TIMOTEO YITAANGIRA 1

1Ebbarwa ohutula eyiri Paulo omutume wa Kristo Yesu ohweema hu hulagira hwa Nasae Omuwonia weefwe, nende Kristo Yesu esuubi lyeefwe. 2Ohuchiira Timoteo, omwaana wange w'elalira mu fukiirira. Lehe ehabi nende esisa, alala nende emireembe chitula eyiri Nasae Seefwe nende Kristo Yesu Omwaami weefwe bibe naang'we. 3Ndaha odoong'e mu Efeeso koti lundahwekweeda nindali ninjia mu Makedonia, onyale ohukayira abandu bandi bateekesa enjekesa yindi. 4Baboolere balehere awo ohweboya hu ngano chitamanyihaane nende ohubala enjibulo chitaakama echileeta busa ohuyingana nae sichirimo ameeko ka Nasae akali mu fukiirira. 5Esichiiririrwa sy'ohweekesa hweefwe nisyo ohudaha ohutulira elalira mu mwooyo mulai, nende embaasa ndayi, nende efukiirira y'obwadyeeri. 6Abandu bandi bamala ohwawuha ohutula hu njekesa yadyeeri, mani bacha badondobana beyingisa mu huyiingana hubulamo obuhoonyi. 7Behola ohuba abekesa b'amalako ka Musa, nae haba sibamanyire kata bibaboola, handi nibataamanyire ebiindu bi balomalomaho nende obwomiifu batyo. 8Humanyire huti amalako ka Musa malai omuundu yeesi nakehoonyera koti lukahoyeere. 9Handi humanyire huti amalako haba sikateebwao hulw'abandu balungifu nae kateebwao hulw'abahalaki b'amalako nende abajeemu, abatatya Nasae nende abaholi b'ebibi, abataali aboolerefu nende abatadeeba hu Nasae, abeeti ba basyaabwe nende abeeti ba bang'inaabwe, abeeti b'abandu. 10Kateebwao hulw'abandu bacheke, abayirana nende abasaacha oba abahasi baasyabwe, abakosawo abandu, ababacha, abajulira obubacha, nende abahola esiindu syoosi esikabuhaane nende enjekesa yadyeeri. 11Enjekesa yadyeeri niyo eyo eyichiana nende Emboosi Ndai y'oluyaali yindaberesebwa eya Nasae ofumisibwa. 12Ndeebasa Kristo Yesu Omwaami weefwe owambeeresa amaani k'ohuhola omulimo kuno, olwohuba yambukula koti omuundu mwesikwa mani yandoola ohumuhalaabanira, 13kata nindamufwoola hale handi nindamusaandia, handi nimunyeka. Nae Nasae yeecha yangwiira esisa olwohuba ndahola endyo nitaali nende efukiirira handi nitaamanyire esy'ohuhola. 14Mani Omwaami weefwe yanjuhira esisa siingi muno mani yamberesa efukiirira nende ohudaha syambwomoohera alala nende efukiirira nende ohudaha ebiri mu Kristo Yesu. 15Enomanoma yino yadyeeri handi yihoyera ohwakaanirwa nende ohufukiirira hwoosi yiti, Kristo Yesu yeecha mu syaalo muno ohuwonia abaholi b'ebibi. Naange nise ohiriramo elalira mu baholi b'ebibi; 16nae hulwesifune sino, Nasae yangwiira esisa hu Yesu Kristo anyale ohweekesa ohwesimiirisa hwae hwiichufu ohuba esyohweekeraho eyiri abo abacha ohumufukiiriramo banyoole obulamu butaakama. 17Eyiri Omutuki w'endaalo choosi, otafwa, otabonehana, Nasae mulala yeng'ene, afumisibwe handi aberesebwe oluyaali endaalo choosi. Amiina. 18Timoteo, mwaana wange, hubeeresa esilagiro sino, esichiana nende obunabbi bwahulomwalomwaho hale, mani bihuhoonye onyale ohulwaana nende obumaliirifu bwoosi. 19Mani yomiirira hu fukiirira yao, handi obe nende ebibaaso bilai. Abandu bandi baleha ebibaaso bilai mani beetera elalira efukiirira yaabwe. 20Mwaabo nimwo omuli Hamenesi nende Alekisaanda, bandamala ohudiisa Sitaani hubanyale ohweeka obutafwolaanga Nasae.

will be added

X\