EBBARWA YA PEETERO YITANGIRA 3

1Mu ngeri nasilala, eng'we abahasi badeeha muwulireenge abasaacha beeng'we, hu mani naalimo mwaabo abatafukiirira emboosi ya Nasae, esaambo ndayi ch'abahasi baabwe chinyale ohubahola baaba abafukiiriri. 2Olwohuba bacha ohubona esaambo chaabwe koti lu chiri enyirifu handi echiisamo oluyaali. 3Obulai bweeng'we buhaye ohuba obweema hu biindu by'ohumukulu koti, engeri yi mwesuukamo efwiiri, oba emigasa ch'engaanga yaakulu chimwesyaaya, oba engubo chengaanga yaakulu chimwefwaala. 4Ohutusaho obulayi bweeng'we buhoyeere ohutula mu bwadyeeri buli mu myooyo cheeng'we, obulayi butasangulwa bw'omwooyo muloonga, handi omuyenjeefu, okuli nende engaanga yaakulu muno mu moni wa Nasae. 5Olwohuba yino niyo engira yi bahasi boolerefu, abesikanga Nasae mu ndaalo chabita baholaanga hu bulamu bwaabwe bwaaba obulayi, handi bawuliraanga abasaacha baabwe. 6Olwo nilwo koti lu Saara yawulira Yibbulaimu mani yamulaanga ati omwaami. Handi muli abaana bae nimuhola ebilungifu nimutaali nende ohutya esiindu syoosi. 7Mu ngeri nasilala eyo yosi, abasaacha mudiireenge abahasi beeng'we bulai, nimumanyire muti mu huloongwa hwaabwe bakata nibo. Handi koti abandu bacha ohunyoola alala nang'we esiyaanwa sya Nasae sy'obulamu. Holeenge mutyo hwahaye ohubaao esiindu syoosi esyehiinga mu ohwekongooya hweeng'we. 8Muhumaliirisa, eng'we mweesi, becheenge nende omwooyo mulala, kwiireenge esisa abaasyeng'we, handi dahaneenge koti abeenda ndala. Deebenge hu basyeeng'we, handi becheenge abaloonga eyiri abaasyeng'we. 9Mutatungaanga esibi nende esibi, oba ohuholima nende ohuholima; ohutusaho, tungeenge nende emikisa chong'ene olwohuba emikisa nicho chi Nasae yasuubisa ohubabeeresa niyali nabalaanga. 10Olwohuba koti lu byandiiko byolerefu biboola, “Omuundu odaha ohunyoola obulamu handi ohubona emireembe, alehe ohulomaloma ebibi nende olulimi lwae handi alehe obubacha. 11Ahoyeere ohulehana nende ebibi mani ahole ebilai; ahoyeere ohukoonya emireembe nende omwooyo kwae kwoosi. 12Olwohuba Nasae aliinda abalungifu handi atekeeresa ohwekongooya hwaabwe. Nae ayingania abo abahola ebibi.” 13Nae wiina ochia ohubaaho esibi nimwetekeehe ohuhola ebilai? 14Kata nende nimusaandisibwa hulwohuhola esilai, mucha ohunyoola ehabi. Mutatya omuundu yeesi oba mwelalihirira. 15Nae mu myooyo cheeng'we, mwiseenge oluyaali mu Kristo koti Omwaami. Esiha syoosi becheenge abeetekefu ohukobola mu muundu obalaanga ohulomaloma hu suubi limuli nalyo. 16Nae muholeenge mutyo nende obuloonga nimubeesamo oluyaali, handi lindeenge ebibaaso by'emyooyo cheeng'we bulai. Handi abandu nibalomaloma bubi hu saambo ndayi chimulinacho mu Kristo, lehe banyoole esoni hu biindu bibalomaloma. 17Olwohuba silayi ohusaanda hulwohuhola esiindu silayi nihuba huli ohudaha hwa Nasae, ohuhira ohusaanda hulwohuhola esiindu sibi. 18Olwohuba Kristo yafwa hulw'ebibi ehabi lala lyong'ene, omuundu mulai yafwiira ababi, hwaanyale ohubaleeta eyiri Nasae. Yeetwa mu mubiri, nae abweene awo yaabereswa obulamu mu mwooyo. 19Nae mu bulamu bw'omwooyo obwo, yacha mani yayaala alafu eyiri emyooyo chaboywa. 20Chino chali emyooyo ch'abandu bali bahaya ohuwulira Nasae niyateemaho ohubaliinda niyesimiriise mu ndaalo chi Nowa yombahiramo elyaato. Abandu badiidi bong'ene nibo abali mu lyaato; bali bataanu-na-badatu bong'ene abawona mu maachi. 21Handi amaachi ako kali ahalolero aheekesa ohubatiisibwa ohubaonia bulaanu. Haba sihuli ohwoosa hw'erwaanyi hw'ehwe ly'ohumubiri, nae nihwo esisuubise si huhola eyiri Nasae mu mwooyo mulai. Huno huhuwonia ohubitira mu husyuha hwa Kristo Yesu, 22owamala ohuchia Mukulu, handi bulaanu ali hu muhono muluungi kwa Nasae, handi bulaanu atuka bamalaika boosi nende abandu boosi nende obutuki bwoosi.

will be added

X\