ABAKOLIITI YITAANGIRA 5

1Mubwadyeeri bweene syaboolehana mbwe aliwo esifwaabi mweng'we, handi esyengeri kata eyitanyala hunyoolehana kata nende mu bakafwiiri; mbwe omusaacha amenya busa nende omuhasi wa simwaana. 2Ni handi muli nende esihanyaali! Eng'we haba simunyala ohubaaho kata nimwahabeere mbwe mulira bulira? Mulehe oyo owahola sino yerusibwe ohutula mweng'we. 3Olwohuba andahaba mbwe siindi alala nang'we mu mubiri, nae ndi alala nang'we mu mwooyo, handi busa koti lundahaholere nindiwo, malire ohutuumbula eheengao yange 4mu liita ly'Omwaami Yesu eyiri omusaacha oyo owahola esiindu sifwaana siti. Mani nimuba nimunaba nimuhung'aanire alala, mani omwooyo kwaange kwosi nikuli alala nang'we, nikuli nende amaani k'Omwaami weefwe Yesu, 5muhoyeere mwebwaabe omusaacha oyo ache eyiri Sitaani anyale ohusihirisibwa omubiri kwae hu mwooyo kwae kunyale ohuwonisibwa hu ludaalo lw'Omwaami Yesu. 6Ohweniinia hweeng'we ohwo, haba sinohulayi daawe. Eng'we haba simumanyire muti, ahamera hadiidi busa niho ahanyalanga ohubbaaha esiniho siingi? 7Mweyosemo emera hale, hu mweemeo munyale ohuba esiniho siyaaha, koti lumuli abataali ababbaahe. Olwohuba Kristo, ekoondi lyeefwe lya Paasaka, lyamala ohwiitibwa. 8Mani mulehe efwe hweliire esidyaalo, nihutaali nende emera hale, emera ly'ehiinda nende obubi, nae nende omugaati kutabbaahirwe okw'obuluungifu nende obwadyeeri. 9Ese ndabaandiikira hale mu bbarwa yange endi mutaholeraanga alala nende abandu b'esifwaabi daawe; 10ataali abesifuto ab'omusyaalo muno, oba abokuliira nende abanyaka, oba ab'emisaambwa, koti nibiba bityo biba binabadahisa ohutulira elalira mu syaalo muno. 11Nae kata katyo, ese ndabandiikira hale endyo obutaholeganaanga nende oyo yeesi oliho nende eliita ly'omwefwe, nikali mbwe anyoolehaane ohuba nende omufuto oba okuliira, oba naaba naali ow'emisaambwa, oba omuchalaasi, omumeesi, oba omunyaka--kata obutalichaanga nende omuundu ofwaanaho atyo daawe. 12Olwohuba naange bindiiraho bitye ohwoola ohuheengera omusango abo abali erwaanyi? Mani simubaasa muti ni abo ababa nibali mu bakristo booba ohoyeere ohuheengera omusango? 13Nasae niye ohengeraanga abo abali erwaanyi omusango. “Mwirusire elalira omudamaanu oyo abatulemo.”

will be added

X\