ABAKOLIITI YITAANGIRA 3

1Nae ese, baana beefwe, haba sindahanyalire ohubalomalomera koti olomalomera abo bali nende mwooyo daawe, nae koti eyiri abandu abali busa nende omubiri kwong'ene, handi koti abali abaana badoto mu Kristo. 2Ese ndabang'wesaanga busa amabeere, nae haba sindabaliisanga ebyohulya byomeranu daawe; olwohuba eng'we mwali nimutaaba abanyala ohubilya; handi kata katyo kata bulaanu buti mutaaba abanyala ohulya ebyo, 3olwohuba eng'we musisiiri busa abandu bali nende omubiri kwong'ene. Olwohuba nikali mbwe eng'we musisiirimo ehali-hali nende ohuyinduulana, haba simuba nimusisiiri abandu bali nende omubiri kwong'ene, handi nimwebisa busa koti abandu babuli ludaalo? 4Olwohuba nikali mbwe omuundu wundi aboola busa ati, “Ese ndi owa Paulo,” nae owundi ati, “Ese ndi owa Apolo,” awo haba simuba nimuli busa koti abandu babuli ludaalo? 5Bulaanu, Apolo wuno niye siina syeene? Paulo nae ni siina syeene? Bano boosi bahalaabani busa bamwabitiramo mwanyala ohufukiirira koti lu Nasae mweene yali nabatekeheere buli mulala. 6Ese ndataaka busa, Apolo nae nachuhiirira busa, nae Nasae mweene niye owahusa. 7Mani sakira, kata oyo oba niyataaka oba oyo yeesi oba niyachuhiirira haba saaba naali esiindu syoosi esihuluundu, ohutusaho Nasae oyo ohusaanga yeeng'ene. 8Oyo oba natakaanga, nende oyo oba nachuhiiriraanga, boosi baakanirira, handi buli otula achia ohunyoola omuheemba kwae okuchiana nende obuhosi bwae koti lubwaaka. 9Olwohuba, efwe fweesi huli busa abahosi baholera alala nende Nasae; eng'we nang'we muli emikuunda chae, handi Ebyombahe bya Nasae. 10Ohweema hu sisa sya Nasae sindabeeresebwa, niindi koti omwombahi muhuluundu mumanyirifu, ndeecha ndanyala ohutaawo omuse, nae omuundu wundi ali ohwombahiraanga hu bweene ohwo busa. Mulehe buli muundu yeesi yegenderese koti lwaaba naali ohwombahiraanga hubweene ohwo. 11Olwohuba abulao omuse kundi ku muundu wundi anyala yataawo, ohutusaho okwo okwamala ohuteebwawo, okuli Yesu Kristo. 12Mani bulaanu, omuundu yeesi naaba naali ohwombahira hu muse okwo nende efeesa, ebichuma, amakina malai muno, embaao, obunyaasi, amasaanyi 13buli mulimo kw'omuundu yeesi, kucha ohweyekesa okweene; olwohuba Oludaalo olwo lucha ohukukisula, olwohuba kucha ohweyekesera mu muliro, handi omuliro okwo kucha ohupiima engeri ya buli mulimo koti lukufwaana ku buli muundu aaba niyahola. 14Nikali mbwe omulimo ku muundu yeesi aaba niyombahira hu muse kunyala ohuwonamo, aaba achia ohunyoola esisiimo. 15Nae omulimo kw'omuundu yeesi nikunyala ohuya busa omuliro, omweene aaba achia ohuba niyabonerera ebihaya byeene, kata nende nibiba mbwe omweene aaba achia ohunyala ohuwonisibwa, nae naaba naali koti oyo obitiiswe mu muliro. 16Eng'we haba simumanyire muti muli enyumba ya Nasae daawe, handi muti Mwooyo wa Nasae yesi yamenya mweng'we? 17Mani omuundu yeesi nasihirisa enyumba ya Nasae, Nasae mweene aaba achia ohumusihirisa yesi. Olwohuba enyumba ya Nasae yiba niyiri enjolerefu, nihaandi enyumba ya Nasae eyo niyo ewe mweene. 18Mulehe omuundu yeesi alehe ohwebacha omweene. Omuundu yeesi mweng'we abaasa ati ali omukesi muno mu luse luno, mulehe yehole omusiru hu yeemewo anyale ohuba omukesi. 19Olwohuba amakesi k'esyaalo sino n'obusiru bweene eyiri Nasae. Olwohuba syandiikwa siti, “Nasae adiyisiryanga abakesikesi mu bukodyo bwaabwe abeene,” 20handi siti, “Omwaami amanyire ati ebibaaso by'omuundu mukesi-kesi busiru bwereere.” 21Mani sakira mutaleha omuundu yeesi yachaaka ohweninisirya hulw'abandu busa. Olwohuba ebiindu byoosi nebyeeng'we, 22ayahaba naali Paulo oba Apolo oba Keefa oba esyaalo sino oba obulamu oba ohufwa oba esiha sino oba esiha siicha, byoosi neby'eng'we busa; 23nae handi eng'we mweesi muli abandu ba Kristo; nae Kristo mweene wa Nasae.

will be added

X\