EBBARWA YA PEETERO YITANGIRA 2

1Sakira mwemalemo ehiinda yoosi, ohuchuunia abaasyeeng'we, obubacha bwoosi, oba, ehiinda yoosi, nende obumoonyi bwoosi. 2Mube koti abaana bayere bahebulwa busa, abawulira obuluwo bw'amabeere moolerefu k'omwooyo, mani nimukang'wa mucha ohuhula munyoole obuwonia. 3Olwohuba ebyandiiko byolerefu biboola biti, “Mumalire ohuhoombaho esisa sya Nasae.” 4Mwiiche eyiri Omwaami, ekina elamu li bandu bahaya bati libulamo obuhoonyi, nae Nasae yaalidoola koti eliri nende obuhoonyi yaali. 5Olwohuba mwesi muli amakina malamu akombahirwa enyumba ya Nasae y'omwooyo, yimucha ohuhalaabanira koti abalaamisi boolerefu, nimuwaana ebiyaanwa by'omwooyo bi Nasae yakaanira ohubitira mu Yesu Kristo. 6Olwohuba ebyandiiko byolerefu biboola biti, “Bone, mbawo bulaanu ndaao ekina lisiira enyumba mu Siyooni, ekina lyadoolebwa handi ely'engaanga y'akulu; handi omuundu yeesi omufukiirira haba saacha huswaala.” 7Ekina lino ly'engaanga y'akulu muno eyiri eng'we abafukiirira; nae eyiri abo abatafukiirira liri: “Ekina li boombahi bahaya bati liwuma obuhoonyi nilyo elyeholere ekina huluundu lisiira enyumba.” 8Handi biti, “Lino nilyo ekina likera abandu nibateremuha, Ekina likera nibakwa”. Bateremuha olwohuba haba sibafukiirira emboosi yira koti lu syatekehwa siti b'ohuhola batyo. 9Nae eng'we muli abandu badoolebwa, abalaamisi, oluyia lwolerefu, abandu ba Nasae beene, hu munyale ohufumia emirimo cha Nasae chiwukisa, ba Nasae yalaanga ohutula mu siirima ohwingira mu bulafu bwae bulai butalomwalomwaho. 10Mu biha byaahale, haba simwali abandu badoolebwa, nae bulaanu muli abandu ba Nasae; mu biha byaahale haba simwaakaanira esisa sya Nasae nae bulaanu mwanyoola esisa sya Nasae. 11Eng'we basyaange, mbahubbira omulaanga bawalukeendwa handi abeyikami mi syaalo muno endi, mweyolobye obwekoombi bubi bw'omubiri obulwaanisa emyooyo cheeng'we buli ludaalo. 12Esaambo cheeng'we eyiri abakafwiiri chihoyeere ohuba endayi, kata nende nibateemaho ohubaosesa bati muli abaholi b'ebibi, bacha ohubona ebiholwa byeeng'we bilai, mani bafumie Nasae hu Ludaalo lw'ohwiicha hwae. 13Hulwobulai bw'Omwaami, wulirenge abemeresi boosi abohusyaalo: kata abe omutuki muhuluundu otuka abandu bandi boosi, 14kata nende Gafana, bayatuma ohusaandya abaholi b'ebibi nende ohwebasa abaholi b'ebiindu bilai. 15Olwohuba Nasae adaha ati, ebiholwa byeeng'we bilai bibwiihe hu nomaloma mbi ey'abandu basiru. 16Obulamu bweeng'we buhoyeere ohuba koti obw'abandu bali nende emireembe, nae mutehoonyera emireembe cheeng'we ohubwiiha hu sibi syoosi, ohutusaho obulamu bweeng'we bube koti obw'abahalaabani ba Nasae. 17Yiseenge oluyaali mu bandu boosi: daheenge abafukiiriri basyeeng'we, ticheenge Nasae, handi yisenge oluyaali mu batuki b'esyaalo. 18Eng'we abahalaabani, wulirenge abaami beeng'we handi yekeseenge oluyaali lwiichufu eyitaali abo ababaholera ebilai handi baababaasaho bong'ene, nae kata eyiri abaalaba bosi. 19Olwohuba aliwo obuhoonyi eyiri omuundu wesimiirisira obuchuuni bw'ohusaanda olwohuba akalusa ebibaaso byae eyiri Nasae. 20Nae ngaanga siina yi munyoola nimwesimiirisira ohuhuywa hubahoyera nimuholere esibi? Ohutusaho nimwesimiirisira ohusaanda kata nimumalire ohuhola ebiindu bilai, awo nilwo lu Nasae aaba achia ohubabeeresa ehabi. 21Nasae yabalaangira sino, olwohuba Kristo yesi yabasaandira mani yaabalehera esy'ohuboneraho, ati munyale ohuloonda mu makulu kae. 22Ebyandiiko byolerefu biboola biti, “Haba siyaholaho esibi syoosi, handi abulao obubacha bwatulaho muhanwa mwae.” 23Nibamunyeka, siyesasula yesi naanyeka; niyasaandisibwa, haba siyatiisa-tiisaho omuundu yeesi, ohutusaho yata esuubi lyae mu Nasae, oheenga emisango mu bulungifu. 24Omweene yakiinga ebibi byeefwe mu mubiri kwae hu musalabba, hu hunyale ohuba abafwa eyiri esibi, nae hube abalamu eyiri obuluungifu. Ohweema hu bikoonjo byae mwanyoola ohuwonisibwa. 25Olwohuba mwali nimuli koti amakoondi kakota, nae bulaanu mwakaluha eyiri Omwaayi handi Omuliindi w'emyooyo cheeng'we.

will be added

X\