Taitɔsi 2

1Kɛrɛ mɛnɛ ba yi, thaninuwa mathanani ma mɛyiyande iŋ mathanani maseŋa maŋ. 2Tepe kalani bibiyɛthɛŋ beŋ bi be tha niyɔ biyilɔy, bi dɛŋɔkɔiŋ, bi punkɛŋ kɛriŋiyɛ yɛthɛ namɛŋ, e bindɛ niyɔ iŋ lanɛya baseŋa, iŋ mathimo, awa e bindɛ niyɔ bi thunkuteke wukahɛ. 3Nɛna hɛlɛŋ yi ni ka kalani biyɛrɛmɛŋ beŋ, bi niyɔiŋ bimɛthɛ thathukuma nɔŋ na kalani biyɛrɛmɛŋ ba niye. Bi bɛiŋ gbonkoy wunɛnɔy ba bintɔni namɛŋ. Bindɛ ka ba tuta yaha ka thiiye mampa. Bi niyɔiŋ bi thanani bɛyiniŋ bayɔhɔy, 4huna bi dinkɛŋ bɛthɛŋ beŋ wuyɔhɔy ba haliko na bindɛ thimo biwandamɛŋ mɛnɛ mpati namɛŋ, 5bi punkɛŋ kɛriŋiyɛ yɛthɛ namɛŋ, awa e bindɛ niyɔ bimɛthɛ thathukuma. Bi kiŋ ba niyɔ bayɛntoni biyɔhɔy, bi mɛyiyɛ biwandamɛŋ yamari, wuna sa biya gbonkoy wunɛnɔy ba huseri hu ŋaye ka Masaala haŋ. 6Nɛna hɛlɛŋ yi ni ka lamgbeŋ beŋ, bi niyɔiŋ bi punkɛ kɛriŋiyɛ yɛthɛ namɛŋ. 7Niyɔ mathɔyande mayɔhɔy ka bɛy yo bɛy fooma ma ka maniyɔ mayɔhɔy. Awa e yi niyɔ basɔbɛ ka thaninuwa hukɛnda haŋ, awa e yi niyɔ wɔ yɔhɔy niyo lanɛya. 8Gbonkiya thayimbɛŋ thapethɔi wuna sa biya yina yethitɔ. Wu kɔŋ hɛlɛŋ ni ba bihadeni bikɛnda kuta kuyaahu mɛnɛ bɛy tha niyɔ ba yi tɛpiya banɛnɔy. 9Nɛna hɛlɛŋ yi tepe mbaayiŋ beŋ, bi putiyɔiŋ bi biyɛ bindɛ beŋ, awa e yehinuwa bindɛ thathukuma ka bɛy yo bɛy fooma. Bindɛ ka ba thɛintande thampɛŋ iŋ bindɛ. 10Bi bɛiŋ bindɛ tuutu. Bi yɔlɛŋ ba tɔŋina yɔhɔ niyo lanɛya kɛnamɛŋ, wuna wuŋ sisi yiki bamandiŋ ka mathanani ma ka Masaala maŋ ka bɛyiniŋ fooma ba bindɛ ni. 11Masaala thanki nde tɔŋina makutiyɛ nama maŋ ba kisi ba ka biyamɛti fooma. 12Makutiyɛ mabɛina toŋinuwe mina ba na miŋ peneke bɛyiniŋ ba sa mina kati ka Masaala iŋ ŋafiyoiŋ ŋa kafaydo, e mɛŋ mina thaninuwa ba punka kɛriŋiyɛ yɛthɛ bakɛntuŋ iŋ ba niyɔ biya bithumbɛ, awa e miŋ niyɔ biya bi ka Masaala kafaydo. 13Yɔkɔŋ miŋ be niyɔ ka maniyɔ mabɛina naa miŋ yumbu lɔkɔ ba ka yehitɔkɔ ba kahe miŋ thukuma baŋ ti bɛŋ tɛŋ, ti yiki babɛndɛ ba ka Masaala womandiŋ, wo Banikisi wokɛntuŋ woŋ, Yisɔs Kraist, baŋ tɔŋinɔkɔ. 14Wundɛ dunkuŋ yɛthɛ bakɛnama baŋ ba miŋ, ba haliko ba mina niya kisi ka bɛyiniŋ banɛnɔy fooma, awa iŋ ba mina niya biya bimɛthɛ bikɛnama, bi iŋ kufiyo ba niya wuyɔhɔy. 15Thaninuwa bɛyiniŋ baŋ baŋ, e yi bindɛ niya kuthɔnthɔ, e yi tepe biya banɛnɔy ba thanki bindɛ niya iŋ mayoho fooma. Ba mɛkɛŋ ba wɔ yo wɔ yina yethitɔ.

will be added

X\