EBBARWA YA PEETERO YITANGIRA 1

1Ese Peetero omutume wa Yesu Kristo. Nyandiikira eng'we abaloonde ba Nasae bulaanu abali mu Potasi, Galatia, Kapadosia, Asiiya, nende Bitinia, yi mweruha mwasasaanira. 2Mwadoolwa nende esichiiririrwa si Nasae Seefwe mweene yamanyira elalira ati, Mwooyo Mwolerefu abahole mube aboolerefu, hu munyale ohuwulira Yesu Kristo mani aboose nende amabaanga kae. Lehe esisa nende emireembe bibe ebyeng'we mu bwiichufu. 3Lehe hwebase Nasae handi Laatang'ene Omwaami weefwe, Yesu Kristo. Ohweema hu sisa syae sibitiirifu, yakera hwebulwa mu bulamu buyaaha, niyasyuuhisa Yesu Kristo ohutula mu bafu. Mani yaatubeeresa esuubi lamu mu myooyo cheefwe, 4elyohunyoola ebilai bitaakama, bi Nasae abiihira abandu bae. Ababiihira Mukulu, yi bitanyala hubola, oba ohunyaasiha oba ohufwiiririra. 5Hulwohufukiirira hweeng'we Nasae abaliinda nende obunyala bwae, handi achia ohubaonia hu ludaalo lw'enjakamo, lu yatekeha ohubaonisiryaho. 6Sangaale hulw'emboosi yino, kata nende mu siha sino mumalire ohunyoola ohusaandisibwaho nende ohwelalihiriraho ebiha bidiidi hulw'ebihemo biingi ebyabakwaaho. 7Ohusaandisibwa huno hwecha nende esichiiririrwa esy'ohuteema efukiirira yeeng'we. Kata esaabbu yinyaasiha yosi yiteemwa nende omuliro. Sakira efukiirira yeeng'we eyiri nende engaanga nyiingi ohuhira esaabbu, yosi yihoyeere ohuteemwa, huyinyale ohubonehana niyiri enyomiifu yadyeeri. Awo mani niwo yi Nasae achia ohubafumia nende ohubabeeresa oluyaali nende esitiibwa hu Ludaalo lu Yesu Kristo yaheyekesereho alafu. 8Yesu oyo mumudaha kata nende nimusisiiri ohumubona; mumufukiirira, kata nende amwahaba nimutamubona bulaanu. Mani ndi nende esangaalo liingi litaboolehana, 9olwohuba bulaanu munyoola ohuwonisibwa hw'emyooyo cheeng'we ohutula mu humufukiiriramo. 10Ohuwonisibwa huno nihwo hu banabbi balomalomaho nibeekesa esisa si Nasae yali achia ohubakwiira, nibamalire ohukonyeresa nende ohuteeberesa bulai muno. 11Bakoonyeresa muno nibadaha ohumanya liina bweene lu Ludaalo luno lwahoolereho, handi koti lu lwaheeche. Olwohuba Mwooyo wa Kristo obalimo yali yeekesa ohusaanda hu Kristo yali achia ohugumira, nende oluyaali lwahatulemo. 12Nasae yeekesa abanabbi bano ati haba sibehalaabanira abeene, nae bahalaabanira eng'we nibalomaloma hu bwadyeeri bu muwulira bulaanu. Ba wamwaanda b'Emboosi Ndai abalomaloma nende obunyala bwa Mwooyo Mwolerefu owatumwa ohutula Mukulu, nibo ababeekesa obwadyeeri buno. Buno nibwo obwadyeeri bu bamalaika bosi badaha ohumanya amahulundu kaabwo. 13Sakira lehe ebibaaso byeeng'we bibe ebyetekefu ohuhola. Mube abaaywe, handi mute esuubi lyeeng'we lyoosi hu habi yi mucha ohunyoola hu ludaalo lu Yesu Kristo achia ohweyekesera elalira. 14Koti abaana bawulira Nasae, mutafukiirira obwekoombi buhale bu mwali ninabwo nimusisiiri ohumanya Nasae bwaafuka obulamu bweeng'we. 15Ohutusaho, mube aboolerefu mu buli siindu syoosi simuhola, koti lu Nasae yabalaanga mube aboolerefu. 16Olwohuba ebyandiiko byolerefu biboola biti, “Muhoyeere ohuba aboolerefu, olwohuba syesi ndi omwolerefu.” 17Ngandi mulangaanga Nasae muti Seefwe nimwekongooya, handi niye oheengera omusango buli bandu boosi mu ngeri nasilala. Sakira, mwehoonyere obulamu bweeng'we bwomusyaalo muno koti abakeni nimubeeresa Nasae oluyaali. 18Olwohuba mumanyire esyatuungibwa ohubanunula ohutula mu bulamu butaalimo obuhoonyi bumwanyoola ohutula hu bakuuka yeeng'we. Handi esiindu sibabakula esyo, haba sinisyo esiindu sinyaasiha busa koti esaabbu oba efeesa, 19nae niko amabaanga ka Kristo akabanunula, niye oli koti ekoondi yeere elitaaliho obubi bwoosi, oba embala yoosi. 20Nasae yamudoola esyaalo nisisisiiri ohuloongwa, handi yeekeseebwe mu ndaalo chimaliiriha chino hulwobulai bweeng'we. 21Ohubitira mu Kristo, mufukiirira Nasae wamusyuuhisa ohutula mu bafu, mani yaamubeeresa oluyaali, handi okera efukiirira yeeng'we nende esuubi lyeeng'we byaaba nibyomiirira hu Nasae. 22Nae koti bulaanu muli abanyirifu boosebwa hulwohuwulira obwadyeeri, handi eng'we muli nende ohudaha hulamu eyiri abafukiiriri baasyeng'we, mani mudahane elalira nende emyooyo cheeng'we choosi. 23Olwohuba bulaanu mwebulwa ehabi lyohubiri, ataali ohweema hu lumwo lufwa, nae ohweema hu lumwo lutafwa, ohweema hu Mboosi ya Nasae mulamu, handi oyiindira endaalo choosi. 24Olwohuba ebyandiiko byolerefu biboola biti, “Abandu boosi bali koti obunyaasi, handi oluyaali lwaabwe luli koti esimuli syomusiino. Obunyaasi bukoonga, ebimuli bibulunguha. 25Nae Emboosi y'Omwaami, yidoong'awo busa endaalo choosi.” Emboosi yino niyo Emboosi Ndai eyabayaalirwa.

will be added

X\