ABAKOLIITI YITAANGIRA 9

1Ese haba siindi owedeembe? Haba siindi omutume? Sindabonaho Yesu Omwaami weefwe? Eng'we haba simuli ebyaamo byomulimo kuholera Omwaami? 2Nitaali omutume eyiri abandu bandi, nae eyiri eng'we ndi omutume; olwohuba neng'we esilolero syomiisa obutume bwaange mu Mwaami. 3Huno nihwo ohwewosaho hwange eyiri abo abahadahire ohunyiingania. 4Haba sihuli nende obunyala bwohubeereswa ebyohulya nende ebyohung'wa byeefwe? 5Haba sihuli nende obunyala bwohukendaanga nende omuhasi, koti lu batume bandi nende bamwaanang'ina Mwaami nende Keefa lubaholaanga? 6Oba Bbarunabba nende ese fweeng'ene niifwe abahoyeere ohuholaanga emirimo hu hunyale ohunyoola esyohulya? 7Muundu siina ohalaabana koti omusikaari handi mani yetunga omweene? Muundu siina otaaka endalo y'emisabbiibu mani yaahaya ohulyaaho ebyaamo byaamwo? Wiina mweene owaaya ebyaayo mani yaahaya ohung'waaho amabeere kaabyo? 8Mubaasa muti ndi ohuboolaanga bino nindehoonyera obunyala bwaange koti omuundu busa? Amalako ka Musa kosi haba sikaboola katyo? 9Olwohuba syandiikwa mu malako ka Musa siti, “Otaboyaanga omunwa kw'elaawu niyiri ohuhunyeenya engaano.” Mubaasa muti, Nasae adeeba hu laawu chong'ene? 10Haba saalomaloma elalira hweefwe? 11Nikali mbwe efwe hwabataakamo ebyomwooyo bilai, mani sihuhoyeerwe ohubakesamo ebituhoonya mu bulamu bw'omubiri? 12Abandu bandi nibali nende obunyala bwohunyoola omukabo mweng'we, efwe naafwe sihuba nihuhira hooo? Kata katyo, efwe haba sihwehoonyera obunyala buno, nae hwagumira buli siindu syoosi hu huhaye ohwikalira engira y'Emboosi Ndai ya Kristo. 13Eng'we haba simumanyire muti abo abaandiikwa ohuhalaabana mu nyumba ya Nasae bahoyeere ohunyoola ebyohulya byaabwe ohutula mu nyumba ya Nasae eyo, handi abo abahalaabanira hu alutaari bosi bakabana hu biyaanwa bitusirwe? 14Mu ngeri nasilala eyo, Omwaami yalagira ati, abo abayaala Emboosi Ndai, bahoyeere ohunyoola obuhoonyi ohweema hu mulimo kwaabwe okwo. 15Ese haba sindehonyeraanga kata obunyala buno, handi haba siindi hwandiikaanga bino hu nyemeo nyoole obuhoonyi buli butyo. Ese maya ndaafwa ohuhira omuundu yeesi ohundusaho esyo sindesungiramo. 16Olwohuba, kata ninjaala Emboosi Ndai, esyo syong'ene haba sisimbeeresa ohwesuunga. Olwohuba hoyerwa-buhoyerwa ohuyaala. Mani chinjakaanire nitayaala Emboosi Ndai! 17Olwohuba nimba niihola omulimo kuno hulw'ohudaha hwange omweene, mba hoyera omukabo; nae lutaali ohukuhola hulw'ohudaha hwange omweene, nguhola olwohuba Nasae yambeeresa ohukuhola. 18Mani omukabo kwaange nikwo okuli yena? Nikwo kuno busa: Ohuyaalira abandu Emboosi Ndai ebihaya, nitehonyera obunyala bwaange bw'ohuyaala Emboosi Ndai. 19Kata niindi omulehuule eyiri abandu boosi, omweene ndeehola omuboye w'abandu boosi, ndeete abandu bangi eyiri Kristo. 20Eyiri Abayudaaya, ndeeyira koti Omuyudaaya, hunyale ohuleeta Abayudaaya. Eyiri abatukibwa nende amalako ka Musa, ndeeyira koti otukibwa nende amalako ka Musa--kata omweene nitaali ohutukibwa nende amalako ka Musa--hunyale ohuleeta abatukibwa nende amalako ka Musa. 21Nae eyiri abali erwaanyi w'amalako ka Musa, ndeeyira koti oli erwaanyi w'amalako ka Musa, sino syekesa siti ndali mbula amalako ka Nasae, nae ndali ndukibwa nende amalako ka Kristo. 22Eyiri abakata, ndeeyira koti omukata, hu nyale ohuleeta abakata. Ndeehola buli siindu eyiri abandu boosi, hu nyale mu ngeri yoosi ohuwoniaho abandi. 23Bino byoosi mbihola hulw'Emboosi Ndai, hu nyale ohukabana hu habi chayo. 24Simumanyire muti mu mbiro abeeruhi boosi bakerana, nae mulala yeng'ene niye onyoola esisiimo? Mani yiruha nochiiririra ohunyoola esisiimo. 25Buli mwiruhi w'embiro yefwiirisa mu biindu biingi. Bahola batyo, hu banyale ohunyoola esitweetwe sinyaasiha, nae efwe hulwanirira esitweetwe sitaakama. 26Mani ese haba sinjiruha awuma esichiiririrwa, siindi koti omulwaani olwaania emboo; 27nae njuunia omubiri kwaange handi ndakutuka, ataali awo niimala ohuyaalira abandu bandi Emboosi Ndai, nyala omweene ohweyakaana nitahoyera omukabo kwayo.

will be added

X\