ABAKOLIITI YITAANGIRA 14

1Hola ohudaha hube esichiiririrwa syao, handi wekoombe bulai ebiyaanwa by'omwooyo, ohuhirira elalira mbwe onyale ohuyalaanga. 2Olwohuba oyo olomaloma mu nimi, haba saalomalomera abandu nae Nasae; olwohuba awumawo omuundu oba namuwulira, nae aba atumbula busa ebyaama mu Mwooyo. 3Nae hu muhono kundi, oyo oyaala emboosi ya Nasae, aaba alomalomera abandu hu banyale ohuhula handi bombahibwe handi balemesebwe omyooyo. 4Oyo olomaloma mu lulimi lundi aaba yeyikusa omweene, nae oyo oyaala yekusa abafukiiriri. 5Bulaanu ese ndaha eng'we mulomalome mu nimi, nae ndahadahire ohuhirao muyaaleenge. Oyo oyaala muhunuufu muno ohuhira oyo olomaloma mu nimi, ohutusaho omuundu wundi naaba naliwo onyala ohutuumbula amahulundu, hu bafukiiriri banyale ohwikuswa. 6Bulaanu, basyaange, niinjicha yimuli ninomanoma mu nimi, mba njia ohubahoonya endye, ohutusaho nimba nimbaleetera ohubwiihulirwa oba obumanyirifu oba amayaalo, oba ameeko? 7Kata ebihubba bitaalimo obulamu, koti elere oba endoongo, nibitatusa amakono kawuliirihana, omuundu yahamanya atye esiba nisiri ohuubbwa? 8Nae ehoombi niyitusa ekono litawuliirihana bulai, ni naanu oba achia ohwetekeha ebiita? 9Sakira kata mwesi; nimuba nimulomaloma enimi echitaamanyihaane, omuundu aaba achia ohumanya atye esiba nisiboolerwe? Olwohuba muba mucha ohuba nimulomalomera busa emboo. 10Ataali ohukana-kana aliwo enimi enyiingi mu syaalo, nae abulao olutaalimo amahulundu; 11nae nimba nitaamanyire amahulundu ak'olulimi lwoosi, mba njia ohuba omukeni eyiri omulomalomi, handi omulomalomi oyo aaba achia ohuba omukeni yiindi. 12Sakira kata mwesi; koti lumuli nende amawofu ohubona ebiholwa bya Mwooyo, mulwaanirire ohwemeeda mu hwombaha abafukiiriri. 13Mani sakira, oyo olomaloma mu lulimi lundi, ahoyeere ohwekongooya Nasae yaamuba amaani ak'ohutuumbula amahulundu. 14Olwohuba nindekongooya mu lulimi lundi, omwooyo kwaange nikwo okuba nikwekongooya, nae ebibaaso byaange biba haba sibiri nende obuhoonyi bwoosi. 15Siina syeene siimba hole? Njia ohwekongooya nende omwooyo, handi njia ohwekongooya nende ebibaaso byosi; njia ohweemba nende omwooyo, handi njia ohweemba nende ebibaaso byosi. 16Ataali awo, nooba niwebasa Nasae nende omwooyo, omuundu oba naali mu sifwo sy'omuundu werwanyi, aaba achia ohuboola ati, “Amiina” hu hwebasa hwao naaba nataamanyire byooba nobolaanga? 17Olwohuba onyala ohuba niwebasire Nasae bulai muno, nae omuundu wundi oyo haba saaba nihoonyiibwe. 18Ese ndeebasa Nasae endi nomalomaanga mu nimi ohuhira eng'we mweesi; 19kata katyo, mu bafukiiriri, sihirira ohulomaloma kata emboosi chitaanu chong'ene mu bibaaso, hu nyale ohukolola abandi, ohuhira emboosi elifu ehumi mu lulimi lutamanyihaane. 20Basyaange, mutaba abayere mu hubaasa hweeng'we; mube abadoto mu bibi, nae mu hubaasa, mube abawangafu. 21Syandiikwa mu malako ka Musa siti, “Omwaami aboola ati, nindehoonyera abandu b'enimi ngeni, handi nindehoonyera eminwa ech'abakeni, njia ohulomalomera abandu bano, nae handi kata katyo, sibachia hundekeeresa.” 22Hulweesyo, enimi nicho ahalolero eyitaali abafukiirira nae eyiri abatafukiirira, nae ohuyaala emboosi ya Nasae sihuli hutyo eyiri abatafukiirira, nae eyiri abafukiirira. 23Mani, nikali mbwe abafukiiriri boosi nibebuusa mani boosi balomalomaanga mu nimi, nae abandu b'erwaanyi oba abataali abafukiiriri beengira, haba sibaba bacha ohuboola bati muli abalalu? 24Nae boosi nibaba nibayaala, nae omuundu otaali omufukiiriri oba omuundu w'erwaanyi yengira, aba achia ohwekeswa omusango kwae nende abandu abo boosi, aba achia ohuhubbirisibwa nende abandu abo boosi, 25ebyaama by'omumwooyo kwae biba bicha ohukisulwa; mani bikere, akwiire aasi obweeni bwae, niyekongooya Nasae handi naboola ati hane Nasae abalimo. 26Mani siina syeene siindi ohuboolaanga, basyaange? Nimuba nimwebuusire, omuundu wundi abechenge nende olweembo, owundi nende esomo, owundi ohwikulirwao, owundi olulimi, oba ohweekesa amahulundu. Muleheenge buli siindu siholwa hulw'ohwikusa abandu. 27Nikali mbwe owundi alomaloma mu lulimi lundi, muleheenge abaawo abandu babiri, oba abataduuma mu badatu, handi buli muundu amaleenge huyekulira owaasye; handi muleheenge mani abaawo omuundu wundi otumbula amahulundu. 28Nae naaba nabulao omuundu oba nanyala ohutuumbula amahulundu, muleheenge boosi bawuleera busa nibali mu bafukiiriri, mani belomalomeraanga buli otula omweene, nende Nasae wae. 29Leheenge abayaali babiri kata badatu balomalomaanga, mani abandi badong'a nibakeraania buli siba nisibooleebwe. 30Nikali mbwe ohubwiihulirwa hwoola hu muundu wundi oba niyehaale aambi awo, muleheenge oba natangiire awuleera mberi. 31Olwohuba mweesi munyala ohuyalaanga syamulala-mulala, hu bandu boosi banyale ohweeka mani boosi bagumisibwa; 32mani emyooyo ch'abayaali chihoyeere ohufukwaanga nende abayaali beene. 33Olwohuba Nasae haba si Nasae ow'ohutabuhana, nae ni Nasae w'omuleembe. Koti lusiri mumihung'aano choosi ech'aboolerefu, 34abahasi bahoyeere ohuwuleeraanga nibali mu mihung'aano ch'abafukiiriri. Olwohuba haba sibafukiirirwa ohulomalomaanga, nae bahoyeere ohuba abawulisi, koti busa lu malako ka Musa kaboola. 35Nikali mbwe aliwo esiindu syoosi sibadaha ohumanya, muleheenge bacha bateebera engo bawamwaabwe. Olwohuba sy'esoni omuhasi ohulomalomaanga mu muhung'aano kw'abafukiiriri. 36Siina syeene? Mani emboosi ya Nasae yachaakira mweng'we, oba ning'we mweng'ene bayoolaho? 37Nikali mbwe omuundu yeesi abaasa ati ali omuyaali, oba yechula mwooyo, ahoyeere ohwomiisa ati, siindi ohubandiikira sino n'esilagiro sy'Omwaami. 38Nikali mbwe omuundu yeesi haba saamanyire sino, mani haba yesi saamanyihaane daawe. 39Mani, basyaange, mwahekombere bulai bweene ohuyaala, nihaandi mutakayiraanga ohulomalomaanga mu nimi chiindi; 40nae buli siindu sihoyeere ohuholebwaanga nende esiroonyo handi muhutekeha hulai.

will be added

X\