1 Mbɛ hu nda miŋ tɛpi? E miŋ akeyka kɔtɔkɔy kaŋ niya hakɛ haliko makutiyɛ ma ka Masaala maŋ mɛ be nthuŋ kɔ ndintɔ? 2 Wuŋ ka ba nɛŋ niyɔ hali. Mɛnɛ ba sɔkɔ hu ka niya hakɛ, miŋ kiŋ nda ka bɛŋ nɔŋ biya bitukɛ, nama hɛlɛŋ miŋ kahite ka niya bɛŋ? 3 E beŋ kɔita ba dɔma na miŋ fooma mindo biyo nde biye hu ka Masaala haŋ beŋ ba mina bohinande iŋ Kraist Yisɔs, miŋ biyo nde ba tuka ka tha banthe iŋ wundɛ? 4 Naa biyo miŋ, miŋ tuku ka tha banthe iŋ wundɛ e miŋ mankuwo iŋ wundɛ, haliko wu be niyɔ nɔŋ na ŋayino Kraist ka tuka haŋ iŋ sɛmbɛ bamandiŋ-mandiŋ ba ka Fanda ntuŋ woŋ baŋ, miŋ hɛlɛŋ nɛŋ miŋ be sɛkɛthi mayathi maŋama. 5 Na see nda miŋ bɔhande ka tha banthe iŋ Kraist ba tuka nɔŋ na tuku wundɛ na, nɛna hɛlɛŋ miŋ nɔŋ niyɔ ka tha banthe iŋ wundɛ ka ŋayino ka tuka haŋ e kuta sii nɔŋ na ŋayino nde wundɛ na e kuta sii. 6 Miŋ kɔthɛŋ ba dɔma na thathukuma thakɛntuŋ thatiyɔ thaŋ koro nde ka nanthe iŋ Kraist ka kuyeŋ kubariŋande koŋ, ba haliko sɛmbɛ ba ka thukuma hu ka hakɛ baŋ haŋ hu be punku ba teetuwo, ba miŋ be tha nda niyɔ mbaayiŋ bi ka hakɛ. 7 Ka malɔkɔ ma wɔ tuku wundɛ pɛyɛ kuyankaŋ ŋaye ka makɛrɛŋ ma ka hakɛ baŋ maŋ. 8 Na miŋ tuku nɛnɛ iŋ Kraist, miŋ niyeŋ lanɛya ba miŋ kɔ niyɔ iŋ sii ka nanthe iŋ wundɛ. 9 Miŋ kɔthɛŋ ba dɔma na Kraist ŋayino ka tuka haŋ, awa wundɛ sa nɔŋ nda tuku gbɔ; tuka sa nɔŋ nda niŋ kɛriŋiyɛ. 10 Awa na tuku nɛnɛ wundɛ, hakɛ sa nda niŋ kɛriŋiyɛ hali; ka hɛ woŋ wundɛ kiŋ nda mabɔhande iŋ Masaala. 11 Nɛna hɛlɛŋ beŋ ba siyuwe yɛthɛ bakendeŋ. Beŋ kiŋ ba siyuwa yɛthɛ bakendeŋ bendo tukɛ nda ka kufɛŋ ku ka hakɛ, kɛrɛ beŋ niyɔ bendo pethɔy ka kufɛŋ ku ka Masaala saathɛ ba bɔhande ndeŋ haŋ ka tha banthe iŋ Kraist Yisɔs. 12 Hakɛ ba bɛiŋ nɔŋ nda kɛrɛŋiyɛ ŋakɔtɔ ndeŋ ŋa nɔŋ tuku ŋaŋ, ba dɔma na ba hɛlɛŋ putiyɔ ŋafiyo ŋa ka ŋakɔtɔ ŋakendeŋ ŋaŋ. 13 Baŋ nda dunkuŋ kufɛŋ ndo kufɛŋ ku ka ŋakɔtɔ ŋakendeŋ ŋaŋ ka hakɛ ba kuŋ niye wali bɛyiniŋ banɛnɔy. Kɛrɛ dunkunaŋ yɛthɛ bakendeŋ ka Masaala nɔŋ biya bi ŋayitiyo ka tuka ba siso ka sii, awa e beŋ dunkuna yɛthɛ bakendeŋ fooma kɛnama ba niyo wali bathumbɛ. 14 Hakɛ ba bɛiŋ nda bena kɛriŋiyɛ; beŋ ka nda ka pothi ka Siraŋ baŋ, kɛrɛ beŋ kiŋ nda ka pothi ka makutiyɛ ma ka Masaala maŋ. 15 Nama ntiŋ nda miŋ ni? Miŋ ka ba niya hakɛ hali, hali na ka miŋ ka pothi ka makɛrɛŋ ma ka sirani baŋ maŋ na, baa miŋ kiŋ nda ka pothi ka makɛrɛŋ ma ka makutiyɛ ma ka Masaala maŋ. 16 Yaathi beŋ kɔthɛŋ ba dɔma na naa yi dunkuŋ yɛthɛ bakɛnda nɔŋ waayi ba putiyɔ wɔ. Wuŋ, wuŋ tɔŋɔŋ ba dɔma na yi kiŋ waayi yaathi ba Mariki wo putiyɔy yi woŋ, wu niyɔiŋ nthɔŋ ba putiyɔ hakɛ e yi kuta hutuka, maa e yi putiyɔ Masaala na e ndɛ yina kuta nɔŋ wɔ thumbɛ. 17 Kɛrɛ miŋ thiyi Masaala na maamo, baa malɔkɔ manthe nde, beŋ kiŋ nde mbaayiŋ bi ka hakɛ, kɛrɛ mahɛŋ mabɛina beŋ yɛrɔkɔy iŋ thathukuma ndeŋ thaŋ fooma nɔndi ba kuto ka mathanani ma thanki beŋ thaninuwo maŋ. 18 Beŋ peyeno kuyankaŋ ŋaye ka hakɛ e beŋ nda si sikiyɔkɔ mbaayiŋ bi ka niya mathumbɛ. 19 Yaŋ sisiyɛŋ hɛ bena mathɔyande ŋaye ka bɛyiniŋ ba niyɔ timo tima ba thɔkɔ ba na beŋ bendo kahɛ metho bɛyi. Ka lɔkɔ ba daŋande nde, beŋ kiŋ nde mbaayiŋ bi ka niya ŋabɛy iŋ bɛyiniŋ banɛnɔy fooma. Kɛrɛ ka tete, beŋ kiŋ nda ba dunkuna yɛthɛ bakendeŋ mbaayiŋ bi ka niya mathumbɛ, e beŋ niyɔ ntha ki deŋo kuwaŋ thɔɔkɔ ba wali ba ka Masaala baŋ. 20 Naa nde beŋ mbaayiŋ bi ka hakɛ, beŋ ka nde ka pothi ka makɛrɛŋ ma ka mathumbɛ maŋ. 21 Kɛrɛ mbɛ munahaŋ ba kute nde beŋ ka niya nde bɛyiniŋ ba nda tete bena kuyaahu baŋ baŋ? Hutuka huna kute beŋ. 22 Ka tete beŋ kute kuyankaŋ ŋaye ka hakɛ e beŋ nda niyɔ mbaayiŋ bi ka Masaala. Munahaŋ ba kute beŋ bɛna sii ba dunkunɔkɔy ka kuwaŋ ku ka Masaala koŋ wubunthu awa bɛna dunkunɛ bena sii ba kɔy yo kɔy. 23 Kuthunkuŋ ku ka hakɛ ku kiŋ hutuka; kɛrɛ munkii mu ka Masaala muŋ mu kiŋ sii ba kɔy yo kɔy ka bɔhande ntuŋ haŋ ka tha banthe iŋ Kraist Yisɔs, Mariki wokɛntuŋ woŋ.
