ABAKOLIITI YITAANGIRA 8

1Bulaanu ebidiira hu byohulya biba nibibeereseebwe emisaambwa: efwe humanyire huti, “efwe fweesi huli nende obumanyirifu.” “Obubanyirifu” buhudumbasa, nae ohudaha hwombaha. 2Omuundu yeesi nachaaka ohubaasirisa busa ati mbwe amanyire esiindu syoosi, haba saaba naamalire ohumanya koti lwaba nahoyeere ohumanya. 3Nae omuundu yeesi naaba nadaha Nasae, omuundu oyo aaba amanyihane nae. 4Mani sakira, koti byahadiira hu hulichaanga ebyohulya biba bibeeresebwe emisaambwa, efwe humanyire huti, “omusaambwa haba sikuli nende ohubaao hw'elalira daawe,” handi huti, “Nasae ali mulala yeng'ene.” 5Olwohuba kata niyiba niyinyala ohuba naliwo abo abanyala ohuba nibalaangwa mbwe banasaye Mukulu oba hu syaalo huno, koti mubwadyeri bweene baliwo “banasaye” bangi handi nende “abaami” bangi 6kata katyo, eyiri efwe, Nasae ali mulala yeng'ene, oli Seefwe, owahola ebiindu byoosi, handi oyo yihubeerawo abalamu, handi Omwaami mulala yeng'ene, Yesu Kristo, yi biindu byoosi byabitiramo hu byaloongwa, yihubitiramo hu hwaaba abalamu. 7Kata katyo, abandu boosi haba sibali nende obumanyirifu buno daawe. Nae abandi, ohubitira muhunaliirira ohuba nende emisaambwa, balichaanga ebyohulya koti ebiba nibimalire ohubeeresebwa omusaambwa; mani ebibaaso byaabwe, koti lubiri ebikata, binyaasibwa. 8Ebyohulya haba sinibyo ebirituyira eyiri Nasae daawe. Efwe haba sihuba nihuli bubi muno mu moni wa Nasae nikali mbwe haba sihulya esiindu syoosi, handi kata sihunyala ohuhirao obulayi nihulya. 9Ohutusaho mbwe muhoyeere ohwehaliirisa, hu bulehuule bweeng'we buno buhaye ohunyala ohwehola esiindu syegumulwaho nende ababa nibali abakata. 10Olwohuba mani omuundu yeesi niyeecha yaahubona ewe omuundu oliho nende obumanyirifu, nooli ohuliira mu nyumba y'emisaambwa, mani haba saaba achia ohudaha ohwemeeda, ebibaaso byae nibiba nibiri ebikata, ohulichaanga ebyohulya biba nibibereseebwe emisaambwa? 11Mani sakira ohutulana nende obumanyirifu bwao buno, omuundu mukata wuno aaba achia ohusihirisibwa, omwaana wasyeeng'we oyo yi Kristo aaba niyanyala ohufwiira. 12Esyeekesa mbwe, ohuholeraanga abaasyeng'we ebibi, handi nende ohuchunianga ebibaaso byaabwe nibiri ebikata bityo, muba muli ohuholaanga ebibi mu moni wa Kristo. 13Mani sakira, nikali mbwe ebyohulya nibyo ebiba nibikera owasyaange ohukwa, ese siimba ninjia ohulya enyama, takera owasyaange yaakwa.

will be added

X\