Taitɔsi 3

1Simina biya bikɛnda ba bindɛ putiyɔ bi bindɛ kɛriŋiyɛ beŋ, awa mɛnɛ bi bohitɛ sɛmbɛŋ baŋ beŋ. Bi putiyɔiŋ bindɛ, awa e bindɛ kɔsinɔkɔ lɔkɔiŋ fooma ba niya bayɔhɔy ka gboŋa o gboŋa. 2Tepe bindɛ ba bindɛ thana gbonkiya wunɛnɔy ba wɔ yo wɔ, bi niyɔiŋ iŋ mathɛbɛ lɔkɔiŋ fooma, bi niyɔiŋ iŋ thayathikiya iŋ biya beŋ. Bi tɔŋinɛŋ thathukuma thathɛbɛ ka biya fooma. 3Malɔkɔiŋ thanki daŋande ma nde miŋ mindo thɔkɔy, mindo baŋinɛ yamari. Mindo thɔɔyɛ wuruwanda. Mindo nde nɔŋ mbaayiŋ ka ŋafiyoiŋ ŋahakuwande iŋ ka mayehitɔkɔiŋ mahakuwande. Mindo nde teeti malɔkɔ makɛntuŋ maŋ ka mathoni mɛnɛ milɛ. Mindo thambiyande nde iŋ biya bihɛna. 4Kɛrɛ naa tɔŋɔŋ Masaala, Banikisi wokɛntuŋ woŋ, bayɔhɔy nama baŋ iŋ thimo nama biyamɛti haŋ, 5wundɛ ni mina kisi. Wuŋ ka ba bɛyiniŋ bayɔhɔy ba thanki miŋ niya baŋ, kɛrɛ wundɛ ni mina kisi ŋaye ka nkinikiniŋ nama kiŋ. Wundɛ ni mina kisi maŋaye ka biye hu niye Yina wo ka Masaala woŋ wali haŋ ba miŋ ba mpoo wuŋama iŋ sii baŋama. 6Masaala dunkune mina Yina nama woŋ ka yɔhɔ thukuma saathɛ ba Yisɔs Kraist, Banikisi wokɛntuŋ woŋ. 7Huna wundɛ ni wuŋ ŋaye ka makutiyɛ nama maŋ haliko na miŋ niye nɔŋ biya biyɔhɔy kɛnama, iŋ na miŋ punku ba niye mpati nama, e miŋ kuta sii ba kɔy yo kɔy ba tute miŋ thukuma ba kuta baŋ. 8Huŋ, nɔndi bɛna. Yaŋ thimoŋ ba yi niya sɔbɛ ka bɛyiniŋ baŋ baŋ, ba haliko bi niyɛ lanɛya ka Masaala beŋ bi be ni kuthɛgbɛ iŋ ba bindɛ dunkuna yɛthɛ bakɛnamɛŋ ka maniyɔ mayɔhɔy, ma kɔŋ niyɔ mayɔhɔy ba wɔ yo wɔ, awa e mɛŋ mase wɔ yo wɔ. 9Gbɔnɔkɔ mahɛŋ ŋagbakali ŋaŋ, thabɔrɔiŋ thathɔɔkuwɛ tha ka mbembɛŋ ndeŋ beŋ thaŋ, ŋayuŋande ŋaŋ, iŋ ŋadekey ŋa ba Siraŋ baŋ ŋaŋ. Bɛyiniŋ baŋ baŋ ka kolo, awa bɛŋ sa sisi munahaŋ. 10Dunkuna kuyeli kunthe maa ŋaye ka wɔ sisi mahakinande, awa e yi thankina ba wɔ bɛina. 11Kɔthɔ ba dɔma na wɔ bɛina woŋ ka nda wɔ thumbɛ, awa hakɛŋ bakɛnama baŋ tɔŋɔŋ ba dɔma na wɔ nɛnɔiy na wundɛ. 12Naa yaŋ ŋindi Atemasi na maa Taikikɔsi na kɛnda ka, niya sɔbɛ bakɛnda ba yama pɛnka ka Nikɔpɔlisi do, baa yaŋ simɔkɔy ba ndɛ niyɔ thamɔ baŋ. 13Niya sɔbɛ bakɛnda ba mase Sɛnasi na wo thanuwɛ sirani beŋ woŋ mɛnɛ Apɔlɔsi ba bi be fuŋ biyasi namɛŋ haŋ, awa e yi detha mɛnɛ bi kiŋ iŋ ntha yo ntha ki panke bindɛ. 14Biya bikɛntuŋ beŋ bi thanuwɛŋ ba thiya malɔkɔ namɛŋ ka niya bayɔhɔy, haliko wɔ be kutu mu panke wundɛ, bi bɛiŋ bari ba dɔŋɔ wu ka ba niya. 15Bi iŋ yaŋ dondo beŋ fooma maaŋ yina. Maaniyɛ mina binyathikiŋ ntuŋ beŋ ka lanɛya baŋ. Haliko mathimo ma ka Masaala maŋ ma niyɔiŋ iŋ beŋ fooma.

will be added

X\