biRomaŋ beŋ 8

1Huna bi bɔhande nda iŋ Kraist Yisɔs beŋ sa nda thonkino. 2Baa siraŋ ba ka Yina wo ka Masaala woŋ baŋ, ba mina sisiyɛ sii baŋ saathɛ ba na bɔhande miŋ iŋ Kraist Yisɔs, kiye yama kuyankaŋ maŋaye ka siraŋ ba tɔŋɔŋ hakɛ baŋ e sisa hutuka. 3Ba sa Siraŋ baŋ punku niya baŋ, ba saathɛ ba ka mayɛini ma ka huwɔmɛtiya haŋ maŋ, Masaala ni bɛŋ. Wundɛ toŋite Hati nama woŋ ba si thonkine hakɛ ba ni wali baŋ ka huwɔmɛtiya haŋ baŋ, wo sɛɛ woŋ ka mathɔyande ma ka huwɔmɛtiya ba si fuŋa saraka ba hakɛŋ ba ka biyamɛti. 4Masaala ni wuŋ haliko miŋ, mindo ni ba thimo Yina nama woŋ baŋ, wuŋ ka ba thimo huwɔmɛtiya haŋ baŋ, miŋ be punku thiŋina fooma ba tepe Siraŋ baŋ baŋ na bɛna bathumbɛ. 5Bindɛ fooma bi katitoko beŋ iŋ ba bindɛ tepo iŋ huwɔmɛtiya haŋ baŋ, mathimo ma ka huwɔmɛtiya haŋ mɛna kɛriŋiyɛ masiyi namɛŋ maŋ. Bi nɛnɛ kaande beŋ nɔŋ na bindɛ tepo iŋ Yina wo ka Masaala woŋ beŋ, masiyi namɛŋ maŋ mɛ kɔŋ kɛriŋiya iŋ mathimo ma ka Yina wo ka Masaala woŋ maŋ. 6Ba pɛyɛna masiyi makɛnda maŋ ba keriŋiyo iŋ huwɔmɛtiya haŋ, hu kɔŋ sisi hutuka; na yi pɛyɛŋ nɛnɛ masiyi makɛnda maŋ ba keriŋiyo iŋ Yina wo ka Masaala woŋ, wu kɔŋ sisi siiiŋ mathɛbɛ. 7Bɛna wɔmɛti kɔŋ sikiyɔkɔ hadeŋ wo ka Masaala baa masiyi nama maŋ keriŋiyo iŋ mathimo ma ka huwɔmɛtiya haŋ maŋ. Ba wundɛ tha putiyɔ Siraŋ ba ka Masaala baŋ; nɔndi yaathi, wundɛ sa bɛŋ punku putiyɔ. 8Bindɛ bi ni ba thimo huwɔmɛtiya namɛŋ haŋ baŋ sa punku yehina Masaala na thukuma. 9Kɛrɛ beŋ, beŋ doŋeta ba niya hu bena huwɔmɛtiya ndeŋ haŋ tepe haŋ; mɛnɛ yaathi Yina wo ka Masaala woŋ kiŋ iŋ beŋ, beŋ doŋeŋ nda ba niya hu wundɛ bena tepe haŋ. Wɔ yo wɔ wo ka iŋ Yina wo ka Kraist woŋ, wundɛ ka wo ka Kraist. 10Kɛrɛ mɛnɛ Kraist kiŋ kaake kendeŋ, hali na wuŋ na na ŋakɔtɔ ŋakendeŋ ŋaŋ ŋa boheŋ ba tuka saathɛ ba hakɛ, halisa yinɛŋ bikendeŋ beŋ bi kiŋ iŋ sii saathɛ ba na niyo beŋ iŋ Masaala nɔŋ biya bithumbɛ. 11Mɛnɛ Yina wo ka Masaala woŋ, wo ŋayinɛ Yisɔs na ka tuka haŋ woŋ, niyɔy kaake kendeŋ, Masaala wobɛina wo ŋayinɛ Kraist na ka tuka haŋ woŋ kɔŋ dunkuŋ sii ka ŋakɔtɔ ŋakendeŋ ŋa bɔhɛ ba tuka ŋaŋ maŋaye ka Yina nama wo bena kaake woŋ. 12Huna, mbɛndaŋ beŋ, miŋ kiŋ iŋ gbɛthɛŋ, kɛrɛ wuŋ ka ye na ba niya ba thimo mina huwɔmɛtiya haŋ ba miŋ niya baŋ. 13Baa mɛnɛ beŋ ni ba thimo bena huwɔmɛtiya haŋ ba beŋ niya, beŋ kɔŋ nɔŋ tuku; kɛrɛ mɛnɛ maŋaye ka Yina wo ka Masaala woŋ, beŋ kore maniyɔ ndeŋ ma ka hakɛ baŋ maŋ, beŋ kɔŋ kutu sii. 14Bindɛ bi katitoko iŋ Yina wo ka Masaala woŋ beŋ, bindɛ bina mpati bi ka Masaala beŋ. 15Baa, Yina wo ka Masaala wo dunkune ndɛ bena woŋ sa bena sikiŋ mbaayiŋ e niya ba beŋ payɔ; kɛrɛ wundɛ kɔŋ bena sikiŋ mpati bi ka Masaala, awa ka sɛmbɛ ba ka Yina wobɛina na miŋ bokite Masaala na, na “Papaŋ, Fandaŋ woŋ.” 16Yina wo ka Masaala woŋ thɔɔtɔy yinɛŋ bikɛntuŋ beŋ ka niya maseri ba dɔma na miŋ kiŋ nda mpati bi ka Masaala. 17Na niyɔy nda nɛnɛ miŋ mpati bikɛnama, miŋ kɔŋ nɛnɛ kutu thaduba tha kɔsɔŋ wundɛ ba biya bikɛnama beŋ, awa miŋ iŋ Kraist ka tha banthe miŋ kɔŋ kutu mu kɔsinɔkɔy Masaala ba ndɛ Kraist muŋ; baa mɛnɛ miŋ sekithe kufɛŋ ka nambarɛŋ ba ka Kraist baŋ, miŋ kɔŋ hɛlɛŋ nɛnɛ sɛkɛthi kufɛŋ ka yiki nama baŋ. 18Yaŋ simɔkɔy ba dɔma na nambarɛŋ ba miŋ niyɔ dondo baŋ sa thubutando iŋ yiki babɔyɛ-bɔyɛ ba bohe nɔŋ Masaala ba mina dunkune baŋ. 19Dunia ba yeheni Masaala baŋ fooma ba kiŋ ka yumba iŋ kufiyo kumandiŋ ba malɔkɔ ma bohe Masaala ba tɔŋina mina mindo mpati nama beŋ ka dunia baŋ. 20Baa dunia baŋ thonkino nde nda ba pɛyɔ mayɛini, wuŋ ka ye na ka mathimo ma ka Masaala maŋ. Kɛrɛ halisa matute yima maŋ maŋ ba ba see ma kiŋ kɛndɛ, 21ba dɔma na dunia baŋ ka yɛthɛ bakɛnama, bɛ kɔŋ nɔŋ kiya kuyankaŋ maŋaye ka huwaayinɛ hu ka tuunuwa, e bɛŋ sɛkitha kufɛŋ ka kuyankaŋ kumandiŋ ku ka mpati bi ka Masaala beŋ koŋ. 22Baa miŋ kɔthɛŋ ba dɔma na haaŋ hɛ dunia babunthu fooma hiŋ ba daŋitɔkɔ iŋ wuthoonɛ nɔŋ wuthoonɛ wu ka wɔ yɛrɛmɛ wo dɔŋɔy ka kugbomgboki ku ka mpaa. 23Kɛrɛ wuŋ ka hɔkɔŋ dunia baŋ bathɔ bɛna daŋitɔkɔy ye; kɛrɛ hali miŋ mindo iŋ Yina wo ka Masaala woŋ beŋ nɔŋ munkii mumayoŋ mu ka Masaala muŋ, miŋ hɛlɛŋ hiŋ mindo daŋitɔkɔ ka yɛthɛ bakɛntuŋ naa hintiŋ miŋ ka yumba Masaala na ba ntiŋ mina thanka niya mpati nama e kiya mina kuyankaŋ wubunthu. 24Miŋ niyo kisi naa nde miŋ ka detha ka kɔtɔkɔy iŋ matute yima ba ba see; kɛrɛ mɛnɛ miŋ kute nda iŋ thaaya thakentuŋ thaŋ ba tute miŋ yima baŋ, ka lɔkɔ babɛina tute yima kutɛ nda, baa nkaana tute yima e detha ka kɔtɔkɔy ba ba thanki nda wundɛ kuta iŋ thaaya nama thaŋ? 25Kɛrɛ mɛnɛ miŋ tute yima ba ntha ki be hɛ miŋ kutu iŋ thaaya thakɛntuŋ thaŋ, miŋ kɔŋ yumbu ba wuŋ iŋ kuthithi. 26Nɛna hɛlɛŋ Yina wo ka Masaala woŋ see ba mina mase, miŋ mindo kɔɔyuwɛ beŋ beŋ nɔŋ na miŋ na. Miŋ kɔita nɔŋ na miŋ ba niye kuraminɛ, huna Yina wo ka Masaala woŋ kɔŋ bokoti Masaala na ba miŋ iŋ madaŋitɔkɔ ma sa punku kutiyo huyimba. 27Awa Masaala, wo kutu woŋ kaake ka thathukuma tha ka biyamɛti woŋ, kɔthɛŋ masimɔkɔ ma ka Yina nama woŋ maŋ, baa Yina nama woŋ kɔŋ mina niŋ thetiyeke, mindo biya nama beŋ, maŋaye ka mamɛyi ma ka ndɛ Masaala maŋ. 28Ka bɛy yo bɛy banɛnɔy ba mina pɛnki, Masaala kɔŋ ni ba wuyɔhɔy kɛndɛ fuŋa, ba miŋ fooma mindo thimo miŋ beŋ, mindo thanki Masaala thiya beŋ ba haliko ndɛ be thiŋiŋ madɛɛnki nama maŋ. 29Bindɛ bi thanki nde nda wundɛ yɛtha beŋ, wundɛ deŋe bindɛ thɔɔkɔ ba bi be nɔŋ sikiyɔkɔ nɔŋ Hati nama woŋ, ba haliko Hati woŋ be niyɔ Hati wowathe womayoŋ mateete ma ka mbɛndama bibɔyɛ. 30Huna Masaala thiyi bi deŋe wundɛ thɔɔkɔ beŋ; awa bi thiyi nɛnɛ wundɛ beŋ, bindɛ bina ni wundɛ nɔŋ biya bithumbɛ ka kuwaŋ nama koŋ; bi ni nɛnɛ wundɛ nɔŋ biya bithumbɛ ka kuwaŋ nama koŋ, wundɛ dunkuŋ bindɛ kufɛŋ ka yiki nama baŋ. 31Mateete ma ka bɛyiniŋ baŋ baŋ fooma, mbɛ hu nda miŋ tɛpi? Mɛnɛ Masaala kɔɔyɛ ba miŋ, nkaana mina punku? 32Wundɛ wo tha kahiteke hati nama woŋ, kɛrɛ e ndɛ niŋ dunkuna saraka ba miŋ—E ndɛ sa mina dunkuŋ ntha yo ntha? 33Wɔ yo wɔ ka wo tɛpi ba dɔma na biya bi thanki Masaala yɛtha beŋ bi kiŋ iŋ mathonko, baa Masaala thanki nda tɛpa ba bindɛ niyɔ bithumbɛ. 34Wɔ yo wɔ ka wo bindɛ thonkine, ba hintiŋ tɛpa na Kraist Yisɔs, baa Kraist Yisɔs ndɛ na tukɛ e ŋayino e ndɛ dɔŋɔ iŋ sɛmbɛ nama baŋ ka yɔnkɔ huthome hu ka Masaala haŋ e ka theteke niŋ ba miŋ. 35Nkaana mina hakinande iŋ mathimo ma ka Kraist maŋ ba miŋ? E nambara, maa makahɛ, maa ba niyo thɔrɔ iŋ hadeni ntuŋ beŋ, maa kɔnthɔ, maa humɔnɛ, maa ba niyɔ ka masibo ka teete, maa hutuka ahakinande mina iŋ mathimo ma iŋ Kraist maŋ ba miŋ? Ade, muŋ sa mina hakinande. 36Nɔŋ na tepo nthɔŋ wuŋ na ka magbali ma ka Masaala maŋ na, na “Ba saathɛ bakɛnda miŋ kiŋ ka masibo ma ka hutuka gbɛɛŋ iŋ piri piri; mindo gbuŋa nɔŋ taka wo keyka koro.” 37Kɛrɛ, mateete ma ka bɛyiniŋ baŋ baŋ fooma miŋ kiŋ iŋ punka hukunthɛ saathɛ ba ka Kraist wo thimo mina woŋ. 38Ba yaŋ niyeŋ lanɛya ba dɔma na ntha yo ntha ka ki mina punku hakinande iŋ mathimo ma thimo mina Kraist maŋ: wu niyɔiŋ nthɔŋ hutuka maa sii; wu niyɔiŋ nthɔŋ malekɛŋ maa bakɛrɛni maa sɛmbɛŋ bahɛna ba ka kuthahinɛ koŋ; wu niyɔiŋ nthɔŋ bɛyiniŋ ba ka tete maa bɛyiniŋ ba see; 39wu niyɔiŋ nthɔŋ dunia ba ka thinthi maa dunia ba ka pothi. Ntha o ntha ka ka munki mu yehinuwo mu mina punku hakinande iŋ mathimo ma ka Masaala maŋ, ba saathɛ ba Yisɔs Kraist Mariki ntuŋ woŋ.

will be added

X\