ABAKOLIITI YITAANGIRA 7

1Bulaanu ebidiira hu biindu bimwanyandiikira. Silayi musaacha obutadeehya. 2Nae ohweema hu sihemo syobuyirani, buli musaacha ahoyeere ohuba nende omuhasi wae handi buli muhasi yesi ohoyeere ohuba nende omusaacha wae. 3Omusaacha ahoyeere ohwoseresa omulimo kwae koti omusaacha eyiri omuhasi wae handi nilwo nasilala nilwo lu muhasi ahoyeere ohwoseresa omulimo kwae koti omuhasi eyiri omusaacha wae. 4Olwohuba omuhasi haba siniye ofuka omubiri kwae omweene, nae omusaacha niye okufuka; handi nilwo nasilala, lu musaacha, atafuka omubiri kwae omweene, nae omuhasi niye okufuka. 5Abadehisania, mutahayanaanga abeene-na-beene daawe, ohutusaho awundi abeene nimufukiirisaanie hulw'esiha esidiidi, hu munyale abeene ohunyoola esiha sy'ohwekongooya; nae nimumalire, mukobolaneengeho alala handi, ataali awo, Sitaani anyala ohubahema olwohutaba nende amaani k'ohwefuka abeene. 6Mboola endyo nga ndaha ohubeekesa busa, ataali ohubabeeresa elako. 7Ndahekombere ohubona endi abandu boosi bali koti lundi. Nae buli muundu ali nende esiyaanwa syae esyenjawulo ohutula eyiri Nasae, owundi aba nende esy'engeri ndala, nae owundi yaaba nende esyengeri yindi. 8Eyiri abasisiiri ohudeehisania, nende abahasi bafwiire, mboola endi, nesilai badong'e bong'ene koti busa lundi. 9Nate nibatanyala ohwefuka abeene, bahoyeere ohudeeha. Olwohuba silayi muno ohudeeha ohuhira ohunyaahana nende obwekoombi. 10Eyiri abadehisania, haba sineese obabeeresa elako, nae niye Omwaami mweene obabeeresa, mbwe omuhasi haba sahoyeere ohuloba omusaacha wae, 11(nae niwichuhira yaaloba, lehe adoong'e yeng'ene ataali awo, lehe akobole eyiri omusaacha wae) handi omusaacha aterusaanga omuhasi wae. 12Eyiri abadong'ereyo, ese ataali Omwaami mboola endi, nabaao owasyeefwe yeesi oli nende omuhasi, otaali omufukiiriri, mani omuhasi yafukiirira ohumenya nae, owasyeefwe oyo ateerusanga omuhasi otaali omufukiiri oyo. 13Omuhasi yeesi oli nende omusaacha otaali omufukiiriri, nae omusaacha oyo yafukiirira ohumenya nae, omuhasi oyo atalobaanga omusaacha otaali omufukiiriri oyo. 14Olwohuba omusaacha otaali omufukiiriri alabiswa ohubitira mu muhasi wae, handi omuhasi otaali omufukiiriri alabiswa ohubitira mu musaacha wae. Ataali awo, abaana beeng'we sibachia huba aboolerefu, nae koti lusiri abaana abo aboolerefu nibo. 15Nae omuundu otaali omufukiiri niyekoomba ohukabuhana, lehe sibe koti lwadaha; mu ngeri yino, owasyeefwe mufukiiriri aba ali omulehuule. Olwohuba Nasae ohutulaanga yadaha hube emireembe. 16Muhasiiwe, omanyire otye nooli niiwe owahaonie omusaacha wao? Musaacha-ewe, omanyire otye nooli niiwe owahaonie omuhasi wao? 17Mani siri mbwe, muleheenge buli muundu anyala ohuba mu bulamu bu Mwaami aaba niyamutekehera, handi bu Nasae aaba yamulaangiramo. Lino nilyo elako lyaange liindaha libe mu mikaanda ch'Abakurisito boosi. 18Mani aliwo muundu yeesi hweeng'we esiha siyalaangirwamo owali niyamala ohuhebwa? Mulehe omuundu koti oyo atahaaba ohwemalaho embala ch'ohuhebwa daawe. Mani aliwo omuundu yeesi hweeng'we esiha siyalaangirwamo owali nasisiiri ohuhebwa? Mulehe omuundu koti oyo atahaaba ohuhebwa daawe. 19Olwohuba kata ohuhebwa haba sihuli nende omugaso kwoosi, oba ohutahebwa hwosi, nae esiri nende omugaso muno ni ohwoseresaanga amalako ka Nasae. 20Buli muundu yeesi ahoyeere adoong'enge mu bulamu bwaaba yalaangibwa nalimo. 21Wali nooli omuwaambe esiha siwali nolaangirwamo? Otafwayo daawe. Nae nooba nonyala, lwaana obe omulehuule, wefunire omweene ehabi eyo. 22Olwohuba oyo yeesi oba niyalaangwa mu Mwaami naali omuwaambe, bulaanu ali omuundu mulehuule ow'Omwaami. Nasilala bityo, oyo yeesi owali omulehuule niyali nalaangwa, bulaanu ali omuwaambe wa Kristo. 23Eng'we mwamala ohukulibwa hu bbeyi; mani muteecha handi mwaakanya ohwehola abawambwa busa nende abandu. 24Mani sakira, eng'we basyaange, abyahaba mbwe ni mu bulamu siina buli muundu hweeng'we mwaba yali niyalaangwa, adoong'e busa mu bweene obwo naali nende Nasae. 25Bulaanu ohudiira hu bandu batadeehisania, ese haba siindi nende esilagiro esitula eyiri Omwaami daawe, nae ese nyala ohutusa esibaaso syaange omweene, niindi koti oyo owanyalirwa nende esisa sy'Omwaami ohuba omuundu owesikiha. 26Ese ndi ohubaasa endi ohweema hu bidinyu biriwo endaalo chino, silayi nisyo hulw'omuundu ohudoong'a koti lwali busa. 27Oli nende omuhasi yiwadeehya yeesi? Mani otahaaba ohunyala ohumwetusaho daawe. Ewe haba soliho nende omuhasi yeesi yiwadeehya? Mani otahaabaho ohunyoola yonyala ohudeehya daawe. 28Nae niwoola wanyala ohudeehya, awo haba sooba nooholere esibi, nae omuhaana yeesi niyoola yadeeha, yesi haba saaba naaholere esibi daawe. Kata katyo abo boosi abadehisania, paka bacha ohunyoolaanga ebidinyu by'ohusyaalo huno, nae ndahadahire ohubaonia mweesi ebidinyu ebyo. 29Ese esiindu siindi ohweekesa nisyo sino basyaange, esiha syateebwao simalire ohuduuduya muno; ohutula olwaleero ohuchia mu moni, mulehe abo boosi abali nende abahasi babadeehya bachaake ohumenyaanga koti abo abati nibadeehya hooho, 30nae abo abali ohuliraanga, bamenye koti abo abataali ohuliraanga daawe, nae abo abali ohusangalaanga, bamenye koti abo abatasangaalaho, nae abo abali ohukulanga, bamenye koti abo ababulaho kata nende esiindu syoosi, 31nae abo abali ohuholeganaanga nende esyaalo, bamenye koti abo abataaliho nende ohuholegana nende esyaalo daawe. Olwohuba emera y'esyaalo sino eyiriwo yino, yicha niyiwaao. 32Ese ndaha eng'we mu menye nimutaali nende ebibelalihirsa byoosi. Omusaacha oba natadeehya, yelalihirira ebiindu bidiira hu Mwaami byong'ene, koti nga lwanyala ohusangaasa Omwaami; 33nae omusaacha oba niyadeehya yelalihirira busa ebiindu by'ohusyaalo huno, koti nga lwaananyale ohusangaasa omuhasi yaaba niyadeehya, 34mani ebichiiririrwa byae biba nibyakabuhanamo. Nae omuhasi oba omuhaana oba natadeeha, abaawo niyelalihirira ebiindu bidiira hu Mwaami byong'ene, koti nga lwanyala yaaba naali omwolerefu mu mubiri nende mu mwooyo; nae omuhasi oba niyadeeha, abaawo niyelalihirira ebiindu bidiira hu syaalo huno byong'ene, koti nga lwanaanyale ohusangaasa omusaacha wae wamudeehya. 35Ese ndi ohuboolaanga bino byoosi hulw'obulayi bweeng'we, nitadahaho kata nabudiidi ohubadwiihaho ebidinyu byoosi daawe, nae ohunyala ohuniinia ehola ndayi handi nende ohunyala ohuwonia obuheeri bweeng'we bw'Omwaami buhaye ohunyala ohukabuhanisibwamo. 36Mani omuundu yeesi naaba namanyire ati haba saali hweyiraanga bulai mu moni w'omuhasi yaaba nafukiirisaanie ohudeehya, obwekoombi bwae nibuba nibuli obuungi muno, koti busa lusihoyeere ohuba, mu mulehe omweene ahole busa koti lwaaba nadaha: mu balehe badehisanie, haba sisiba nisi esibi daawe. 37Nae oyo oba naamaliirire busa mu mwooyo kwae, nataaliho ohuyiikwa hwoosi daawe, ohutusaho busa koti lu mweene aba nanyalire ohufuka obwekoombi bwae, handi omweene amaliriire ohuba atyo mu mwooyo kwae, ohumuliinda busa naali atyo koti oyo yafukiirisaanie nae ohudeehya, aba aholere bulai busa. 38Mani sakira oyo yeesi owoola ohudeehya yaaba niyanjulana nae, aba anabechaanga naaholere esiindu silayi muno; nae oyo onyala ohweliinda yaahaya ohudeehyaho aba anabechaanga nanyalire ohuhola esihiramo obulayi. 39Omuhasi yeesi owadeeha, aaba aasi w'obunyala bw'omusaacha oba niyamudeehya ohwoola lu musaacha oyo afwiira. Omusaacha oba niyamudeehya oyo niyoola yaafwa, omuhasi oyo aaba yoolere ohuba omulehuule onyala ohudeehisibwa nende omusaacha wundi yaaba nadahire, nae nibadehisanisirya mu Mwaami byong'ene. 40Nae ohweema hu hubaasa hwange, omuhasi koti oyo atyo, aba achia ohuba omusangaafu ohirao nikali mbwe omweene ahengawo ohudoong'a koti lwaba naali. Nihaandi ese mbaasa endi ndi nende Mwooyo wa Nasae.

will be added

X\