ABAKOLIITI YITAANGIRA 12

1Bulaanu ebidiira hu biyaanwa by'omwooyo, basyaange, haba siindaha mube abataboolerwa. 2Mumanyire muti nimwali nimusisiiri abakafwiiri, mwahyamisibwa mwacha eyiri emisaambwa chawumumala, kata nimuba nimwakoswa busa. 3Mani sakira ndaha mumanye muti, abulao omuundu yeesi oba naalomaloma nahoonyerwa nende Mwooyo wa Nasae onyala ohuboola ati, “Yesu aholimirwe!” handi abulao onyala ohuboola ati, “Yesu niye Omwaami” ohutusaho nahoonyerwe nende Mwooyo Mwolerefu. 4Bulaanu aliwo engeri enyiingi ech'ebiyaanwa, nae Mwooyo ali mulala obikaba; 5handi aliwo engeri enyiingi ech'obuhalaabani, nae Mwooyo ali mulala obukaba; 6handi aliwo engeri enyiingi echobunyala buhola emirimo, nae ni Nasae mulala oyo ota buli butula mu buli muundu. 7Buli muundu abeereswanga obunyala bwa Mwooyo ohumuholeramo hulw'obulayi bw'abandu boosi. 8Owundi aberesebwa nende Mwooyo obunyala bw'ohukeraka eby'amakesi, nae owundi obunyala bw'ohukeraka ebimanyibwa koti Mwooyo mweene oyo aaba nadaha, 9owundi nae efukiirira nende Mwooyo mweene oyo, owundi nae aberesebwa ebiyaanwa by'ohuwonianga nende Mwooyo mweene oyo, 10owundi nae obunyala bw'ohuholaanga eby'amayia, nae owundi obuyaali bw'emboosi ya Nasae, nae owundi obunyala bw'ohwawuhania emyooyo chikabuhane, nae owundi obunyala bw'ohulomalomaanga enimi chitaali nasilala, nae owundi obunyala bw'ohutuumbulaanga amahulundu k'enimi. 11Bino byoosi binyalirwaanga nende Mwooyo mulala mweene oyo, okabira buli muundu omweene koti lwaba nadaha. 12Koti busa lu mubiri kuli mulala nae kuli nende ebituundu biingi, nae koti ebituundu by'omubiri okwo, kata koti lubiri ebiingi, biri omubiri mulala, nilwo koti lubiri kata nende Kristo. 13Olwohuba ohweema hu Mwooyo mulala, efwe fweesi hwabatiisibwa mu mubiri mulala--Abayudaaya, oba Abayonaani, abaambe nende abalehuule--handi boosi banyalirwa ohung'wa hu Mwooyo mulala oyo. 14Olwohuba omubiri haba sikuli nende esituundu silala syong'ene, nae kuli nende ebituundu biingi. 15Nikali mbwe ohukulu hunyala hwaboola huti, “Olwohuba ese haba siindi muhono, mani haba siindi hu mubiri,” esyo haba sisinyala hukuhola obutabaaho kata esituundu sy'omubiri okwo. 16Nae nikali mbwe ohutwi hwahanyalire ohuboola huti, “Olwohuba ese haba siindi emoni, mani haba siindi hu mubiri,” esyo haba sisinyala ohuhuhola obutabaaho kata esituundu sy'ohumubiri okwo. 17Nikali mbwe omubiri kwoosi kwahabeere nikuli emoni ndala, ohuwulira nahwo hwabeere huli yena? Nikali mbwe omubiri kwoosi kwahabeere nikuli ohutwi hulala, obunyala bw'ohuwunyiirisa bwahabeere nibuli yena? 18Nae koti lu siri, Nasae yata ebituundu hu mubiri, buli situla, koti omweene yadoola. 19Nikali mbwe ebyo byoosi byali nibiri esituundu silala, omubiri nakwo mani kwahabeere nikuli yena? 20Koti lu siri, aliwo ebituundu ebiingi, nae kuli omubiri mulala. 21Emoni haba siyinyala ohuboolera omuhono yiti, “Sibulao siwahahoonya,” oba handi omutwe ohuboolera ebiikala by'amakulu kuti, “Sibulao siwahahoonya.” 22Nae olundi siri mbwe, ebituundu by'omubiri ebibonehana koti ebitaali nende obuhoonyi, nibyo ebitahebwaabwa, 23handi ebituundu by'omubiri ebyo bihubaasa huti biri nende oluyaali ludiidi, nibyo bihutaamo luyaali luhuluundu luhiramo, nae ebituundu by'efwe ebitahoyera nibyo bihudiira nende obutiiririrwa buhoongo muno, 24bu bituundu by'efwe bitahoyera muno bitadaha. Nae nasaye yayiiya bulai bweene omubiri, naberesaanga oluyaali luhiramo, ebituundu bihira ohulekeresebwa, 25hubulaanu atabaawo obutawuliirisania mu mubiri, nae mbwe buli situundu sinyale ohuba nende ohuchuunirwa hwaakanirira eyiri esyaasye. 26Nikali mbwe esituundu silala sichunisibwa, byoosi bichunisibirwa alala; nikali mbwe esituundu silala sibeeresebwa oluyaali, ebyaasye byoosi bisangaalira alala nasyo. 27Bulaanu muli omubiri kwa Kristo, buli muundu yeng'ene ali esituundu syaakwo. 28Mani Nasae yamala ohudoola mu bafukiiriri ba Kristo, natangira nende abatume, naloondyaho abayaali b'emboosi ya Nasae, naloondyaho abekesa, abawonia, abatuki, abalomalomi b'enimi ch'engeri chikabuhaane. 29Boosi ni abatume? Boosi ni abayaali? Boosi ni abekesa? Mani boosi baholaanga amayia? 30Mani boosi bali nende ebiyaanwa by'ohuwonianga? Mani boosi balomalomaanga mu nimi? Mani boosi batumbulaanga amahulundu? 31Nae mubwadyeri bweene, mwekombeenge ohuba nende ebiyaanwa by'akulu. Handi njia ohubeekesa handi engira yihiramo obulayi.

will be added

X\