ABATESALONIKA YITAANGIRA 1

1Ebbarwa yitula eyiri Paulo, Silifwaano, nende Timoteo, eyichiira Abafukiiririri Batesolonia, ba Nasae Seefwe handi nende Omwaami Yesu Kristo babadoola. Esisa nende emireembe bibe naang'we. 2Hwebasaanga Nasae ebiha byoosi, hu lweng'we, handi buli ludaalo hubatumbulanga mu hwekongooya hweefwe. 3Hwichulisaanga mu moni wa Nasae weefwe nende Seefwe koti muta efukiirira y'eng'we mu biholwa, handi koti ohudaha hweeng'we hukera nimuhalaaabana nende amaani, handi koti esuubi ly'eng'we mu Mwaami weefwe Yesu Kristo liri e elyomiifu. 4Basyaange, humanyire huti, Nasae abadaha handi yabadoola mube abandu bae beene. 5Olwohuba Emboosi Ndai yi hwabaleetera, siyali ohulomaloma emboosi busa, nae yeechera mu maani nende mu Mwooyo Mwolerefu, nende ohwomiisira elalira obwadyeeri bwayo. Mumanyire koti obulamu bweefwe bwali nihwali eyo naang'we, handi hweyira hutyo hulw'obulayi bweeng'we bweene. 6Mwabonera hweefwe nende hu Mwaami; mani kata nimwasaanda muno, mwakaanira emboosi eyo nende esangaalo litula eyiri Mwooyo Mwolerefu. 7Mani sakira mwehola esyohuboneraho eyiri abafukiiriri boosi abali mu Makedonia nende mu Akaia. 8Olwohuba emboosi chidiira hu Mwaami echachaakira mweng'we haba sichoola mu Makedonia nende Akaia mwong'ene nae emboosi chidiira hu fukiirira yeeng'we mu Nasae chasalaana buli abundu woosi. Mani sakira hubula esy'ohulomaloma siindi. 9Olwohuba abandu be eyo boosi balomaloma koti lu mwatwakaanira nihwabakeniya, handi koti lu mwalehana nende ohwiinamira emisaambwa, mani mwakobola eyiri Nasae, ohuhalaabanira Nasae w'adyeeri, handi omulamu. 10Handi koti lu muli ohuliinda Omwaana wae akobole natula Mukulu, oyo niye Yesu, yi Nasae yasyuhisa ohutula mu bafu, handi niye ochia ohutuwonia etima lya Nasae liri ohwiicha.

will be added

X\