biRomaŋ beŋ 4

1Ka tete miŋ kɔŋ nda see ka gbonkiya ba Ebrahim, mbemba ki ka siya bakɛntuŋ baŋ, iŋ ba niyɔy nde niŋ baŋ. 2Mɛnɛ wundɛ kuto nde iŋ Masaala nɔŋ wɔ thumbɛ saathɛ ba bɛyiniŋ ba ni nde wundɛ baŋ, wundɛ kɔŋ nde niyɔ iŋ bɛyiniŋ ba wundɛ gbuŋuneke. Kɛrɛ wundɛ ka na gbuŋuneke ka thaaya ka Masaala, 3baa magbali ma ka Masaala maŋ tepe, na “Ebrahim ni Masaala na lanɛya, awa ba saathɛ ba ka lanɛya babɛina nɛnɛ, Masaala yɛrɔkɔy niŋ nɔŋ wɔ thumbɛ.” 4Wɔ wo ni wali ndɛ kɔŋ thunkuna awa kuthunkuŋ nama koŋ sa detho nɔŋ munkii kɛrɛ ku kɔŋ detha nɔŋ ntha ki niyiyɛ wundɛ wali. 5Wɔ wo tha dekinteke wali ba wundɛ ni ba yehina Masaala na thukuma, kɛrɛ wundɛ dekinteke lanɛya nama baŋ ka Masaala wo dɔŋ wɔ woŋ na ndɛ ka iŋ mathonko, lanɛya bakɛnama baŋ bɛna Masaala sɛkɛthi ba niŋ yɛrɔkɔ nɔŋ wɔ thumbɛ. 6Haŋ haŋ huna nde Dauda siyi naa gbonkoy wundɛ ba mayehitɔkɔ ma ka wɔ wo yɛrɔkɔy Masaala nɔŋ wɔ thumbɛ, wuŋ ka ba saathɛ ba ka wali ba wundɛ ni ba yehina Masaala na thukuma, na 7“Biya bi iŋ mayehitɔkɔ bina bi thanki Masaala pɛniyɛ banɛnɔy bakɛnamɛŋ, bi thanki wundɛ puuthiyɛ hakɛŋ bikɛnamɛŋ. 8Wɔ wo iŋ mayehitɔkɔ na wo sa nda Masaala kɔsiniyɛ hakɛŋ bikɛnama ka thukuma.” 9E mayehitɔkɔ ma Dauda gbonkiyiyɛ maŋ maŋ nde ma kiŋ hɔkɔŋ nagbɛti ba bi thiyɔy ka bintɔni namɛŋ beŋ? Ade wuŋ ka nɛŋ. Ma kiŋ hali ba bi be thiyɔ ka bintɔni namɛŋ beŋ, baa miŋ thanki nda kuta ka magbali maŋ, na “Ebrahim ni Masaala na lanɛya, awa ba saathɛ ba ka lanɛya babɛina nɛnɛ, Masaala yɛrɔkɔy niŋ nɔŋ wɔ thumbɛ.” 10Tima niiye nde wuŋ? E wuŋ niyɔy nde saanuŋ Ebrahim ba thiyo ka bintɔni nama maa naa thanki nda wundɛ thiyo ka bintɔni nama? Wuŋ niyɔy nde saanuŋ wundɛ ba thiyo ka bintɔni nama; wuŋ ka naa thanki nda wundɛ thiyo ka bintɔni nama. 11Ebrahim manke thiyo ka bintɔni nama, awa thiyo ka bintɔni nama haŋ haŋ thɛnkɛy bɛna nde ba tɔŋina ba dɔma na saathɛ ba lanɛya bakɛnama baŋ Masaala yɛrɔkɔy niŋ nɔŋ wɔ thumbɛ saanuŋ wundɛ ka saa ka thiyo ka bintɔni nama. Huna Ebrahim ndɛ na mbemba wo ka biya fooma bi niyɛ lanɛya ka Masaala e bindɛ yeroko iŋ wundɛ nɔŋ biya bithumbɛ hali na be bindɛ thiya ka bintɔni namɛŋ na. 12Ndɛ kiŋ hɛlɛŋ mbemba wo ka bi thiyɔy ka bintɔni namɛŋ beŋ, bi tha hɔkɔŋ piteke thiyo ka bintɔni namɛŋ haŋ beŋ nagbɛti, kɛrɛ bi yemɛ lanɛya ba nde iŋ Ebrahim baŋ, mbemba ntuŋ woŋ, saanuŋ wundɛ ba thiyo ka bintɔni nama. 13Masaala ni nde Ebrahim na iŋ bɔnsɔŋ nama baŋ lahiri ba dɔma na bi kɔŋ biyɔ dunia baŋ. Masaala ni lahiri baŋ baŋ, wuŋ ka ba domo na ba na putiyɔy Ebrahim Siraŋ baŋ, kɛrɛ ba na niyɔy wuŋ ndɛ ni lanɛya e wundɛ yeroko iŋ Masaala nɔŋ wɔ thumbɛ. 14Huna mɛnɛ wu kiŋ ba dɔma na wu ni Masaala lahiri wuŋ kiŋ ba dunkuno ka biya bi putiyɔy Siraŋ baŋ beŋ, wuŋ niyɔy, wɔmɛti ni lanɛya ba gboŋ, awa Masaala ni lahiri ba gboŋ. 15Siraŋ baŋ bɛna sisɛ mathoŋ mɛnɛ kugbasaŋati ku ka Masaala koŋ; baa mɛnɛ Siraŋ ka nde, mathonko ma ka teetuwa Siraŋ sa nde niyɔ. 16Masaala ni nde lahiri woŋ, baa Ebrahim ni niŋ lanɛya, haliko lahiri wobɛina be punku ba kɔɔ wukahɛ nɔŋ munkii mu ka Masaala ka bɔnsɔŋ ba ka Ebrahim baŋ fooma, wuŋ ka hɔkɔŋ ka bi putiyɔy Siraŋ baŋ beŋ nagbɛti, kɛrɛ thiyitaŋ bi niyɛ lanɛya beŋ nɔŋ na ni Ebrahim lanɛya na, baa Ebrahim ndɛ na mbemba ntuŋ woŋ fooma, 17nɔŋ na tepe Masaala ka Ebrahim ka magbali nama maŋ na, na “Yaŋ ni yina mbemba ki ka siyani babɔyɛ.” Huna lahiri baŋ kɔɔyɛ wukahɛ ka kuwaŋ ku ka Masaala koŋ, wo ni Ebrahim lanɛya woŋ, Masaala wo ni ba bitukɛ beŋ thɔhɔ woŋ, wo ni yamari woŋ awa munki mu ka nɔŋ e muŋ niyɔ. 18Ebrahim ni Masaala na lanɛya e wundɛ yumba iŋ matute yima ba ba see, hali na niyɔy wuŋ kolo ka ba wundɛ yumbe ka gboŋa nɔŋ baŋ baŋ. Wundɛ see niyɔ “mbemba ki ka siyani babɔyɛ,” nɔŋ na tepe magbali ma ka Masaala maŋ na, na “Bɔnsɔŋ nda baŋ bɛ kɔŋ bɔyi nɔŋ sosɛŋ.” 19Wundɛ kiŋ nde nda ba thuriye thanina kɛmɛ wunthe, kɛrɛ lanɛya bakɛnama baŋ bakahɛ thuŋ, hali na wundɛ siyi ba kɔtɔ nama koŋ ku nde nda ku daŋande lɔkɔ koŋ na, awa wɔtɔ nama hɛlɛŋ Sera wo daŋande nde nda lɔkɔ ba ba bohe komisinɛ. 20Halisa wundɛ tha pɛyɛŋ lanɛya bakɛnama baŋ, awa wundɛ tha kikiŋ lahiri ba ka Masaala baŋ. Lanɛya nama baŋ ni ba wundɛ yama kaahuwa e dunkuna Masaala na kugbuŋunu. 21Wundɛ niyeŋ kulanɛya wukunthɛ ba dɔma na Masaala kɔŋ punku niya ba thanki wundɛ niya niŋ lahiri baŋ. 22Haŋ haŋ huna biyɛ Ebrahim “be yeroko iŋ Masaala nɔŋ wɔ thumbɛ” ba na ni nde wundɛ niŋ lanɛya. 23Thampɛŋ thaŋ thaŋ ba dɔma, na “Ndɛ yeroko nɔŋ wɔ thumbɛ,” thɛŋ tha nde hɔkɔŋ gbalo ba ndɛ wuthɔ. 24Thɛŋ gbalo nde hɛlɛŋ ba miŋ, mindo ba yeroko beŋ nɔŋ biya bithumbɛ, mindo niyɛ lanɛya beŋ ka wo ŋayinɛ nde Yisɔs na Mariki wokɛntuŋ woŋ ka tuka haŋ woŋ. 25Hakɛŋ ntuŋ baŋ ni ba wundɛ dunkuno e wundɛ koro, awa e ndɛ ŋayino ka tuka haŋ haliko ba niya ba miŋ detho nɔŋ biya bithumbɛ iŋ Masaala.

will be added

X\