biRomaŋ beŋ 7

1Mbɛndaŋ beŋ, yaŋ niyeŋ lanɛya ba beŋ kɔ metho bɛyiniŋ ba yaŋ see ka gbonkiya baŋ fooma, baa beŋ fooma beŋ kɔthɛŋ siraŋ. Siraŋ baŋ bɛ kɔŋ kɛriŋiyɛ wɔ hanimaa ndɛ kiŋ wohɛmɛ. 2Miŋ dethɛŋ hɛ mathɔyande; wɔ yɛrɛmɛ kiŋ wo yukɔy ka siraŋ ka wandama hanimaa wandama kiŋ wohɛmɛ. Kɛrɛ mɛnɛ wandama tuku, ka lɔkɔ babɛina wundɛ pɛyɛ kuyankaŋ maŋaye ka siraŋ ba yukɛ nɔŋ niŋ ka wandama woŋ baŋ. 3Mɛnɛ wundɛ keytikitande mutaayi iŋ wathe wohɛna na hintiŋ wandama wohɛmɛ, wundɛ kɔŋ dɔma na babɛy. Kɛrɛ mɛnɛ wandama tuku, ka lɔkɔ babɛina wundɛ pɛyɛ kuyankaŋ maŋaye ka siraŋ baŋ, awa wundɛ sa nda dɔma na babɛy mɛnɛ wundɛ yento iŋ wathe wohɛna. 4Mbɛndaŋ beŋ, nɛna hɛlɛŋ beŋ. Ka kufɛŋ ku ka Siraŋ baŋ, beŋ thanki nde nda tuka kɛndɛ, baa beŋ kiŋ nda kufɛŋ ku ka kɔtɔ ku ka Kraist koŋ. Ka tete beŋ kiŋ nda bi ka Kraist wo ŋayino ka tuka haŋ woŋ nde ba haliko miŋ be niyiyɛ Masaala na wali bayɔhɔy. 5Baa naa nde miŋ ka katitoko iŋ mathimo makɛntuŋ, ŋafiyo ŋa ka niya hakɛ gbakito iŋ Siraŋ baŋ ba niya wali ka ŋakɔtɔ ntuŋ ŋaŋ, awa ba ni miŋ fooma gbanthine hutuka. 6Kɛrɛ ka tete miŋ pɛyɛ kuyankaŋ maŋaye ka Siraŋ baŋ, baa miŋ tuku nda ka kufɛŋ ku ka Siraŋ babɛina ba lɔŋɛ nɔŋ mina gbɔlɔŋ baŋ. Miŋ sa nda nɔŋ niyiye Masaala na wali ka gboŋa batiyɔ ba toŋine nde mina Siraŋ ba gbalo nde baŋ, kɛrɛ ka gboŋa baŋama ba toŋino miŋ iŋ Yina nama woŋ baŋ. 7Mbɛ hu nda miŋ tɛpi? E Siraŋ baŋ hakɛ bɛna ka yɛthɛ bakɛnama? Hali, wuŋ ka nɛŋ! Kɛrɛ Siraŋ baŋ bɛna niyɛ ba yaŋ kɔthɔ mu domo hakɛ, baa yaŋ sa nde nɔŋ kɔthɔ mu domo milɛ mɛnɛ Siraŋ baŋ tha nde nɔŋ tɛpi, na “Ba niyɔ milɛ ntha ki ka ntɔ nda.” 8Hakɛ baŋ kute gboŋa ka siraŋ baŋ baŋ ba yama gbakita ba niyɔ milɛ munkiŋ muhakuwande fooma, baa hakɛ baŋ ntha kina kitukɛ mɛnɛ siraŋ baŋ ka. 9Yaŋ woŋ baŋ gbeeŋ, yaŋ kiŋ nde yando pethɔy ka lɔkɔ ba ka nde siraŋ ba yama tepe baŋ na yaŋ ni hakɛ; kɛrɛ naa see nthɔŋ siraŋ baŋ, hakɛ baŋ see thɔhɔ, 10awa yaŋ see tuku. Awa siraŋ ba tuto nde thukuma ba sisa sii baŋ, bɛŋ see yama sisiyɛ hutuka. 11Hakɛ baŋ see kutu hɛɛra nama ba niye wali siraŋ baŋ ba yama thɔkina haaŋ e niye bɛŋ wali ba yama kɔra. 12Huna, Siraŋ ba dunkuŋ Masaala baŋ bɛŋ ŋaye kɛnama gbeeŋ, awa siraŋ ndo siraŋ ba kɛndɛ kaake ka Siraŋ babanthe baŋ baŋ ŋaye kɛnama, awa ba kiŋ bathumbɛ awa bayɔhɔy. 13E ba hɔŋ ba dɔma na wuyɔhɔy wuŋ wuna sisiyɛ yama hutuka? Wuŋ ka nɛŋ hali. Hakɛ bɛna sisiyɛ yama hutuka; bɛna sɛkithɛ wuyɔhɔy wuŋ e wuŋ niye wali ba yama sisiyɛ hutuka. Hakɛ sisiyɛ yama hutuka ba haliko maniyɔ makɛnama maŋ mɛ be kuta nagberekethe na hakɛ bɛna baŋ baŋ. Huna maŋaye ka wali ba ka siraŋ baŋ baŋ, hakɛ yame ntiŋ toŋino si peye bɛŋ ka nɛnɔ. 14Miŋ kɔthɛŋ ba dɔma na Siraŋ baŋ ŋaye ka Masaala, kɛrɛ yaŋ, yando wɔmɛti wo thankɛ nda niyo gbɔŋ ka hakɛ nɔŋ waayi. 15Yaŋ methota ba yaŋ ni, baa yaŋ punketa niya ba thimo yaŋ ba niya baŋ; ba thambo nthɔŋ yaŋ baŋ, bɛna yaŋ ni. 16Mɛnɛ yaŋ kɔ ni ba be yaŋ thimo ba niya baŋ, wuŋ tɔŋɔŋ ba yaŋ yɛrɔkɔ ba dɔma na Siraŋ baŋ athumbu. 17Huna yaŋ gbeeŋ, yaŋ kutɛ nda ni bɛyiniŋ baŋ baŋ, kɛrɛ hakɛ ba yama kaake baŋ, bɛna bɛŋ ni. 18Yaŋ kɔthɛŋ ba dɔma na wuyɔhɔy ka kaake ka huwɔmɛtiya niŋ haŋ, baa hali na yaŋ iŋ kufiyo ku ka niya wuthumbɛ na ka thukuma niŋ haŋ kaake, yaŋ punketa wuŋ niya. 19Yaŋ niyeta wuthumbɛ wu thimo yaŋ ba niya wuŋ, kɛrɛ wu be nthɔŋ yaŋ thimo ba niya wuŋ, wuna yaŋ ni. 20Mɛnɛ yaŋ ni ba be yaŋ thimo ba niya baŋ, wuŋ, wuŋ tɔŋɔŋ ba dɔma na yaŋ, yaŋ kutɛ nda bɛŋ ni ye; kɛrɛ hakɛ ba yama kaake baŋ bɛna bɛŋ ni. 21Siraŋ ba kiŋ ba tɛpɛ ba dɔma, na “Naa yaŋ thimo ba niya wuyɔhɔy, wunɛnɔy wuna yama niyɔ sɔɔnɛya ba niya.” Yaŋ kute ba dɔma na siraŋ baŋ baŋ bɛna ni wali ka thukuma niŋ haŋ. 22Huthukuma niŋ haŋ hu kiŋ iŋ mayehitɔkɔ ba Siraŋ ba ka Masaala baŋ. 23Kɛrɛ yaŋ kute hɛlɛŋ siraŋ bahɛna bɛ si ni wali kaake ka kɔtɔ niŋ koŋ, siraŋ ba kɔɔyɛ ba dekiya ma sɔkinɔkɔ siraŋ ba yɛrɔkɔy huthukuma hukiyaŋ haŋ ba siraŋ babɛina niyɔ bathumbɛ. Siraŋ ba ni wali ka kɔtɔ niŋ koŋ baŋ lɔŋ yama gbɔlɔŋ ka siraŋ ba gbanthine ka hakɛ baŋ ba ni wali ka kɔtɔ niŋ koŋ kaake baŋ. 24Yaŋ ka iŋ mayehitɔkɔ hali! Nkaana yama ni kisi maŋaye ka kɔtɔ ku ni ba yaŋ tuka koŋ koŋ dee? 25Yaŋ thiyi Masaala na maamo, wo niyɛ yama kisi woŋ saathɛ ba Mariki wokɛntuŋ woŋ Yisɔs Kraist! Makɔɔ maŋ maŋ mɛna kooye yaŋ: Yaŋ yɛthɛ niŋ yaathi, ka masiyi makiyaŋ yaŋ kiŋ waayi wo ka putiyɔ Siraŋ ba ka Masaala baŋ, kɛrɛ ŋafiyo ŋanɛnɔy ŋa ka huwɔmɛtiya hukiyaŋ haŋ ŋa kiŋ ba yaŋ niyɔ waayi wo ka putiyɔ siraŋ ba ka hakɛ baŋ baŋ.

will be added

X\