ABAKOLIITI YITAANGIRA 4

1Yino niyo engeri yi muundu yeesi ahoyere ohubaasiramo: Huli abahalaabani ba Kristo, handi ababiihi be byaama bya Nasae. 2Nae handi kali mbwe syeenyeha siti, buli mubiihi yeesi ahoyeere ohunyoolehana naali owesikiha. 3Nae ese hulwaange, n'esiindu esidiidi muno ohubona mbwe ese ndi ohusereechwa nang'we, oba nende esiina sy'abandu busa. Kata omweene haba sinyala hwesereecha omweene. 4Ese haba siimanyire esiindu syoosi esinjooma haba daawe, nae kata katyo sisyekesa mbwe ohweema hweesyo, haba sinyala ohuba omulehuule daawe. Nasae mweene niye oli nende obunyala bw'ohusereecha. 5Mani sakira mutateemaho ohwetuliirisa ohuheengera omusango esiha nisisisiiri ohwoola, Omwaami natoola ohwiicha, oyo ochia ohuleeta mu bulafu ebiindu byakisibwa mu siirima, handi ochia ohutuumbula ebifune by'omwooyo byoosi. Awo niwo aabuli muundu yeesi achia ohunyala ohunyoolera syahoyera ohunyoola ohutula eyiri Nasae. 6Ese mbawo ndingaasire ebiindu bino byoosi eyiri ese omweene nende yiri Apolo hulw'obulayi bweeng'we, baana beefwe, hu mweemeo munyale ohweeka nimutuboneraho efwe mutanyala ohuchalaaliha mwabita ebyo ebyandiikibwa byong'ene, hu bulaanu abulewo mweng'we omuundu yeesi onyala ohufwiimbikitana niyechuule ohukwiira mulala yeng'ene ohuhiraho owundi. 7Olwohuba ni naanu mweene oli nende obunyala obwohubona esiindu syoosi esikeni mweng'we? Siina syeene simuli nasyo simutabeeresebwa busa? Nikali mani mbwe mwabeeresebwa busa, lwasiina muli ohweniinia koti lusitaali busa esiyaanwa sy'ebihaya yimuli? 8Mbao hane mwamala ohwikuta! Mbao hane mwamala ohwehola abagaga! Kata efwe nihusisiiri, nae eng'we mbawo mwamala ohwehola abatuki! Mani muhoya mwaaba nimuli nende ohutuka, hu fwesi hwanyala ohukabanira alala nang'we obutuki obwo! 9Olwohuba ese ndi ohubaasa endi, Nasae yamala ohutuhola efwe abatume hwafwaana koti abasembayo mu bandu boosi, handi koti abandu bamala ohuheengerwa omusango kw'ohufwa; olwohuba hwamala ohwehola esyohwelolera eyiri esyaalo, eyiri bamalaika nende eyiri abandu. 10Efwe huli koti abasiru hu lwa Kristo, nae eng'we mwehola abakesi mu Yesu. Efwe huli koti abakata, nae eng'we muli abamaani. Eng'we muli mu bifwo byoluyaali, nae efwe huli mubilekeresebwa. 11Ohwolera elalira hu saa yino yene, efwe huwoonga enjala handi hulumwa obuluwo, hwefwaala ebiseke nihutoochwa, handi hwahaywa ohuba nende amadaala, 12handi hudidiihana nende emirimo, nihwehoonyera amahono keefwe keene kano. Nihuholimirwa, efwe husabira emikisa; nihusaandisibwa, efwe hwesimiirisa busa; 13nihunyekebwa, efwe hweyisa aasi hwadaha husasane; humalire ohwehola, nihaandi mbawo bulaanu huli, koti ebikoha hu syaalo, ebiindu bihira ohusyuulibwa. 14Ese haba siindi ohwandiika bino endyo mbwe hu nyale ohubaswaasa, nae ohubeekesa koti ndaheekesa abaana baange baheerwa muno. 15Olwohuba amwahaba mbwe muli nende abakeraki abatabaliha mu Kristo, haba simuli nende baseeng'we abangi daawe. Olwohuba ese ndeehola hale seeng'we mu Kristo Yesu ohubitira mu mboosi ndayi. 16Mani ese ndi ohubekweeda endi mubonere hweese. 17Mani sakira ese ndatuma Timoteo, omuheerwa wange muno handi omwaana wange mwesikwa muno mu Mwaami, ohubechulisa koti obulamu bwaange bufwaana mu Kristo, koti mbasomesaanga buli yi njiira mu buli mukaanda kw'Abakurisito. 18Abandu bandi hweeng'we babeere nibali abesihanyaali, oti fwaana ese haba simbeere ninjia ohunyala ohwiicha yimuli daawe. 19Nae mbawo njicha ohwiicha eyo bwaangu, Omwaami nadaha, mani hu haye ohubonera elalira ebilai by'enomanoma y'abandu besihanyaali bano yong'ene, nae nende amaani kaabwe kosi akaaka. 20Olwohuba obwaami bwa Nasae haba sibubonehera busa mu hulomaloma busa nae mu maani. 21Siina syeene simudaha? Mudaha njiche yimuli nende olubbariki, oba nende ohudaha mu mwooyo kw'obuloonga busa?

will be added

X\