TIMOTEO YITAANGIRA 5

1Otanyekaanga omusaacha mukofu, nae mulomalomereenge koti luwahalomalomera lataao ohwibula. Bukulaanga abasyaani baraaga koti ba mwaanamaao. 2Bukulaanga abahasi bakofu koti ba maao, handi abahaana basimbuha koti ba mbochowo, nende omwooyo mulala kwong'ene. 3Yisaanga oluyaali mu bahasi bafwiire abadoong'a bong'ene. 4Nae omuhasi mufwiirwe naaba naali nende abaana kata abeechuhulu, bahoyeere bataangireenge mberi ohwekaanga ohwoseresa ebidahibwa by'ediini eyiri amadaala kaabwe hu muhuhola batyo banyaleenge ohutungaanga abeebusi baabwe nende bakuuka yaabwe. Olwohuba sino nisyo esihoyera mu moni wa Nasae. 5Omuhasi mufwiirwe owadoong'a yeng'ene, nataaliho nende omuundu yeesi onyala ohumuliinda, aba ali koti owamala ohuta esuubi lyae lyoosi mu Nasae mani ahoyeere ohuchiiririra ohusabaanga nende ohwekwedaanga Nasae esiro nende esideete. 6Nae omuhasi mufwiirwe owesukuna busa mu buli simusangaasa, ali koti owamala ohufwa hale, kata nende naaba naliwo omulamu. 7Lagira otyo hu bandu bahaye ohuba nende sibatanyala ohwoseresa hu biindu bino byoosi. 8Omuundu yeesi nataliinda abeeho bae, handi ohuhirira elalira ab'edaala lyae lyeene, aba amalire ohwebwaaba efukiirira yino handi aaba ali omubi ohuhiraho nende omuundu otaali omufukiiriri. 9Otandikaanga omuhasi yeesi omufwiirwe otoosa emyaaka ch'obuhuluundu amahumi kasasaba (60), handi niyali niyadeehera omusaacha mulala yeng'ene. 10Handi omuhasi oyo ahoyeere ohuba nasiimibwa ohuba nende ebiholwa bilai, handi koti owaliindaho abaana, omuliindi w'abandu, owosaho amakulu k'aboolerefu ba Nasae, owajanjabaho abandu, handi owetusayo ohuholaanga ebilai mu buli ngira. 11Hayira elalira ohwandiika abahasi bafwiirwe bayere boosi. Olwohuba obwekoombi bwaabwe nibukera boola ohudaha ohudeeha, baba bacha ohwebwaaba Kristo, 12mani bakwe mu musaango kw'ohuhaya ohwoseresa esisuubise syaabwe syataangira. 13Handi baba bacha ohweeka ohudyaala, nibayikaana mu buli mulyaango, handi nibameeda ohwo obumoonyi nende obumemekalu bukera nibakaniaya bibatahoyeere ohukaniaya. 14Mani naange ndahadahire abahasi bafwiirwe abo abasisiiri abayere bahahoyereenge banyala ohudeeha handi, boole ohwibulaanga handi abaana, hubanyaleenge handi ohuliindaanga amadaala akaabwe keene bulai hubeemeo banyaleenge ohwiimira elalira abasuku abeefwe abo ehabi kata nabudiidi eyohuchaaka ohutulomalomaangaho emboosi echia esifuto haba daawe. 15Olwohuba abahasi bafwiirwe bandi bamalire ohutula hu Nasae mani bachaaka ohuloonda Sitaani. 16Mani naliwo omuhasi mufukiiriri yeesi, oli nende abeeho bahasi bafwiirwe, ahoyere abe niye obahoonya. Lehe omukanda kw'abafukiiriri kuhaye ohusidoyerwa nende omukuku okwo, hukunyale ohuhoonya abahasi bafwiirwe bataaliho nende omuundu obahoonya. 17Lehe abahuluundu bemirira abandu bulai, babeeresebweenge oluyaali amahabi kabiri, ohuhirira elalira abo abahalaabana mu mulimo kw'ohuyaala Emboosi Ndai, nende ohweekesa amakesi. 18Olwohuba ebyandiiko byolerefu biboola biti, “Otaboyaanga omunwa kw'endaawu niyiri ohuhunyeenya engaano,” handi biti, “Omuhalaabani ahoyeere ohubeereswaanga omuheemba kwae.” 19Otafukiiriraanga ohuwosesa omusango kudiira hu muundu muhuluundu yeesi okutaaliho abajulisi babiri oba badatu. 20Nae abandu basihayiire mu huholaanga ebibi, boolobyeenge mu lwichuule lw'abandu, hu bandu badong'ereyo banyale ohutya. 21Mu moni wa Nasae, nende muwa Kristo Yesu, nende muwa bamalaika badoole hwekweeda oloonde amalako kano ataali ohutya oba ohukwiira omuundu yeesi mu buli siindu syoosi sy'ohola. 22Otabbibbirihanaanga ohwiisa amahono hu bandu, oba ohweduba mu bibi by'omuundu wundi. Welindeenge nooli omunywerefu. 23Otang'wechaanga handi amaachi kong'ene, nae wehonyereengeho efwiini ndiidi yosi, ohuhoonya enda yao ohunyuhuula bilai eby'ohulya, nende hulw'amachuuni kao kabutoli-toli. 24Ebibi by'abandu bandi bibonehanira abweene, bichoomesera elalira hu huheengerwa emisango, nae ebibi by'abandu bandi bibonehana lunyuma. 25Ebiholwa bilai byosi bibonehanira abweene; nae kata nibitanyala ohuba bityo, haba sibinyala ohudoong'a nibyakiswa busa olubeerera daawe.

will be added

X\