EBBARWA YA PEETERO YITANGIRA 5

1Bulaanu koti ese syeesi ndi omwaayi muhuluundu w'omukaanda kw'abafukiiriri, handi koti omuundu owabona ohusaanda hu Kristo yali nahwo, handi koti omuundu yeesi ochia ohukabana hu luyaali lucha ohuboneha, hubbira omulaanga eyiri abemeresi b'emikaanda ch'abafukiiriri abali mweeng'we. 2Mube abaayi b'ebyaayo bi Nasae yababeeresa, handi mubiliinde nende ohudaha koti lu Nasae adaha muhole ataali ohuyiikwa. Hole emirimo cheeng'we ataali ohwekoomba eseende, nae ohweema huhudaha ohuhalaabanira abaasyeng'we mubwadyeri. 3Mutatukaanga abandu babata mu buliindi bweeng'we nende esirifu, nae mubecheenge esy'ohuboneraho eyiri ebyaayo. 4Mani Omwaayi muhuluundu niyahabonehe mucha ohunyoola ekofya y'obutuki y'oluyaali eyitafwiirira. 5Mu ngeri nasilala eng'we abasisiiri abaraaga, muhoyeere ohuwulira abahuluundu beeng'we nende obuloonga. Handi mweesi-mweesi koti engubo yeeng'we muhoyeere ohwefwaala obuloonga bw'ohuhalaabanira abaasyeeng'we; olwohuba ebyandiiko byolerefu biboola biti, “Nasae alwanisa abeniinia, nae akwiira esisa abaloonga.” 6Sakira mube abaloonga mu mahono ka Nasae w'obunyala hwaanyale ohubasiingisa yabaniinia akulu mu siha syae sihoyeere. 7Yireenge ohwelalihirira hweeng'we hwoosi eyiri Nasae olwohuba abadeebaho. 8Mweliinde, mube ameeso! Olwohuba omusuku weeng'we Sitaani yekeesa-keesa nahuumula koti edalang'i nakoonya oyo yanalya. 9Mumuyinganie nimuli abomiifu mu fukiirira, olwohuba abafukiiriri baasyeng'we bandi abali mu syaalo syoosi bosi bali ohubita mu husaanda nasilala ohwo. 10Nae nimumalire ohusaandaho budiidi, Nasae owesisa syoosi, owabalaanga ati mukabaneho hu luyaali lw'endaalo choosi mu Kristo, niye ochia ohubabeeresa amaani mani ababeerese mube abomiifu mu fukiirira. Mani lunyuma lw'ohumala ohusaandisibwa hooho, Nasae mweene esisa syoosi, owabalaanga mwiiche munyoolere mu Kristo oluyaali lwae lutaakama, omweene achia ohubakobosa ohuba abalamu aabwene, aboombahe, handi amale abomiise. 11Obunyala bwoosi bube obwae, endaalo choosi. Amiina. 12Mbandiikira ebbarwa nyimbikiti yino, nende obuhoonyi bwa Silifwaano, yi njira koti mwaanaama mwesikwa. Ndaha ohubameedamo amaani nende ohuboomiisira endi sino sisa sya Nasae sy'elalira. Handi mbahuutira endi musyomiiriremo. 13Omukaanda kw'abafukiiriri baasyeng'we bali mu Bbabbilooni, ba Nasae yesi yadoola, babaheesa. Neende Mariko omwaana wange yesi abaheesa. 14Muhesanie nimukwiichana mu birifu nende ohudahana koti Abakurisito. Lehe esisa, sibe naang'we mweesi, abandu ba Kristo.

will be added

X\