TIMOTEO YITAANGIRA 2

1Sakira esitaangira, mbekweeda endi, musabireenge, mwekongoyereenge, handi mwebasireenge abandu boosi eyiri Nasae. 2Mwekongoyereenge abatuki nende abo boosi abali mu bifwo by'obutuki, hu hunyale ohumenya mu bulamu buyenjeefu handi obw'emireembe, nihutya Nasae, handi nihwebisa bilai mu ngeri choosi. 3Sino silayi, handi sifukiirirwa mu moni wa Nasae Omuwonia weefwe, 4odaha abandu boosi baonisibwe handi boole hu humanya obwadyeeri. 5Olwohuba aliwo Nasae mulala handi aliwo omuundu mulala osasania Nasae nende abandu. Wuno niye Kristo Yesu, oli omuundu mweene, 6owewaayo ohuwonia abandu boosi. Sino nisyo esilolero syeecha mu biha bihoyeere. 7Sino nisyo esyakera ndadoolebwa ohuba omuyaali handi omutume (Ndi ohuboola obwadyeeri, haba simbacha), omweekesa w'Abateende mu fukiirira nende mu bwadyeeri. 8Sakira ndekoomba endi mu buli sifwo abasaacha bahoyeere ohwekongooya, nibasingiise akulu amahono kaabwe moolerefu ataali etima oba obusoolo. 9Handi ndekoomba abahasi bosi befwaleenge engubo chihoyerwa handi babe abaloonga. Batesukaanga efwiiri, oba ohwesyaaya esaabbu oba amakina k'ebbeyi oba engubo ch'obukusi bw'akulu muno. 10Nae babe nende ebiholwa bilai bihoyera abahasi batya Nasae. 11Lehe omuhasi atekereseenge enjekesa nawuleerere nalongoyaale. 12Sifukiirira omuhasi yeesi ohweekesa oba ohuba nende obunyala bwoosi hu musaacha. Ahoyere ohuwuleera. 13Olwohuba Adamu niye owataangira ohuloongwa, hubaloondiaho Efa. 14Handi Adamu siniye owabachiriswa, nae omuhasi niye owabachiriswa, mani yehola omuhalaki w'amalako. 15Kata katyo, omuhasi achia ohuwonisibwa ohubitira muhwibula abana, niyomiirira mu fukiirira, nende mu hudaha, nende mu bwolerefu alala nende ohweliinda bulai.

will be added

X\