biRomaŋ beŋ 15

1Miŋ, mindo kahɛ beŋ ka lanɛya baŋ, kiŋ ba mase bikɔɔyuwɛ beŋ ka lanɛya baŋ ba kata doniŋ namɛŋ baŋ. Miŋ ka ba hɔkɔŋ yehina yɛthɛ bakɛntuŋ thukuma. 2Saanuŋ miŋ be ka yeheŋ yɛthɛ bakɛntuŋ thukuma, wunthe yo wunthe ka mateete makɛntuŋ kiŋ ba yehina ntɔ nama thukuma ba wuyɔhɔy wu ka ntɔ nama ba niŋ mase na wundɛ niiye Kristɛŋ wokahɛ. 3Baa Kraist tha nde yeheŋ yɛthɛ nama thukuma, nɔŋ na tepe magbali ma ka Masaala maŋ na, na “Thampɛŋ thanɛnɔy tha gbonkiyo thaŋ iŋ biya bi kɔɔyɛ ba bena sɔkinɔkɔ beŋ see yama ŋote.” 4Bɛy yo bɛy ba gbalo nde ka yamana ba nde mayoŋ baŋ, gbolo nde ba mina thaninuwa, ba haliko miŋ be niyɔ iŋ matute yima maŋaye ka muyuŋ iŋ kuthɔnthɔ ku mina magbali ma nde mayoŋ maŋ dunkune koŋ. 5Awa haliko Masaala wo ni ba miŋ niya muyuŋ iŋ kuthithi woŋ punka bena ba beŋ niyɔ sɔkɔ hunthe ka mateete makendeŋ, ka niya nɔŋ na ni nde Kraist na. 6Haliko beŋ fooma ka tha banthe, beŋ be yɛli thampa kɔɔ hanthe ba thunkunuwa Masaala na, Fanda wo ka Mariki wokɛntuŋ woŋ Yisɔs Kraist. 7Yɛrɔkɔŋ wunthe iŋ ntɔ nama, nɔŋ na yɛrɔkɔy bena Kraist na, haliko Masaala be gbuŋunuwa. 8Baa yaŋ tepe bena, na Kraist see sikiyɔkɔ bawali wo ka biYusu beŋ ba tɔŋina ba dɔma na Masaala kɔŋ ni ba tepe wundɛ baŋ, ba niya haaŋ lahiri nama baŋ ka mbembɛŋ namɛŋ kiŋ niyɔ nɔndi, 9iŋ ba niya siyani bahɛna baŋ gbuŋunuwa Masaala na ba nkinikiniŋ nama kiŋ. Nɔŋ na tepe magbali nama maŋ na, na “Bɛna, Masaala, naa yaŋ niyɔy ka mateete ma ka siyani bahɛna baŋ, yaŋ kɔŋ dunkuŋ yina kuthiyi maamo. Yaŋ kɔŋ yina sɔnkɔti.” 10Mɛŋ tepe hɛlɛŋ, na “Bendo biya bi ka siyani bahɛna baŋ beŋ, thɔɔtɔŋ biya bi thanki Masaala yɛtha beŋ ka yehitɔkɔ.” 11Awa mɛŋ tepe hɛlɛŋ, na “Bendo biya bi ka siyani bahɛna baŋ beŋ fooma, thunkunuwaŋ Mariki woŋ; awa biya fooma bi thunkunuwɛŋ niŋ.” 12Awa banabi woŋ Aisaya tepe hɛlɛŋ, na “Wɔ wunthe wo ŋaye ka bɔnsɔŋ ba ka Yɛsi baŋ kɔŋ nɔŋ see; Masaala kɔŋ niŋ ŋataŋ ba kɛriŋiyɛ siyani bahɛna baŋ, awa bindɛ kɔŋ tutu masiyi namɛŋ kɛnama.” 13Haliko Masaala, wo matute ndeŋ yima woŋ, thiŋina bena iŋ mayehitɔkɔ mɛnɛ mathɛbɛ ba saathɛ ba na ni beŋ niŋ lanɛya, huna matute yima makendeŋ maŋ mɛ be bɔyi maŋaye ka sɛmbɛ ba ka Yina wo ka Masaala woŋ baŋ. 14Bendo mbɛndaŋ bi niyɛ lanɛya, yaŋ yɛthɛ yaathi, yaŋ niyeŋ lanɛya ba beŋ niyɔ bendo thiŋɛ iŋ bayɔhɔy mɛnɛ makɔthɔ fooma, awa beŋ punkeŋ ba thaninuwande. 15Kɛrɛ ka kuthagba koŋ koŋ, yaŋ gbonkoy nagberekethe ba bɛyiniŋ banɔndy ba thanki nde yaŋ bena simina. Yaŋ gbonkoy iŋ huthunka baa Masaala dunkuŋ yama hɛɛra 16ba ka niyɔ bawali wo ka Kraist Yisɔs ba niya wali ka siyani bahɛna baŋ. Yaŋ ni wali nɔŋ bafode ka niya kɛwandi Huseri Huyɔhɔy hu ŋaye ka Masaala haŋ, ba haliko siyani bahɛna baŋ bɛ be niyɔ munkii mu yeroko ka kuwaŋ ku ka Masaala koŋ, mu dunkuŋ Yina wo ka Masaala woŋ muŋ kɛnama. 17Naa niyɔy wuŋ yaŋ bɔhande iŋ Kraist Yisɔs, yaŋ kɔŋ niyɔkɔ kaba ba wali bakiyaŋ baŋ ba Masaala. 18Yaŋ sa yɔli ba gbonkiya ba bɛy yo bɛy, yɔkɔŋ ba ba ni Kraist maŋaye kiyaŋ hɔkɔŋ nagbɛti ba sisa siyani bahɛna baŋ ba putiyɔ Masaala na maŋaye ka thampɛŋ iŋ ka mani, 19maŋaye ka bɛyiniŋ babukuyuwɛ ba tɔŋɔŋ sɛmbɛ ba ka Masaala baŋ mɛnɛ bɛyiniŋ bathakaba, iŋ ka sɛmbɛ ba ka Yina wo ka Masaala woŋ. Awa huna ka kubiyasi niŋ koŋ fooma ŋaye ka mɛti ba ka Yɛrusalɛmi ba kaa ka kuyɛkɛŋ ku ka Ilirikumi, yaŋ koyoŋ Huseri Huyɔhɔy haŋ ba Kraist wuthiŋɛ. 20Kufiyo kukiyaŋ koŋ ku kiŋ timo tima ba koyiŋa Huseri Huyɔhɔy ka thani ka be hɛ Kraist yuyɔ bahanthe, ba haliko yaŋ be tha thoyi ka sɛsi wɔ hɛna ba thoya. 21Nɔŋ na tepe magbali ma ka Masaala maŋ na, na “Bi be hɛ nɔŋ tepo ba wundɛ beŋ, bi kɔŋ kutu; awa bi be hɛ yuyɛ ba wundɛ beŋ, bi kɔŋ metho ba wundɛ.” 22Ba kolo baŋ baŋ bɛna dɔmɛ yaŋ kuita nɔŋ hɛɛra ba bena saa ka maana. 23Kɛrɛ ka tete, naa thankaŋ nda yaŋ wali niŋ baŋ ka kirinkiri haŋ haŋ dondo na, awa e yaŋ nɔŋ thimo wuthɔkitɛ ba bena kutiyɔkɔ, 24yaŋ tuteŋ yima ba nda yaŋ wuŋ kɔ niya ka tete. Yaŋ kɔŋ thimo ba bena kutiyɔkɔ naa yaŋ kɔ daŋande ba kaa ka Sipeni iŋ ba yama dunkuna kumase naa yaŋ kɛndɛ kaaye, naa yaŋ niyɔy iŋ beŋ ba sɛnkɛni binɔndi. 25Ka tete, yando keyka Yɛrusalɛmi ba kata kumase ka biya bi ka Masaala beŋ kɛndɛ. 26Baa makɔmandeŋ ma ka biya bi ka Masaala beŋ ka ŋakuyɛkɛŋ ŋa ka Masidoniya mɛnɛ ka Kirisi bindɛ dɛɛnki ba dunkuna munkii ba mase bamɔnɛŋ beŋ ka mateete ma ka biya bi ka Masaala beŋ ka Yɛrusalɛmi. 27Bindɛ yɛthɛ yaathi bindɛ bina dɛɛnkɛ ba wuŋ niya. Kɛrɛ ba nɔndi baŋ, bi kiŋ iŋ gbɛthɛŋ ba mase bamɔnɛŋ bi ka Yɛrusalɛmi beŋ. BiYusu beŋ hanande iŋ siyani bahɛna baŋ thaduba tha ka Yina wo ka Masaala woŋ thaŋ; bɛna nɛnɛ siyani bahɛna baŋ ba kiŋ ba mase biYusu beŋ iŋ nanhulu namɛŋ baŋ. 28Naa yaŋ thankaŋ wali baŋ baŋ e yaŋ bindɛ thanka dunkune fooma kɔbiri wo toŋo ba bindɛ woŋ, yaŋ kɔŋ pɛyɛŋ ba kaa ka Sipeni awa kɔŋ bena maaŋ naa yaŋ kɔ daŋande kɛndɛ. 29Naa yaŋ kɔ see, yaŋ kɔthɛŋ ba dɔma na yaŋ kɔŋ see iŋ thaduba tha ka Kraist thathiŋɛ napɛ. 30Yaŋ theteke bena, mbɛndaŋ beŋ, ba saathɛ ba Mariki ntuŋ woŋ Yisɔs Kraist iŋ mathimo ma Yina wo ka Masaala woŋ dunkuŋ maŋ ba thɔɔtɔ ka niyɛ yama kuraminɛ ka Masaala wukahɛ. 31Niyaŋ kuraminɛ haliko yaŋ be niyɔ kisi ŋaye ka biya bi be ni lanɛya beŋ ka kuyɛkɛŋ ku ka Yudiya, iŋ wali bakiyaŋ baŋ kɛndɛ ka Yɛrusalɛmi ka ba bɛ be yeroko iŋ biya bi ka Masaala beŋ kɛndɛ, 32haliko yaŋ be bena pɛnki iŋ mayehitɔkɔ mathiŋɛ, mɛnɛ mamɛyi ma ka Masaala maŋ mɛna, haliko maana niŋ haŋ hu be yama ni ba yaŋ yehitɔkɔ e yaŋ hɛmuwa. 33Haliko Masaala wo mina dunkuŋ mathɛbɛ woŋ niyɔ iŋ beŋ fooma. Amiina.

will be added

X\