabeeresebwa ohweema hu masaayo maangi. 12Olwohuba ohwefumia hweefwe, nihwo huno mbwe, ohubaasa hweefwe huhwebisiiremo mu syaalo muno, nende ohumeedaho eng'we mwesi, alala nende obwolerefu nende obwadyeeri bw'ediini, nihuteehoonyera amakesi k'esyaalo, nae ohweema hu sisa sya Nasae. 13Olwohuba efwe sihubandiikira siindu siindi ohutusa ebyo bimunyala ohusoma handi mwamanya; mbaasa endi mucha ohumanyira elalira mu bwiichufu, 14koti lumwali mwamanyaho bidiidi, hu munyale ohutwesiimiramo koti luhunyala fwesi ohubesiimiramo, hu ludaalo lw'Omwaami Yesu. 15Olwohuba ndali nisuubira sino, ndadaha ohutangira ohwiicha yimuli, hu munyale ohunyoola esangaalo ly'amahabi kabiri; 16Ndadaha ohubakeniya niindi hu lukeendo lwaange lucha e Makedonia, handi ohubakobolera nindula e Makedonia hu nyale ohukera muhoonye ninjia hu lukeendo lwaange lwohucha mu Buyudaaya. 17Mani ndali nindondobaane nindali nindahire ohuhola endyo? Mani ese holaanga endekeha change koti omuundu w'ohusyaalo busa, nindetekeehe ohuboola endi Eee handi endi bbe esiha silala esyo? 18Mubwomiifu bweene koti lu Nasae ali omwesikwa, emboosi yeefwe yihubaboleere haba siyibeere niyiri Eee handi bbe. 19Olwohuba Omwaana wa Nasae, Yesu Kristo, yihwa bayalaangamo, Silifwaano, Timoteo nende ese, haba siyali “Eee” handi “bbe”; nae mu mweene oyo buli siha ni “Eee”. 20Olwohuba ebisuubise bya Nasae binyolaanga “Eee” yaabyo mu mweene oyo. Mani sakira huboolaanga huti Amiina nihubitira mu mweene oyo, hulw'oluyaali lwa Nasae. 21Nae ni Nasae niye otechaanga efwe nang'we mu Kristo, handi yamala omweene ohututuma; 22yamala ohututaaho esilolero syae nende ohutubeeresa Mwooyo wae mu myooyo cheefwe ohuba esyomiisa. 23Nae ndi ohulaanga Nasae yeeche abe omujulisi wange--mbwe ndali nindaha ohubaleha busa nisyo esyakera ndahaya ohwiicha eyo mu Koliiti. 24Ataali mbwe hwadaha ohubadwiiha busa ohuhema efukiirira yeng'we; olwohuba huholeraanga alala nang'we hulw'esangaalo lyeng'we, olwohuba mwomiira mu fukiirira yeng'we.

will be added

X\