ABAKOLIITI YITAANGIRA 10

1Basyaange ndaha mumanye muti, bakuuka yeefwe boosi bali aasi w'esireesi, handi boosi baambuha enyaanja. 2Boosi babatiisibwa mu sireesi nende mu nyaanja baaba abaloondi ba Musa. 3Mani boosi balya hu syohulya silala esyo esitula Mukulu 4handi baang'wa hu syohung'wa silala esyo esitula Mukulu. Olwohuba baang'wa hu maachi katulaanga mu lwaanda lwo Mukulu lwabalondaanga, mani olwaanda olwo lwali Kristo. 5Kata katyo, boosi haba sibasangaasa Nasae; olwohuba abangi beecha bafwiira musiparara. 6Bulaanu ebiindu bino byeholeha ohutulabula, hu huhaye ohwekoomba esibi koti lubahola. 7Mutaba abalaama emisaambwa koti abandi hwaabo lubali; koti lusyandiikwa siti, “Abandu beehala aasi ohulya, nende ohung'wa, mani bamala basiingira ohuhina.” 8Huteyingisaanga mubyobucheke koti abandi hwaabo lubahola, mani abandu elifu amahumi kabiri nende chidatu (23000) baafwa hu ludaalo lulala. 9Hutahemaanga Omwaami koti abandi hwaabo lubahola, mani endemo chabeeta. 10Mutemulugunyaanga, koti lu bandi hwaabo lubahola mani basihiriswa nende Omusuku. 11Bulaanu, ebiindu bino byoosi byabeholehaho koti esy'ohulabula, handi byandiikibwa ohutusomesa, efwe abaliwo hu njakamo y'esyaalo. 12Mani sakira mulehe oyo yeesi obaasa ati mulungifu, yelinde ahaye ohukwa. 13Abulao esihemo syaboolaho esitoolaanga hu buli muundu. Nasae n'omwesikwa, mani haba saachia huleha ebihemo bibahira amaani bibooleho. Nae buli sihemo sinechaanga, achia ohubabeeresaanga engeri y'ohusyeonia, hu munyale ohusyesimiirisa. 14Mani sakira, basyaange baheerwa, mutenamiraanga emisaambwa. 15Nomaloma koti oboolera abandu bali nende amakesi; abeene mwehengereo simboola sino. 16Esikoombe sihwehoonyera nihwebasa Nasae hulw'ehabi chihunyoola, nisyo obulala bweefwe mu makulu ka Kristo. Omugaati kuhudonyadonya, nikwo obulala bweefwe mu mubiri kwa Kristo. 17Olwohuba omugaati kuli mulala, kata hwahaba abangi hutye, hukabana fwesi hu mugaati mulala. 18Mubonereho hu bandu Bayisirayiri; abo abalya hu siyaanwa haba sibaba nibakabana hu alutaari? 19Bulaanu siina syeene simboola? Mboola endi aliwo ebyohulya biyaanirwa emisaambwa, oba endi emisaambwa chiriwo? 20Haba daawe. Mboola endi, ebyohulya bi bakafwiiri bawaana, babibeeresa emisaambwa, nae haba sibabibeeresa Nasae. Haba siindaha mube silala nende emisaambwa. 21Simunyala ohung'wa hu sikoombe sy'Omwaami handi mwang'wa hu sikoombe sy'emisaambwa. Simunyala ohuba silala nende emeesa y'Omwaami, handi mwaaba silala nende emeesa y'emisaambwa. 22Hunyala ohunyoolesa Omwaami? Hunyala ohumuhira amaani? 23“Ebiindu byoosi bifukiirirwa.” Nae kata katyo, ebiindu byoosi haba sibyombaha. 24Lehe omuundu yeesi atekonyera obulayi bwae yeng'ene, nae akoonye obulayi bw'abaasye. 25Mulye buli siindu sikusibwa mu siito nimutateeberesa emyooyo cheeng'we chihaye ohwelalihirira. 26Olwohuba, “esyaalo syoosi sy'Omwaami nisyo, nende buli siindu sisirimo.” 27Niwichuhira mulala hu bakafwiiri yabalaanga ohulya nabo mani mwafukiirira ohuchia, mulicheenge buli sibababeeresa nimutateeberesa mu myooyo cheeng'we, emyooyo cheeng'we chihaye ohwelalihirira. 28(Nae omuundu yeesi nababoolera ati, “Enyama yino yayanirwa emisaambwa, ” mani ohweema hu mbaasa y'omuundu obaboolere nende olwobulai bw'omwooyo 29njekesa obulayi bw'omwooyo kwae, ataali okweeng'we, mutalichaanga enyama eyo.) Olwohuba, lwasiina omuundu wundi niye oba niyaheengerao mu humanya hwange? 30Nimba nindebasa Nasae hulw'esyo siimba niindya, lwasiina heengerwa omusango olwesindu siindya nindebasa? 31Kale, kata nooba noolya oba noong'wa, oba noohola esiindu syoosi, hola buli siindu nochiiririra oluyaali lwa Nasae. 32Otanyolesaanga Abayudaaya oba Abayonaani oba abafukiiriri ba Nasae, 33koti busa lungesaho ohusangaasa buli muundu mu buli siindu sihola, nitachiirririra obulayi bwaange bwong'ene, nae obulayi bw'abaangi, hu banyale ohuwonisibwa.

will be added

X\