1 Wɔ yo wɔ wundɛ kiŋ ba putiyɔ bakɛrɛni bi ka kuyɛkɛŋ koŋ beŋ, baa bakɛrɛŋ ndo bakɛrɛŋ ka wo niyɔ mɛnɛ wuŋ ka mamɛyi ma ka Masaala maŋ. Awa Masaala ndɛ na kiyɛ bakɛrɛni bibɛina kɛndɛ. 2 Awa wɔ yo wɔ wo thanthiye bakɛrɛni bi deŋe Masaala beŋ, wundɛ thanthiye madɛɛnki ma ka Masaala maŋ. Awa wɔ yo wɔ wo bindɛ thanthiye, wundɛ sisiyɔkɔy mathonko ka yɛthɛ bakɛnama. 3 Bakɛrɛni beŋ, biya kutɛ bi ba payiyo iŋ bi ni wuyɔhɔy beŋ; bi ni wunɛnɔy beŋ bina ba payɔ bindɛ. Mɛnɛ yi kiŋ ba thana payɔ bakɛrɛŋ woŋ, niya wuyɔhɔy awa ndɛ kɔŋ yina thunkunu. 4 Ba bakɛrɛŋ woŋ bawali wo ka Masaala na, wo ni wali ba wuyɔhɔy wukendeŋ. Kɛrɛ mɛnɛ yi ni wunɛnɔy, ŋatina thukuma yi kɔŋ gbasiŋita, baa bakɛrɛŋ woŋ boheta sɛmbɛ nama baŋ ba gboŋ. Bawali wo ka Masaala na iŋ ba daŋitande mathoŋ ma ka Masaala maŋ ka bindɛ bi ni wunɛnɔy beŋ. 5 Ba kolo baŋ baŋ, yi kiŋ ba putiyɔ bakɛrɛni beŋ, wuŋ ka ba mathoŋ ma ka Masaala maŋ nagbɛti hɔkɔŋ ndee, kɛrɛ baa yi kɔthɛŋ ka huthukuma hukɛnda haŋ ba dɔma na nɛna yi ba niya. 6 Wuŋ, wuna hɛlɛŋ kolo ba dɔmɛ beŋ kɔ thunkuna duthu, baa bakɛrɛni beŋ bi kɔŋ ni wali ba ka Masaala, mɛnɛ bindɛ ni wali bakɛnamɛŋ. 7 Thunkuna bindɛ wu yi ba bindɛ thunkuna; duthu yo duthu wo beŋ ba thunkuna, thunkunaŋ bindɛ niŋ e niya bindɛ yiki fooma. 8 Ba niyɔ iŋ dɔɔnthɔ ka wɔ yo wɔ; dɔɔnthɔ banthe nape bɛna ba niyɔ iŋ yi, bɛna ba thimo wɔ yo wɔ. Wo thimo ntɔ nama na, wundɛ thanki putiyɔ Siraŋ ba ka Masaala baŋ. 9 Sirani baŋ ba kiŋ, na “Ba ni kubɛy; ba kɔri; ba tuwe; ba niyɔ milɛ ntha ki ka ntɔ nda.” Sirani baŋ baŋ fooma iŋ bapɛyɛ baŋ kɔminando ka siraŋ banthe, na “Thimo ntɔ nda na nɔŋ na thimo yi yɛthɛ bakɛnda.” 10 Wɔ yo wɔ wo thimo ntɔ nama na, wundɛ sa niŋ ni wunɛnɔy. Ba thimo ntɔ nda na, yi putiyɔy Siraŋ babunthu baŋ fooma. 11 Beŋ kiŋ ba wuŋ niya, baa beŋ kɔthɛŋ ba dɔma na malɔkɔ maŋ tɛŋ ba beŋ ba thɔhɔ ŋaye ka nine ndeŋ haŋ, baa malɔkɔ ma miŋ ba niyo kisi maŋ iŋ Masaala thuriye nda ka teete adaŋande malɔkɔ ma si niye nde miŋ lanɛya mayoŋ te. 12 Huyɛ baŋ yole nda daŋande; kaŋ woŋ na see ka puthɔ woŋ. Miŋ pɛyɛŋ niya bɛyiniŋ ba ka huntuma haŋ baŋ; miŋ gbɛkitɔkɔiŋ mudekiye mu ka waŋ baŋ muŋ. 13 Miŋ kiŋ nda ba dinkɔkɔ nɔŋ biya bi ni wali hatɔ teete. Miŋ bɛiŋ thɔɔtɔ ka yakaliŋ ba biya thiiye haaŋ e yilɔ awa miŋ ka ba thiiye haaŋ e yilɔ hali, maa ba niya ŋabɛy, maa ba niyɔkɔ nɔŋ maamiŋ bi ka hee, maa ba dekiya, maa hunaŋ. 14 Kɛrɛ sɛkithaŋ mudekiye mu ka Mariki woŋ muŋ Yisɔs Kraist e beŋ pɛya dunkuna yɛthɛ bakendeŋ baŋ ka mathimo ma ka thukuma huhakɛ haŋ maŋ iŋ ba thiŋina ŋafiyoiŋ ŋabɛyna fooma.
