biRomaŋ beŋ 2

1E yi athonkine ntɔ nda na? Namo nama na yi, mɛnɛ yi thonkine ntɔ nda na, yi ka iŋ kabari womɛɛsɛ hali. Baa naa yi thonkine biya bihɛna na e yi kɔ niya bɛyiniŋ banɛnɔy banthe babɛina ba bindɛ ni baŋ, yi thonkine yɛthɛ bakɛnda. 2Miŋ kɔthɛŋ ba dɔma na Masaala kɔŋ ni wuthumbɛ naa wundɛ thonkine biya bi ni bɛyiniŋ banɛnɔy baŋ baŋ beŋ. 3Kɛrɛ yi, e yi kɔ niya bɛyiniŋ banɛnɔy baŋ baŋ fooma ba thonkine yi biya bihɛna baŋ. E yi simekeŋ ba dɔma na yi kɔŋ buthuru ba thonkino iŋ Masaala? 4Maa e yi ayethitɔ bayɔhɔy ba ka Masaala bamandiŋ-mandiŋ baŋ ba na tha wundɛ yina gbasaŋati kɔɔna iŋ kɔɔna, iŋ kuthithi nama koŋ, iŋ muyuŋ nama banambɛ baŋ? Yi kɔthɛŋ ba dɔma na bayɔhɔy ba ka Masaala baŋ kuthɔnthɔ kuna bɛŋ yina yɔli ba yi be sikiŋ sɔkɔrɔ hakɛŋ bikɛnda beŋ. 5Kɛrɛ yi, yi kiŋ iŋ thukuma hukahɛ e lɔɔnkita ŋaiha nda ŋaŋ. Ba saabu babɛina yi ni ba kugbasaŋati nda koŋ yama bɔya ka lɔkɔ ba mathoŋ iŋ kɔnsɔŋ kuthumbɛ ku ka Masaala koŋ tɔŋinɔkɔ. 6Ka lɔkɔ babɛina, Masaala kɔŋ tɛnkiniyɛ wɔ yo wɔ wali ba thanki wundɛ niya. 7Binɔndi bi keyka kɔtɔkɔy beŋ kaŋ niya bayɔhɔy e ka deethuwa ba Masaala be gbonkiyɛ bindɛ wuyɔhɔy e dunkune bindɛ yiki iŋ sii ba kɔy yo kɔy; Masaala kɔŋ bindɛ dunkune sii babɛina. 8Binɔndi nɛnɛ, bi ba yɛthɛ namɛŋ e baŋina mathumbɛ ba yema basikɔi; bindɛ bina Masaala ŋute mathoŋ nama matɔɔkɛ-tɔɔkɛ maŋ. 9Nambarɛŋ iŋ wuthoonɛ wu kɔŋ kɛndɛ niyɔ ba wɔ yo wɔ wo ni wunɛnɔy there nthɔŋ nda ka biYusu beŋ bɔhaŋ biya bi ka siyani bahɛna baŋ beŋ. 10Kɛrɛ Masaala kɔŋ dunkuŋ yiki iŋ mathɛbɛ ka wɔ yo wɔ wo ni wuyɔhɔy there nthɔŋ nda ka biYusu beŋ bɔhaŋ biya bi ka siyani bahɛna baŋ beŋ, 11baa Masaala hakinuwandeta biyamɛti. 12Naa biya bi ka siyani bahɛna baŋ beŋ, bi ka iŋ Siraŋ ba dunkuŋ nde Masaala ka yɔnkɔ hu ka Musa haŋ beŋ ni hakɛ, bi kɔŋ piriŋ hali na ka bindɛ iŋ Siraŋ baŋ na. Naa biYusu bi iŋ Siraŋ baŋ beŋ ni hakɛ, bi kɔŋ konsiŋino ka Siraŋ baŋ. 13Wuŋ ka hɔkɔŋ ka pona kuiha ka Siraŋ baŋ nagbɛti na wɔ kuto iŋ Masaala ba wundɛ niyɔ wɔ thumbɛ, kɛrɛ ŋaye ka niya ba ni siraŋ baŋ yamari baŋ wɔ kɔŋ kuta iŋ Masaala ba wundɛ niyɔ wɔ thumbɛ. 14Yaathi biya bi ka siyani bahɛna baŋ beŋ bi tha nde dunkuno Siraŋ baŋ beŋ ŋaye ka yɔnkɔ hu ka Musa, naa bindɛ ni ba ni Siraŋ baŋ yamari baŋ ŋaye ka kele hu mpuutando bindɛ haŋ, wuŋ tɔŋɔŋ ba dɔma na bi kɔthɛŋ ba bindɛ ba niya, hali na niyɔy wuŋ na bindɛ ka iŋ Siraŋ baŋ. 15Bɛyiniŋ bayɔhɔy ba bindɛ ni baŋ tɔŋɔŋ ba dɔma na ba ni Siraŋ baŋ yamari baŋ, ba kiŋ nda ka thathukuma thakɛnamɛŋ thaŋ. Bɛyiniŋ ba bindɛ thathukuma namɛŋ thaŋ tepe baŋ gbeeŋ, tɔŋɔŋ ba dɔma na nɔndi bɛna baŋ baŋ, ba lɔkɔ hɛ masimɔkɔ makɛnamɛŋ maŋ mɛ kɔŋ bindɛ tepe na bindɛ ni wusikɔy maa bindɛ ni wuthumbɛ. 16Huseri Huyɔhɔy hu ni yaŋ kukɛwandi haŋ, huŋ tepe ba dɔma na nɛna wuŋ niiye ka malɔkɔ ma Masaala, ŋaye ka yɔnkɔ hu ka Yisɔs Kraist, kɔnsɔŋɔŋ gbundu ba ka masimɔkɔiŋ ma ka biyamɛti. 17Mbu ntiŋ nda yi? Yindo dɔmɔkɔ woŋ na woYu e yi dekinteke Siraŋ baŋ e yi kɔ kaa kaŋ bukuyinɔkɔ na wɔ wo yetho iŋ Masaala na yi. 18Yi kɔthɛŋ ba thimo Masaala yina ba yi niya, awa yi thanki thanuwa ŋaye ka Siraŋ baŋ ba yɛtha wuthumbɛ wuŋ. 19Yi siyuweŋ ba dɔma na yi kiŋ bakɔtɔkɔ ba bimankɔy thaaya beŋ, iŋ mumɔɔli ba bi ka huntuma haŋ beŋ, 20badinki ba bithɔkɔy beŋ, karimɔkɔ ba bithahuwɔy beŋ. Yi simekeŋ ba dɔma na na niyɔy wuŋ yi kiŋ iŋ Siraŋ baŋ, yi kɔthɛŋ nda bɛy yo bɛy, awa bɛy yo bɛy ba yi gbonkoy na nɔndi bɛna. 21Yindo thanani biya bihɛna. Mbɛ ba sa yi thanineke? Yindo ni kɛwandi na wɔ be tha tuwe. E yi tuweta? 22Yi dome na wɔ be tha ni kubɛy. E yi niyeta kubɛy? Yi tepe na ba niya kubatho dekɛŋ na bɛyi banɛnɔy-nɛnɔy bɛna. E yi kaayeta kaŋ tuwe munkiŋ mu deŋo ka bankɛŋ bakuwɛ ba ka ŋathɔnkɔnini ŋaŋ baŋ? 23Yi kɔŋ keykaŋ gbuŋunɔkɔ ba niyɔ iŋ Siraŋ ba ka Masaala baŋ. E yi siseta kuyaahu ka keŋ ku ka Masaala koŋ ka teetuwa Siraŋ baŋ? 24Magbali ma ka Masaala maŋ gbonkoy nde ba beŋ, bendo biYusu beŋ, naa tepe mɛŋ, na “Ba saathɛ bakendeŋ bɛna siyani bahɛna baŋ gbonkiye wunɛnɔy ba keŋ ku ka Masaala koŋ.” 25Mɛnɛ yi putiyɔy Siraŋ baŋ fooma, thiyo ka bintɔni nda haŋ hu kɔŋ yina mase; kɛrɛ mɛnɛ yi thinke Siraŋ baŋ, wu kɔŋ niyɔ nanthe iŋ ba nde nɔŋ yi thana thiyo ka bintɔni nda. 26Mɛnɛ wɔ wo ka siya bahɛna baŋ woŋ, wo be thiyɔ ka bintɔni nama, ni ba tepe Siraŋ baŋ ba wundɛ niya baŋ, Masaala kɔŋ niŋ simɔkɔ nɔŋ wɔ thiyɔy ka bintɔni nama. 27Awa huna yi, yindo woYu woŋ, yi kɔŋ thonkino iŋ biya bi ka siyani bahɛna baŋ beŋ, baa yi thinke Siraŋ baŋ, hali na niyɔy wuŋ na yi kiŋ iŋ bɛŋ bagbalɔy awa e yi thiyo ka bintɔni nda; mahɛŋ mabɛina e biya bi ka siyani bahɛna baŋ beŋ putiyɔ Siraŋ baŋ, hali na niyɔy wuŋ na bindɛ ka bi thiyɔy ka bintɔni namɛŋ ka kɔtɔ koŋ. 28Wuŋ ka ba dɔma na wɔ yo wɔ wo tɔŋinɔkɔ ba wundɛ niyɔ woYu na woYu gbeeŋ, baa thiyo ka bintɔni nda hugbeeŋ haŋ hu yameŋ ba bɛyi ba niya hɔkɔŋ ka kɔtɔ koŋ baŋ. 29Kɛrɛ woYu wogbeeŋ ndɛ na wo sikiyɔkɔy woYu ŋaye kaake, wo thukuma nama haŋ hu thankɛ nda loko woŋ. Awa wali ba ka loko baŋ baŋ, Yina wo ka Masaala woŋ na bɛŋ ni; Siraŋ ba gbalo baŋ kutɛ bɛŋ ni. Awa wɔ thankɛ loko woŋ, wundɛ kɔŋ kutu kuthunkunu maŋaye ka Masaala, wuŋ ka maŋaye ka biyamɛti.

will be added

X\