ABAKOLIITI YITAANGIRA 15

1Bulaanu njia ohubeechulisa basyaange, engeri siina yimbayaalirangamo emboosi ndayi, yimwanyoola, yimwemeremo, 2eyibawonia, nikali mbwe muyidiira mwayomiisa--ohutusaho nikali mbwe ohufukiirira hweeng'we hubulamo esifune. 3Olwohuba ndabaleetera koti esihuluundu sihiramo byoosi, esyo si syesi ndanyoola, esiri mbwe, Kristo yafwiira ebibi byeefwe ohweema koti ebyandiiko byolerefu lubiboola, 4biti yasiihibwa, biti yasyuhisibwa hu ludaalo lw'ohudatu ohweema koti ebyandiiko byolerefu lubiboola, 5handi biti yabonehera Keefa, handi nende ehumi-na-babiri bala. 6Handi yeecha yabonehera abafukiiriri babita emia chitaanu ehabi lala, abahira obuungi hubo basisiiri abalamu, kata nende abandi bamala ohukona endoolo. 7Handi yeecha yabonehera Yakobbo, handi nende abatume boosi. 8Olumaliiriha lweene, koti eyiri oyo oteebulwa koti abandi bebulwaanga, syesi yambonehera. 9Olwohuba ese nise ohiramo obudiidi oluyaali, otahoyera kata ohulaangwa omutume, olwohuba ndaboniabonia abafukiiriri ba Nasae. 10Nae hulw'esisa sya Nasae, mbano ndi koti lundi, handi esisa syae esyo eyiri ese haba syali esyebihaya. Hulubeka lundi, ndahalaabana muno ohuhira abo boosi, kata nende nitaali ni nise, nae esisa sya Nasae esiri naange. 11Kata nende mani nindali ese oba abeene abo, hu yaala hutyo, handi mwesi mufukiirira mutyo. 12Bulaanu nikali mbwe Kristo ayaalwa koti oyo owasyuuhisibwa ohutula mu bafu, omuundu wundi nae anyala atye ohuboola ati, abulao ohusyuuhira hw'abafu? 13Nae nikali mbwe abulao ohusyuuhira hw'abafu, mani kali mbwe Kristo haba siyasyuuhisibwa; 14nae nikali mbwe Kristo haba siyasyuhisibwa, mani kali mbwe ohuyaala hweefwe hw'ebihaya, handi efukiirira yeng'we yosi y'ebihaya. 15Huba hunyoolehana ohuba nihutahihirira Nasae bulai, olwohuba hwekesaanga huti Nasae niye owasyuusa Kristo, yatasyuusa nikali mbwe siri esyadyeeri mbwe abafu haba sibasyuuhisibwa. 16Olwohuba abafu nikali mbwe haba sibasyuuhisibwa, mani kali mbwe Kristo haba siyasyuhisibwa. 17Nikali mbwe Kristo haba siyasyuhisibwa, efukiirira yeng'we yiba niyiri eyiibula obuhoonyi, mani musisiiri mu bibi byeeng'we. 18Mani abo bosi abamala ohukona nibali mu Kristo baba basihirira busa. 19Nikali mbwe nihulw'obulamu buno bwong'ene luhwasuubiriraho Kristo, mani mu bandu boosi niifwe abo abahoyeere nihusaasirwa muno. 20Nae mu bwadyeeri bweene, Kristo yasyuhisibwa ohutula mu bafu, ohuba ebyaamo bitaangira eby'abo abamala ohukona endoolo. 21Olwohuba koti lu hubitira mu muundu ohufwa hwecha, handi ohubitira mu muundu ohusyuuhira ohw'abafu, hwosi hwamala ohwiicha. 22Olwohuba koti mu Adamu abandu boosi bafwa, mani lwosi mu Kristo, abandu boosi balamusibwa. 23Nae buli muundu ohweema hu hutekeherwa hwae: Kristo ebyaamo bitaangira, mani hulw'ohwichira hwae, baloondeho aba Kristo. 24Mani enjakamo huyaheeche, niyahabe nadiisa obwaami eyiri Nasae Omuloongi naamalire ohusihirisa buli butuki handi nende buli bunyala nende amaani. 25Olwohuba ahoyeere ohutuka ohwoola lwaalimala ohuta abasuku bae boosi mu makulu kae. 26Omusuku olisembayo ohusihirisibwa niye ohufwa. 27“Olwohuba Nasae yamala ohuta ebiindu byoosi aasi w'obunyala bwae mu makulu kae.” Nae nikaboola kati, “Ebiindu byoosi bicha ohuteebwa aasi w'obunyala bwae aasi wae,” siba siboneha alafu mbwe omweene aba naleheebwe oyo ochia ohuta ebiindu byoosi aasi wae. 28Ebiindu byoosi nibimalire ohuteebwa aasi w'obunyala bwae, awo niwo yi mwaana mweene yesi achia ohuteebwa aasi w'obunyala bwae oyo oba niyata ebiindu byoosi aasi wae, hu bulaanu Nasae anyale ohuba buli siindi eyiri buli muundu. 29Ataali awo, abandu baba nibekesaanga siinna nibabatiisibwaanga hulw'abafwa? Nikali mbwe abafwa haba sibasyuuhisibwaho kata, lwasiina abandu babatiisibwaanga hulw'abwe? 30Lwasiina ese mweene ndi mu lumbe buli siha? 31Ese nyiingana, basyaange, nende esuunga yange mweng'we, yindi nayo mu Kristo Yesu Omwaami weefwe, fwa busa buli ludaalo! 32Siina syeene siimba ninyoola, muhulomaloma hwa buli ludaalo, ndalwaana nende amanani mu Buwefeeso? Nikali mbwe abafu haba sibasyuuhisibwa, “Mulehe hweliire, handi hweeng'weere, olwohuba muchuli hucha ohufwa.” 33Mutabachibwaanga: “Emikaanda mibi chinyaasa ebiima bilai.” 34Mukobolemo amakesi, mani muhaye ohwonoona handi. Olwohuba abandi mweng'we haba sibamanyireho Nasae. Mboola sino ohubaswaasaho. 35Nae omuundu wundi anyala ohuteeba ati, “Abafu basyuhisibwa batye? Beecha nende omubiri kw'engeri siina?” 36Omuundu n'omuusiru! Esiindu syotaaka, haba sisimera ohwoola lusifwa. 37Handi esiindu syotaaka haba sinikwo omubiri okucha ohumera, nae ni olumwo lwereere, awundi olwengaano oba olw'emere yindi. 38Nae Nasae yeecha yaaluba omubiri koti omweene lwaaba nadoolere, handi hu buli ngeri y'olumwo, omubiri kwaalwo kweene. 39Olwohuba enyama choosi haba sichifwaanana, nae yiriwo ndala ey'abandu, eyiindi eyebisolo, eyiindi y'amayoni, nae eyiindi y'eng'eeni. 40Aliwo emibiri cho Mukulu, handi aliwo emibiri chohusyaalo; nae oluyaali lw'omu Kulu luli hubwaalwo, handi oluyaali lw'ohusyaalo, lwosi lundi. 41Aliwo oluyaali lw'elyuuba, handi nende oluyaali lundi olw'omwoosi, handi oluyaali lundi olw'ening'ining'i; olwohuba buli ning'ining'i yikabuhaane nende eyaasye mu luyaali. 42Mani syosi siri sityo nende ohusyuuha hw'abafu. Esitaakibwa sisihirira, nae esyo esisyuhisibwa haba sisisihirira. 43Sitaakibwa nisilekeresebwa, sisyuuhisibwa mu luyaali. Sitaakibwa mukata, sisyuuhisibwa mu maani. 44Sitaakibwa nisiri omubiri kuboneha, sisyuuhisibwa nisiri omubiri kw'omwooyo. Nikali mbwe kuliwo omubiri kubonehana, mani handi kuliwo omubiri kw'omwooyo. 45Mani sakira syandiikibwa siti, “Adamu omuundu wataangira yeecha yehola esiindu silamu”; Adamu wasembayo, yeecha yehola mwooyo okaba obulamu. 46Nae haba esy'omwooyo sinisyo esitaangira, nae esibonehana nisyo esitaangira, mani hu sy'omwooyo syalondaho. 47Omuundu wataangira yatula mu loba, omuundu otula mu lufu; omuundu w'ohubiri nae atula Mukulu. 48Koti lu muundu w'olufu yali, nilwo lubali abo abatula mu lufu; handi koti lwali omuundu owomu Kulu, nilwo lubali abo abomu Kulu. 49Koti busa luhwanyoola esifwaanani esy'omuundu ow'olufu, hucha handi ohunyoola esifwaanani esy'omuundu wo Mukulu. 50Mbaboolera sino, basyaange: enyama nende amabaanga haba sibinyala hunyoola obwaami bwa Nasae, kata ebiindu bisihirira byosi sibinyala hunyoola ebitasihirira. 51Eee! Njia ohubaboolera esyaama. Fweesi haba sihuchia ohuba sihwamala ohukona endoolo, nae fweesi hucha ohuchuusibwa, 52mu siha sidiidi muno, koti mu hukwiisa emoni, hu huubbwa hw'eturumbeta huseembayo. Olwohuba eturumbeta yicha ohuubba, mani abafu bacha ohusyuuhisibwa nibatahanyala ohusihirira, mani fweesi hucha ohuchuusibwa. 53Olwohuba obulamu bweefwe busihirira buno, buhoyeere ohwefwaala obutasihirira, handi obulamu bweefwe bwaakama buno, buhoyeere ohwefwaala obutaakama. 54Ohusihirira nihumala hwafwaala ohutasihirira, handi mani ohuwaao hwamala hwefwaala ohutawaao, awo niwo aliba ohwolerera ohw'enomanoma yandiikibwa yiti: “Ohufwa humirirwe mu huyiingira.” 55“Aaa ohufwa, ohuyingira hwao huli yena? Aaa ohufwa, obuluungu bwao buli yena?” 56Obuluungu bw'ohufwa buli mu sibi, handi amaani k'esibi kali mu malako ka Musa. 57Nae Nasae yebale, oyo otubeeresa obuyiingiri ohubitira mu Mwaami weefwe Yesu Kristo. 58Mani sakira, basyaange baheerwa, mube abomiifu, abatadenganisibwa, buli siha nimuhayiire mu mulimo kw'Omwaami, nimumanyire muti mu Mwaami oyo, obuhalaabani bweeng'we haba sibuchia huba obwebihaya.

will be added

X\