ABATESALONIKA YITAANGIRA 2

1Basyaange, abeene mumanyire koti ohubakeniya hweefwe haba sihwali ohw'ebihaya. 2Mumanyire koti lu hwasaandisibwa handi hwanyekwa nihwali mu Filipi nihusisiiri ohwiicha mu Tesaloniika. Kata katyo, Nasae weefwe yatubeeresa esinani sy'ohubayaalira Emboosi Ndai yitula yaali, kata ohuyinganisibwa nihwali ohubitiirifu. 3Omulaanga kweefwe yimuli haba sikweema hu bukodyo, oba esichiiririrwa sibi, handi kata sihwakesaho ohubachirisa omuundu yeesi. 4Ohutusaho, buli siha hwalomalomaanga koti lu Nasae adaha huhole, olwohuba yatwekesa handi yaatudiisa Emboosi Ndai. Haba sihwakesaangaho ohusangaasa abandu, nae hwaholaanga ebisangaasa Nasae yeng'ene, omanyire ebichiiririrwa by'emyooyo cheefwe. 5Olwohuba mumanyire bulai muti haba sihweecha yimuli nende emboosi chibwiiha hu kuliira, nae Nasae mweene niye omujulisi weefwe hu binomanoma bino. 6Haba sihwakesaho ohudaha omuundu yeesi atufumie, kata eng'we oba abandu bandi, 7kata nende nihwali nihuhoyera ohunyoolaho bi hwali nihuhoyera koti abatume ba Kristo. Nae hwaaba abaloonga nihuli nang'we koti omuhasi oliinda abaana bae bulai muno. 8Ohweema hu hudaha huhubadahiramo, sakira hwaaba nende esangaalo ly'ohubeechulisa, ataali nende Emboosi Ndai yitula eyiri Nasae yong'ene, nae kata obulamu bweefwe bweene, olwohuba muli abandu b'engaanga ya akulu muno yihuli. 9Basyeefwe, mubwadyeri bweene mwichulisa koti lu hwahalaabana handi hwadidihaana! Hwahalaabanaanga esiro nende esideete hu huhaye ohuba omukuku yimuli nihwali nihubayaalira Emboosi Ndai yitula eyiri Nasae. 10Eng'we ning'we abajulisi beefwe koti lu Nasae yesi ali omujulisi weefwe, esaambo cheefwe yimuli eng'we abafukiiririra Kristo chali endayi, engololofu chitaaliho obuhyamu bwoosi. 11Mumanyire muti hwayiraanga buli muundu yeesi hweeng'we koti lu mwibusi yahayira abaana bae. 12Hubasaba nihubataamo esinani, hubagumia emyooyo handi hubekweeda huti, obulamu bweeng'we bube obusangaasa Nasae wabalaanga ohwingira mu Bwaami bwae nende mu luyaali lwae. 13Handi huli nende esifune siindi esikera nihwebasa Nasae buli siha. Nihwabaleetera emboosi ya Nasae, mwayiwulira handi mwayakaanira, ataali koti emboosi y'omuundu busa, nae koti emboosi ya Nasae, koti lu yiri mubwadyeri. Olwohuba Nasae ali ohuholera mweng'we abafukiirira. 14Olwohuba basyaange, ebiindu byakwa hu bafukiiriri bo Mubuyudaaya, nibyo nasilala nende ebyabakwaaho mwesi, abandu bafukiirira mu Kristo Yesu. Olwohuba mwesi mwasaandisibwa nende abandu beeng'we beene koti lu Bayudaaya basaandisibwa nende abandu baabwe beene. 15Abayudaaya bano nibo abeeta Omwaami Yesu nende abanabbi baabwe beene, handi baatusandya. Haba sibasangaasa Nasae daawe! Basuku ba buli muundu! 16Kata bakesaho ohutukaira hutayaalira Abateende emboosi yileeta Obuwonia. Nae bulaanu etima lya Nasae libeheereho! 17Nae basyaange, nihwakabuhanaho nang'we budiidi, ataali mu bibaaso byeefwe, nae mu mubiri, hwabafwiirwa muno mani hwaaba nende obwekoombi bungi muno obw'ohubabona handi! 18Handi hwali nihwekoomba muno ohukobola yimuli. Mubwadyeeri bweene, ese Paulo ndakesaho amahabi maangi ohukobola yimuli nae Sitaani yatwikalira engira. 19Nae ning'we esuubi lyeefwe, esangaalo lyeefwe, nende esifune syeefwe sy'ohwesuungiramo obuyiingiri bweefwe mu moni w'Omwaami weefwe Yesu naakobola. 20Mubwadyeeri bweene, ning'we ohwesuunga hweefwe nende esangaalo lyeefwe!

will be added

X\