ABAKOLIITI YITAANGIRA 1

1Ohutula eyiri Paulo, owalaangwa busa nende obuheeri bwa Nasae ohuba omutume owa Kristo Yesu, handi ohutula eyiri Sosenesi mwaanaama. 2Eyiri omukanda kw'Abakristo okuli e Koliiti, eyiri abo abalabisirwa mu Kristo Yesu, abalaangibwa ohuba abalungifu, alala nende abo boosi abali buli abundu woosi nibalangaanga eliita ly'Omwaami weefwe Yesu Kristo, handi sidubaanie oli Omwaami waabwe handi oweefwe fwesi: 3Emikisa cha Nasae seefwe, handi nende ech'Omwaami Yesu Kristo chibe nang'we. 4Ndeebasa muno Nasae wange buli siha hu lweng'we hulw'omukisa kwa Nasae okwababeeresebwa mu Kristo Yesu, 5mbwe mu buli ngira yoosi, mwagagayaswa mu mweene oyo mu nomaloma yoosi, handi nende amakesi koosi 6kata busa nende koti lu bujulisi budiira hu Kristo bwomiisibwa mweng'we 7ohubona mbwe abulao esyo simutaali nasyo esidiira hu siyaanwa sya mwooyo, koti lu muli ohulindiriraanga ohuboneswa hw'Omwaami weefwe Yesu Kristo; 8oyo ochia ohubalera ohwolera elalira hu njakamo, nimubulaho simudondobaane mu ndaalo yecho ech'Omwaami weefwe Yesu Kristo. 9Nasae n'omwesikwa, oyo owabalaanga ohwingira mu bwooko bw'Omwaana wae, Yesu Kristo Omwaami Weefwe. 10Ese ndi ohubalirira, basyaange, mu liita ly'Omwaami weefwe Yesu Kristo, endi eng'we mweesi munyale ohufukiirisania, handi endi mweng'we muhoya mwahaya ohubaamo ohukabuhana-kabuhanamo, nae endi eng'we munyale ohweyambaania alala mu bibaaso bifwanana, handi nende mu huwuliirisania. 11Olwohuba syamala ohumboolerwa nende abandu ba Kulooye mbwe eyo yiriyo ohusoolanaanga mweng'we, eng'we baana beefwe. 12Siindi ohuboola nisyo sino mbwe, buli otula mweng'we ali ohuboolaanga ati, “Ese ndi owa Paulo,” oba ati, “Ese ndi owa Apolo,” oba ati, “Ese ndi owa Keefa,” oba ati, “Ese ndi owa Kristo.” 13Mani Kristo wuno yakabuhanamo? Mani yali Paulo owahomererwa hu lweng'we? Oba mani eng'we mwabatiisibwa mu liita lya Paulo kose? 14Ese naange ndeebasa Nasae wange, olwohuba ese sindabatiisaho omuundu yeesi ohutusaho Kurisipa nende Gayasi; 15awundi owundi yaheweereyo busa ohuboola ati ese ngandi ndabatiisibwa mu liita lyao. 16(Mu bwadyeeri bweene, ese ndabatiisaho edaala lya Sitefaano. Ohuhira awo, siimanyire nindabatiisaho omuundu yeesi daawe.) 17Olwohuba Kristo haba siyanduma ohubatisaanga, nae ohuyalaanga emboosi ndayi, handi haba nende amakesi kalyoyeresa daawe, awundi omusalabba kwa Kristo kwahoolere ohuchaalasibwa amaani kaakwo. 18Olwohuba emboosi yidiira hu musalabba, y'obusiru eyiri abo abali ohukotaanga, nae eyiri abo abali ohuwonisibwaanga, niyo amaani ka Nasae. 19Olwohuba syamala ohwandiikibwa siti, “Ese njia ohusihirisa amakesi ak'abakesi, handi obumanye-manye bw'omumanyi ese njia ohubwetooya.” 20Omusaacha mukesi ali yena? Omwandiiki mweene ali yena? Omuyiingani ohira endaalo chino ali yena? Haba si Nasae niye owahola obusiru buno ohuba amakesi k'esyaalo? 21Olwohuba siri mbwe mu makesi ka Nasae, esyaalo haba sisyanyala ohukamanya Nasae ohubitira mu makesi daawe, syeecha syasangaasa Nasae ohubona mbwe ohubitira mu busiru bw'ebiindu bihuyaala abo abafukiirira banyala baonisibwa. 22Olwohuba Abayudaaya nabo baheera muno ohukonyeresa obulolero, nae Abayonaani nabo baheera muno ohukonyeresa amakesi, 23nae efwe huyaala Kristo owahomererwa, oli esigiingi syegumulwaho eyiri Abayudaaya handi esyobusiru eyiri abandu Abateende, 24nae eyiri abo abali ohulaangwa, Abayudaaya nende Abayonaani sidubaanie, Kristo niye amaani ka Nasae handi niye amakesi ka Nasae. 25Olwohuba obusiru bwa Nasae buhira amakesi k'abandu, handi obukata bwa Nasae buhira amaani k'abandu. 26Eng'we mani mubaseho busa ohulaangwa hweeng'we, baana beefwe; abangi hweeng'we haba simwali abakesi ohweema hu mutiindo kw'esyaalo, abangi hweeng'we handi simwali ab'amaani muno, handi abangi hweeng'we haba simwali abeebulwa mu Madaala k'oluyaali luhoongo muno; 27nae Nasae yeecha yadoola esyo esyali nisiri esisiru mu syaalo, ohuswaasa abakesikesi, Nasae yadoola esyo esiri esikata mu syaalo, ohuswaasa ab'amaani, 28Nasae yadoola esyo esiri esy'aasi handi esilekeresebwa mu syaalo, kata nende ebiindi byali nibitaali ebiindu, ohuchalaasira elalira ebiindu byali nibiri ebiindu byeene, 29hubula abulewo omuundu mulya-busuma onyala ohweniinia mu moni wa Nasae. 30Oyo niye esibuho y'obulamu ohubitira mu Yesu Kristo, oyo yi Nasae mweene yahola ohuba amakesi keefwe, obuluungifu bweefwe, handi kata niye ohwoosebwa nende ohununulwa hweefwe; 31mani hubibe koti lubyandiikwa biti, “Mulehe oyo yeesi owehuduumbasa, yehudumbasire mu Mwaami.”

will be added

X\