ABAKOLIITI YITAANGIRA 6

1Omuundu mulala hweeng'we naaba naali nende ohwekanyiisa hwoosi hu waasye, yenyiira atye hu yoola yaacha enamalako mu moni w'abandu bataali abalungifu, musifwo sy'ohuchia eyiri abalungifu eng'we? 2Eng'we haba simumanyire muti abalungifu nibo abacha ohuheengera esyaalo omusango? Mani nikali mbwe esyaalo sichia ohuheengerwa omusango nang'we, mani mwahaba nimutanyala ohuwosesa obusaango budiidi-diidi butyo? 3Eng'we simumanyire muti, niifwe abacha ohuheengera kata nende bamalaika omusango? Mani hwaaka yena ohuhola hutyo, ebiindu bidiira busa hu bulamu buno! 4Nikali mani mbwe muba nende emisango chifwaana chityo, lwasiina mucha nimuchita mu moni waabo abalekeresebwa batyo nende omukanda kw'Abakurisito? 5Ese ndi ohubaboolera endyo hu munyale ohuswaala. Awundi sinyala ohuba mbwe mweng'we mubulamo omuundu oli nende amakesi kanyala ohukabula abahungu b'olwaanyi luno, 6hu bulaanu omuundu yeteeho ohuchia enamalako ohuwabira owaasye, mani busa mu moni w'abakafwiiri? 7Mberi, ohwoola ohuba nende emisango ch'ohulaka amalako syekesa ohuhirwa hweeng'we. Lwasiina mani simunyala mwesimiirisira ohuholwa bubi? Lwasiina haba simunyala ohubachirwa? 8Nae koti eng'we mwesi abeene mukosa handi mubachira, handi mani muhola mutyo Abakurisito basyeeng'we. 9Eng'we haba simumanyireho muti abo abataali abalungifu haba sibachia husihira obwaami bwa Nasae? Mutebachaangaho; kata owesifwaabi, oba ow'emisaambwa, oba omuyirani, oba oyirana mu ngeri yitaali eyifukiirirwa, 10kata abeebi, kata ab'okuliira, kata abameesi, kata abachalaasi, kata abanyaka haba sibachia ohusihira obwaami bwa Nasae daawe. 11Mani handi mbwe abandu bandi bafwaana batyo abali nibali mweng'we. Nae kali mbwe eng'we mwamala ohwoosebwa, mwamala ohulabisibwa, mwoola ohuholwa abahoyera mu liita ly'Omwaami Yesu Kristo handi nende mu Mwooyo owa Nasae weefwe. 12“Ese hoyera ohuhola ebiindu byoosi,” nae abindu byoosi haba sibiri nende obuhoonyi daawe. “Ese hoyera ebiindu byoosi,” nae haba sinyala hufukibwa nende esiindu syoosi. 13“Ebyohulya byateebwao hu lweenda handi enda hulw'ebyohulya” -- handi Nasae achia ohusihirisa byombi syasilala-silala. Omubiri haba sikwaholerwa esifwaabi, nae hulw'Omwaami, handi Omwaami hulw'omubiri. 14Handi Nasae niye owasyuusa Omwaami, handi lwosi achia ohutusyuusa nende amaani kae. 15Eng'we haba simumanyire muti, emibiri cheeng'we chiri ebituundu bya Kristo? Mani bulaanu mbwe sakira ndaabukule ebituundu bya Kristo mani ndamala ndabihola handi byaaba ebituundu by'omudaamba? Haba bbe! 16Eng'we haba simumanyire muti oyo yeesi oweyambaania omweene hu muhasi mudaamba yehola omubiri mulala nae? Olwohuba, koti busa lusyandiikibwa siti, “Bombi abo bacha ohwehola omubiri mulala.” 17Nae oyo owaambanisibwa hu Mwaami, yehola omwooyo mulala nae. 18Mwebwaabe esifwaabi. Buli sibi siindi syoosi, si muundu ahola si busa erwaanyi w'omubiri; nae omusaacha wesifwabi yonoona eyiri omubiri kwae omweene. 19Ewe haba somanyire oti omubiri kwao okwo kuli enyumba ya Mwooyo Mwolerefu ohulimo, yiwanyoola ohutula eyiri Nasae? Ewe haba sooli weng'ene hubwao; 20wamala ohukulibwa nende obukusi buhoongo. Mani sakira ohoyeere ohubeeresa Nasae oluyaali nende omubiri kwao.

will be added

X\