EBBARWA YA PEETERO YITANGIRA 4

1Koti lu Kristo yasaanda mu mubiri, fwesi huhoyeere ohwewaayo nende obwomiifu nende engeri y'embaasa yi yali nayo, olwohuba omuundu osaanda mu mubiri, oyo aaba yamala ohukabuhanira elalira nende esibi. 2Mani sakira, ohutula bulaanu nende ohwemeeda mu moni, ohudaha hwa Nasae nihwo ohutuka obulamu bwae bw'omusyaalo muno bwoosi, ataali hu bwekoombi bw'esibi bw'omubiri. 3Mwamala ohwehoonyera ebiha biingi nimuhola bi bakafwiiri baheera ohuhola. Obulamu bweeng'we bwali bwaweera mu bucheke, ohwekoomba hubi, obumeesi, obwekoombi bw'okuliira, obumeesi bw'omubidyaalo, nende ohwiinamira emisaambwa hubi. 4Abakafwiiri abo bawuka muno nimuteyambaania nabo mu huhola obwekoombi bubi buhirao obwo, sakira babanyeka. 5Nae bacha ohwewosaho eyiri omuundu wetekeehe ohuheengera omusango abandu balamu nende abafwa. 6Sino nisyo esyakera bayaalira Emboosi Ndai eyiri abandu bamala ohufwa bosi, kata nende nibahaheengerwa omusango mu mubiri koti abandu boosi, nae balamu mu mwooyo koti Nasae. 7Enjakamo y'ebiindu byoosi yisudire aambi. Sakira mube abaaywe, abetuka abeene, mani munyale ohwekongooya. 8Nae esihira byoosi, mudahane nende ohudahana hwadyeeri, olwohuba ohudahana hubwiiha hu bibi biingi. 9Yakaanire abaasyeng'we mu madaala keeng'we ataali ohwekanyiisa. 10Buli muundu hweefwe koti omuliindi mulai w'ebiyaanwa bya Nasae ahoyeere ohwehoonyera ebiyaanwa byoosi bi Nasae yamubeeresa nahoonya abaasye, niyehoonyera ebiyaanwa bikabuhaane nende obwadyeeri. 11Omuundu yeesi oweekesa Emboosi ya Nasae, ahoyeere ohuyeekesa koti Emboosi ya Nasae yeene; omuundu yeesi ohola emirimo ahole nende amaani ka Nasae yamubeeresa, mani hu mu buli siindu syoosi Nasae anyoole efuma ohubitira mu Yesu Kristo, yi luyaali nende amaani bibe ebyae endaalo choosi. Amiina. 12Basyaange baheerwa, mutesinduha hulw'ohuteemwa huchuuni hu musaandisirwamo, koti esiindu sikeni esiri ohubeholaho. 13Ohutusaho sangaale muti muli ohukabanaho nende Kristo mu husaanda hwae, hu munyale ohwichula esangaalo mu myooyo cheeng'we lunyuma lw'oluyaali lwae ohweyekesa. 14Nimuli nende ehabi nibabanyeka hulwohwehoonyera eliita lya Kristo; amahulundu kali mbwe Omwooyo kuli nende oluyaali, Omwooyo kwa Nasae kuli mweng'we. 15Nae abulewo omuundu yeesi mweng'we osaanda koti omwiiti, oba omwiibi, oba omuundu ohola esibi sihoongo, oba yeyingiise mu mirimo ch'abandi. 16Nae omuundu yeesi hweeng'we nasaanda olwohuba Mukristo, atadiirwa esoni, nae yebase Nasae busa ati ali Omukurisito. 17Olwohuba endaalo choolere ech' ohuheengeramo omusango, nae handi chicha ohuchaaka nende abandu ba Nasae beene. Nae nibichaakira hweefwe, byahabe bitye eyiri abo abatafukiirira Emboosi Ndai yitula eyiri Nasae? 18Olwohuba ebyandiiko byolerefu biboola biti, “Nisiri esidinyu eyiri abalungifu ohunyoola obuwonia bulaanu syahabe sitye eyiri abo abatatya Nasae nende abaholi b'ebibi?” 19Sakira abasaanda olwohuba Nasae niye obadahisa basaande, bahoyeere ohwemeeda ohwewaayo eyiri Omuloongi waabwe omwesikwa, nende ohwemeeda ohuhola ebiindu bilai.

will be added

X\